ეროვნული ბანკი – სექტემბერში ფულადი გზავნილების ძირითად წყაროს კვლავ ევროკავშირის ქვეყნები და აშშ წარმოადგენდა

სექტემბერში საქართველოში გადმორიცხული თანხების მოცულობამ, წინა წლის იმავე პერიოდთან შედარებით, 1.1%-ით დაიკლო და 283.4 მილიონ აშშ დოლარი შეადგინა, ხოლო საქართველოდან გადარიცხული თანხების მოცულობა 16.4%-ით 33.9 მილიონ აშშ დოლარამდე გაიზარდა, – ამის შესახებ ეროვნული ბანკის მიერ გამოქვეყნებულ ანგარიშშია აღნიშნული.

ეროვნული ბანკის ინფორმაციით, წლიურად ფულადი გზავნილების მცირედი კლება საბაზო ეფექტის ამოწურვას უკავშირდება.

„სექტემბერში რუსეთიდან ფულადი გადმორიცხვები წლიურად 40%-ით, 36 მილიონ აშშ დოლარამდე შემცირდა. თუმცა მაღალი ტემპებით, 17.7%-ით ზრდას განაგრძობდა აშშ-დან და 20.4%-ით ისრაელიდან გადმორიცხული ფულადი სახსრები. ასევე, სხვა ქვეყნებიდან, როგორებიცაა ყირგიზეთი და გაერთიანებული სამეფო, გადმორიცხული ფულადი გზავნილები კვლავ ზრდადია (111.5%-იანი და 16.9%-იანი მატება, შესაბამისად). კვლავ მნიშვნელოვანი წვლილი აქვს ევროკავშირის ქვეყნებიდან, იტალიიდან და გერმანიიდან გადმორიცხული ფულადი გზავნილების ზრდას. სექტემბერში რეგიონის ქვეყნებიდან, კერძოდ, თურქეთიდან და აზერბაიჯანიდან გადმორიცხულმა თანხებმა დაიკლო (3.1%-იანი და 15.8%-იანი კლება). უკრაინიდან გადმორიცხული ფულადი გზავნილები კვლავ მინიმალურ დონეზე რჩება. სექტემბერში ფულადი გზავნილების ძირითად წყაროს ევროკავშირის ქვეყნები (45.6%-იანი წილით), აშშ (17.3%-იანი წილით) და რუსეთი (12.6%-იანი წილით) წარმოადგენდა. ევროკავშირის ქვეყნებიდან აღსანიშნავია იტალიის, საბერძნეთისა და გერმანიის მაღალი წილი მთლიან ფულად გზავნილებში“, – ნათქვამია ეროვნული ბანკის მიერ გავრცელებულ ინფორმაციაში.