გივი მიქანაძემ ევროპის საბჭოს საპარლამენტო ასამბლეის იურიდიულ საკითხთა კომიტეტის სხდომაში მიიღო მონაწილეობა

საქართველოს ტექნიკურმა უნივერსიტეტმა სოციალური პასუხისმგებლობის მიმართულებით, წინასაახალწლო ღონისძიებათა ციკლის ფარგლებში, საქველმოქმედო აქცია მოხუცებულთა სახლ „იმედიდან“ დაიწყო, სადაც 35 ბენეფიციარს პროდუქტები, პირველადი დახმარებისა და ჰიგიენის ნივთები გადასცეს. ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, უნივერსიტეტის რექტორის ინიციატივითა და მხარდაჭერით, წინასაახალწლო საქველმოქმედო ღონისძიებები, რომელიც მიზნად ისახავს ხანდაზმულთა მხარდაჭერას, ტრადიციულად იმართება. ისევე როგორც წინა წლებში, ამჯერადაც ინფორმატიკისა და მართვის სისტემების ფაკულტეტის დეკანმა, პროფესორმა თალიკო ჟვანიამ, ფაკულტეტის წარმომადგენლებმა, სტუდენტებმა და სტუ-ის ქალთა ასოციაციის ხელმძღვანელმა, პროფესორმა ნაზი კუციავამ პანსიონატ „იმედის“ ბენეფიციარებს ჰუმანიტარული პაკეტები გადასცეს.სტუ-ის ინფორმატიკისა და მართვის სისტემების ფაკულტეტის დეკანის თქმით, საქართველოს ტექნიკური უნივერსიტეტი მსგავსი აქტივობებით კიდევ ერთხელ უსვამს ხაზს აკადემიური საზოგადოების როლს საზოგადოებრივი სოლიდარობის გაძლიერებასა და ჰუმანური ღირებულებების დამკვიდრებაში. პროფესორ თალიკო ჟვანიას განცხადებით, უნივერსიტეტის წარმომადგენლების აქტიური ჩართულობა ხელს უწყობს სტუდენტებში მოქალაქეობრივი პასუხისმგებლობისა და სოციალური ჩართულობის კულტურის განვითარებას, საქველმოქმედო ღონისძიებები კი იქცევა განათლებისა და საზოგადოებრივი პასუხისმგებლობის ურთიერთკავშირის მნიშვნელოვან მაგალითად. „საქართველოს ტექნიკური უნივერსიტეტისთვის საქველმოქმედო ღონისძიებები არ წარმოადგენს ერთჯერად აქტივობას, არამედ ის არის უნივერსიტეტის სოციალური პასუხისმგებლობის სისტემური გამოხატულება. მსგავსი, უკვე ტრადიციად ქცეული ინიციატივა ემსახურება როგორც მოწყვლადი ჯგუფების მხარდაჭერას, ასევე სტუდენტებისა და აკადემიური საზოგადოების ღირებულებათა ერთიანობის გაძლიერებას. განსაკუთრებით მნიშვნელოვანია სტუდენტების ჩართულობა, რადგან სწორედ ამ გზით ყალიბდება მათში სოციალური პასუხისმგებლობა, თანაგრძნობა და მოქალაქეობრივი თვითშეგნება. უნივერსიტეტი, როგორც საგანმანათლებლო და საზოგადოებრივი ინსტიტუტი, ვალდებულია იყოს აქტიური მონაწილე იმ პროცესებში, რომლებიც ადამიანურ ღირსებასა და სოლიდარობას ეფუძნება. მადლობას ვუხდი თითოეულ სტუდენტს, თანამშრომელს აქციაში ჩართულობისთვის, რექტორს კი მხარდაჭერისა და თანადგომისთვის“, - განაცხადა პროფესორმა თალიკო ჟვანიამ.როგორც სტუ-ის ქალთა ასოციაციის ხელმძღვანელმა, პროფესორმა ნაზი კუციავამ აღნიშნა, რექტორის, აკადემიკოს დავით გურგენიძის მხარდაჭერით, სტუ-ის ფაკულტეტები, „ქალთა ასოციაციასთან“ ერთად, წინასაახალწლო ღონისძიებების ფარგლებში, მოხუცთა თავშესაფრის ბენეფიციარებისთვის სხვადასხვა საქველმოქმედო ღონისძიებას ატარებენ.„ქალთა ასოციაციისთვის მსგავსი შეხვედრები მხოლოდ დახმარების გაწევა არ არის - ეს არის ადამიანური ურთიერთობის, ყურადღებისა და თანაგრძნობის გამოხატვა. ხანდაზმულ ადამიანებთან პირადი კონტაქტი განსაკუთრებით მნიშვნელოვანია, რადგან მათთვის არანაკლებ ფასეულია სითბო, ვიდრე მატერიალური დახმარება. წინასაახალწლო პერიოდში ასეთი ინიციატივები გვახსენებს, რომ საზოგადოებრივი ერთიანობა იწყება თითოეული ადამიანის მიმართ ზრუნვით. სწორედ ეს არის ქალთა ასოციაციის მთავარი მისია. მადლობა მინდა გადავუხადო ინფორმატიკისა და მართვის სისტემების ფაკულტეტს თანამშრომლობისთვის, რექტორს კი მუდმივი მხარდაჭერისთვის“, - აღნიშნა ქალთა საუნივერსიტეტო ასოციაციის ხელმძღვანელმა, პროფესორმა ნაზი კუციავამ.სტუ-ის ინფორმაციით, საქველმოქმედო ღონისძიებები გაგრძელდება და სხვადასხვა სოციალურ ჯგუფზე იქნება ორიენტირებული.

საქართველოს ეროვნული ბანკი საგადასახდელო ბალანსის განახლებულ სტატისტიკას აქვეყნებს.საქართველოს ეროვნული ბანკის ინფორმაციით, 2025 წლის მესამე კვარტალში მიმდინარე ანგარიშის პროფიციტმა 338.8 მლნ აშშ დოლარი შეადგინა, ხოლო მისი მშპ-თან ფარდობა წლიურ ჭრილში 3.5 პროცენტული პუნქტით გაუმჯობესდა და მშპ-ს 3.3 პროცენტს მიაღწია.„აღსანიშნავია, რომ მესამე კვარტალში მიმდინარე ანგარიშის გაუმჯობესებაში მნიშვნელოვანი წვლილი შეიტანა მომსახურების ბალანსმა. კერძოდ, წლიურ ჭრილში მნიშვნელოვნად არის გაზრდილი კომპიუტერული და საინფორმაციო მომსახურების (ICT) ექსპორტი, რომლის ზრდის ტემპმა 88.5 პროცენტი შეადგინა, ხოლო მისი მშპ-თან ფარდობა 2.9 პროცენტს უტოლდება. გაზრდილია ტურიზმიდან მიღებული შემოსავლებიც წლიურად 6.6 პროცენტით და მისი მშპ-თან ფარდობა 16.1 პროცენტს შეადგენს. მიმდინარე ანგარიშის მშპ-თან ფარდობის გაუმჯობესებაში ასევე მნიშვნელოვანი ფაქტორი იყო შემოსავლების ანგარიშის გაუმჯობესებაც.რაც შეეხება 2025 წლის პირველი სამი კვარტლის ჯამურ მაჩვენებლებს, მიმდინარე ანგარიშის დეფიციტი 2.1 პროცენტს შეადგენს, რაც ისტორიულად დაბალი მაჩვენებელია. აღსანიშნავია, რომ პირველი სამი კვარტლის განმავლობაში, მიმდინარე ანგარიშის გაუმჯობესებაში მნიშვნელოვანი წვლილი შეიტანა საქონლის სავაჭრო ბალანსმა. კერძოდ, საქონლის ექსპორტი წლიურად გაიზარდა 8 პროცენტით, ხოლო იმპორტის ზრდის ტემპმა  6.3 პროცენტი შეადგინა. სავაჭრო დეფიციტის მშპ-თან ფარდობა კი 1.1 პპ-ით გაუმჯობესდა და 18.3% შეადგინა. ამასთანავე, მომსახურებისა და შემოსავლების ფორმირების ანგარიშებიც დადებითად აისახა მიმდინარე ანგარიშის დეფიციტის შემცირებაზე“, – აღნიშნულია ინფორმაციაში.სებ-ის ცნობით, მიმდინარე ანგარიშის დაფინანსების ერთ-ერთი ძირითადი წყარო კვლავ პირდაპირი უცხოური ინვესტიციებია, რომლის მოცულობა 2025 წლის პირველი სამი კვარტლის მდგომარეობით მშპ-თან 4.7 პროცენტს შეადგენს.„წინამდებარე სტატისტიკური ინფორმაცია ქვეყნდება საქართველოს ეროვნული ბანკის ვებგვერდზე, სტატისტიკის რუბრიკაში.ცნობისთვის, საგადასახდელო ბალანსის სტატისტიკა წარმოებულია საერთაშორისო სავალუტო ფონდის მიერ შემუშავებული მეთოდოლოგიის „საგადასახდელო ბალანსის სახელმძღვანელო, მეხუთე რედაქცია“, შესაბამისად“, – აღნიშნულია ინფორმაციაში.

საქართველოს ტექნიკური უნივერსიტეტის ნიკო მუსხელიშვილის საუნივერსიტეტო ბიბლიოთეკაში ცნობილი აღმოსავლეთმცოდნის, საქართველოში თურქოლოგიის ფუძემდებლის, საქართველოს მეცნიერებათა აკადემიის აკადემიკოსის - სერგი ჯიქიას წიგნებისა და გამოცემების უნიკალური ფონდის გამოფენა მიმდინარეობს. ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, აკადემიკოს სერგი ჯიქიას წიგნების უნიკალური ფონდი საუნივერსიტეტო ბიბლიოთეკას მისმა ოჯახმა გადასცა, რაც მნიშვნელოვანი წვლილია ქართული სამეცნიერო მემკვიდრეობის შენარჩუნებისა და მომავალი თაობებისთვის ხელმისაწვდომობის უზრუნველყოფისთვის.სტუ-ის ნიკო მუსხელიშვილის საუნივერსიტეტო ბიბლიოთეკის ხელმძღვანელის თქმით, გამოფენაზე წარმოდგენილია აკადემიკოს სერგი ჯიქიას პირადი ბიბლიოთეკის ნაწილი, რომელიც მოიცავს იშვიათ გამოცემებს, სამეცნიერო ნაშრომებსა და აღმოსავლეთმცოდნეობისა და თურქოლოგიის განვითარებისთვის მნიშვნელოვან ლიტერატურას.პროფესორ ვაჟა პაპასკირის განცხადებით, ფონდი განსაკუთრებულ ინტერესს წარმოადგენს როგორც მკვლევართათვის, ისე სტუდენტებისა და ფართო აკადემიური საზოგადოებისათვის.„აკადემიკოს სერგი ჯიქიას წიგნებისა და გამოცემების უნიკალური ფონდის საქართველოს ტექნიკური უნივერსიტეტის საუნივერსიტეტო ბიბლიოთეკისთვის გადმოცემა განსაკუთრებული მნიშვნელობის მოვლენაა. აღნიშნული კოლექცია არა მხოლოდ ასახავს ქართველი მეცნიერის მრავალწლიან სამეცნიერო მოღვაწეობას, არამედ წარმოადგენს ღირებულ წყაროს აღმოსავლეთმცოდნეობისა და თურქოლოგიის სფეროში მომავალი კვლევებისთვის. მსგავსი ფონდების დაცვა, კვლევითი პროცესისთვის ხელმისაწვდომობა და მათი ინტეგრირება აკადემიურ გარემოში ბიბლიოთეკის ერთ-ერთ უმთავრეს მისიას წარმოადგენს, რაც ხელს უწყობს როგორც ეროვნული სამეცნიერო მემკვიდრეობის შენარჩუნებას, ისე მისი შემდგომი განვითარებისთვის მყარი საფუძვლის შექმნას”, - აცხადებს ვაჟა პაპასკირი.როგორც დიდი მეცნიერის შვილიშვილი, სტუ-ის ბიზნესტექნოლოგიების ფაკულტეტის ასისტენტ-პროფესორი ანა ჯიქია აღნიშნავს, ოჯახისთვის განსაკუთრებული მნიშვნელობა აქვს ინიციატივას - უნივერსიტეტში ჩამოყალიბდეს აკადემიკოს სერგი ჯიქიას სახელობის უნიკალური ფონდი, რომლის საფუძველსაც მისი პირადი სამეცნიერო ბიბლიოთეკა წარმოადგენს.„სერგი ჯიქია იყო არა მხოლოდ ქართული თურქოლოგიის ფუძემდებელი და საქართველოს მეცნიერებათა აკადემიის აკადემიკოსი, არამედ მეცნიერი, რომელმაც ქართული და თურქული აკადემიური სივრცეები ერთმანეთთან მჭიდროდ დააკავშირა. მისი მიერ მომზადებული და გამოცემული „გურჯისტანის ვილაიეთის დიდი დავთარი“ დღემდე ერთ-ერთ უმნიშვნელოვანეს წყაროდ რჩება საქართველოს ისტორიის, ოსმალური ადმინისტრაციული სისტემისა და კავკასიის ისტორიული პროცესების კვლევისთვის. მიმაჩნია, რომ აკადემიკოსის უნიკალური ბიბლიოთეკის უნივერსიტეტისთვის გადაცემა და მის საფუძველზე სპეციალური ფონდის შექმნა იქნება არა მხოლოდ მემორიალური, არამედ მკვეთრად პრაქტიკული და კვლევითი მნიშვნელობის მქონე ნაბიჯი. ამ ფონდის ფარგლებში „გურჯისტანის ვილაიეთის დიდი დავთრის“ რამდენიმე ფურცლის ჩვენება ხელს შეუწყობს სტუდენტებისა და მკვლევრების უშუალო კონტაქტს პირველწყაროებთან და გააძლიერებს ისტორიულ-დოკუმენტურ ცნობიერებას. განსაკუთრებით მნიშვნელოვანია, რომ ასეთი ფონდი უნივერსიტეტისთვის გახდება შინაარსობრივი პლატფორმა თურქ კოლეგებთან აკადემიური თანამშრომლობის გასაღრმავებლად. სერგი ჯიქიას ნაშრომები თურქოლოგიისა და ოსმალური კვლევების სფეროში დღესაც ავტორიტეტულ და საყრდენ წყაროდ მიიჩნევა, რაც ქმნის ბუნებრივ საფუძველს ერთობლივი კვლევების, პროექტებისა და სამეცნიერო დიალოგისთვის. ჩემთვის ეს ინიციატივა პირადი მნიშვნელობის მატარებელიცაა: მე ვარ აკადემიკოს სერგი ჯიქიას შვილიშვილი, რომელმაც სწავლა, აკადემიური ხარისხის დაცვა და შემდგომი სამეცნიერო საქმიანობა სწორედ ამ უნივერსიტეტში განახორციელა. უნიკალური ფონდის შექმნა ამ სივრცეში ჩემთვის სიმბოლურადაც და პროფესიულადაც ასახავს აკადემიური ტრადიციის, თაობებს შორის უწყვეტობისა და უნივერსიტეტის ღირებულებების თანხვედრას. ვფიქრობ, რომ აკადემიკოს სერგი ჯიქიას სახელობის ფონდი გახდება უნივერსიტეტის კვლევითი პოტენციალის გამაძლიერებელი, მისი აკადემიური იდენტობის მნიშვნელოვანი ნაწილი და საერთაშორისო სამეცნიერო თანამშრომლობისთვის ღირებული საყრდენი“, - აცხადებს ანა ჯიქია.

ბაჩო ახალაიას პასუხები კიდევ ერთი ცინიზმია მოსახლეობის მიმართ, მას ხალხის წინააღმდეგ არაერთი დანაშაული აქვს ჩადენილი და ეს ცნობილია კიდეც. იმედია, ის ამ ყველაფერზე პასუხს აგებს, – ამის შესახებ პარლამენტის განათლების კომიტეტის თავმჯდომარემ, მარიამ ლაშხმა განაცხადა.ლაშხის თქმით, მისი განცხადებები აბსურდულია და ხალხის დაცინვაა.„ვნახეთ, თუ როგორ იყო ჩართული ბაჩო ახალაია ქვეყნის დამხობის მცდელობებშიც. ამის არაერთი ფაქტი არსებობს. იმედია, სასამართლო მტკიცებულებების საფუძველზე შესაბამისს გადაწყვეტილებას გამოიტანს“, – განაცხადა ლაშხმა.

საქართველოს ტექნიკური უნივერსიტეტის ვიცე-რექტორმა, პროფესორმა, თამარ წერეთელმა და საქართველოს ავტოიმპორტიორთა და ავტომფლობელთა ასოციაციის თავმჯდომარე ლაშა დარბაისელმა თანამშრომლობის მემორანდუმს მოაწერეს ხელი. ამის შესახებ ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, უნივერსიტეტსა და ასოციაციას შორის თანამშრომლობის მიზანია სატრანსპორტო სისტემებისა და მექანიკის ინჟინერიის ფაკულტეტის სტუდენტთა პროფესიული განვითარების ხელშეწყობა, მათი თეორიული ცოდნის პრაქტიკულ გამოცდილებასთან დაკავშირება და შრომის ბაზრის მოთხოვნებთან შესაბამისობის უზრუნველყოფა.თანამშრომლობა ითვალისწინებს სტუდენტებისთვის სტაჟირებისა და საწარმოო პრაქტიკის ორგანიზებას, თანამედროვე ავტოინდუსტრიის მოთხოვნებზე მორგებული უნარ-ჩვევების განვითარებას და რეალურ სამუშაო გარემოში ჩართულობას.მემორანდუმის ფარგლებში ასევე დაგეგმილია საკადრო პოტენციალის გაძლიერება, კვალიფიციური კადრების მომზადება და მათი დასაქმების ხელშეწყობა ასოციაციის წევრ კომპანიებში.მხარეები ერთობლივად იმუშავებენ საგანმანათლებლო და პრაქტიკული პროგრამების განვითარებაზე, რაც ხელს შეუწყობს ახალგაზრდა სპეციალისტების პროფესიულ ჩამოყალიბებას და კონკურენტუნარიანობის ზრდას შრომის ბაზარზე.სტუ-ის ვიცე-რექტორის განცხადებით, მხარეები დეკლარირებენ ერთობლივ საქმიანობას, რომელიც ორიენტირებულია, რომ მომავალმა ინჟინრებმა და პროფესიონალებმა ავტო და ტექნოლოგიურ სექტორებში ინოვაციური, თანამედროვე სტანდარტების შესაბამისი განათლება და პრაქტიკული გამოცდილება შეიძინონ.როგორც პროფესორი თამარ წერეთელი აღნიშნავს, დასაქმების მხარდაჭერის გარდა, შეთანხმება შესაძლებელს ხდის სტუდენტებმა სტაჟირება რეალურ ბიზნესგარემოში გაიარონ და მიიღონ პრაქტიკული გამოცდილება, რაც მნიშვნელოვნად აუმჯობესებს მათ კონკურენტუნარიანობას ადგილობრივ თუ საერთაშორისო ბაზარზე.„მნიშვნელოვანია სტუდენტების პროფესიული მომზადება ისეთ სტანდარტებთან შესაბამისობაში, რომლებიც პასუხობს თანამედროვე ავტოიმპორტისა და სატრანსპორტო ინდუსტრიის სწრაფად ცვალებად მოთხოვნებს. მიმდინარე თანამშრომლობა საქართველოს ავტოიმპორტიორთა და ავტომფლობელთა ასოციაციასთან არის სტრატეგიული მნიშვნელობის ინიციატივა, რომელიც მიზნად ისახავს როგორც თეორიული ცოდნის პრაქტიკულ გამოცდილებასთან შერწყმას, ასევე სტუდენტთა უნარ-ჩვევების განვითარებას, მათი პროფესიული კომპეტენციის გაძლიერებასა და სამუშაო ბაზარზე კონკურენტუნარიანობის გაძლიერებას.მემორანდუმის ფარგლებში გათვალისწინებულია სტაჟირების პროგრამების და პრაქტიკული კომპონენტის გააქტიურება, რაც საშუალებას მისცემს სტუდენტებს ქმედითად ჩაერთონ თანამედროვე ტექნოლოგიურ და საინჟინრო პროცესებში, მიიღონ გამოცდილება რეალურ საწარმო გარემოსა და დროში დაეუფლონ პრაქტიკულ უნარ-ჩვევებს, რაც აუცილებელია მათი პროფესიული ზრდისთვის. მსგავსი თანამშრომლობა ხელს უწყობს კვალიფიციური კადრების ჩამოყალიბებას, რომლებიც მომავალში მნიშვნელოვანი როლს შეასრულებენ ქვეყნის სატრანსპორტო, საინჟინრო და ტექნოლოგიურ სექტორებში. ჩვენ ვხედავთ ამ პროცესს როგორც მრავალწახნაგოვან სტრატეგიულ პარტნიორობას, რომელიც გაძლიერდება ერთობლივი პრაქტიკული პროექტებით, კვლევებით და პროფესიული აქტივობებით“, - აცხადებს თამარ წერეთელი.სტუ-ის ინფორმაციით, მხარეები შეთანხმდნენ, რომ ერთობლივი ძალისხმევით მოაწყობენ ტრენინგებს, სამუშაო შეხვედრებსა და სემინარებს. უნივერსიტეტი უზრუნველყოფს ასოციაციის მიერ მოწოდებული ინფორმაციის გავრცელებას სტუდენტთა შორის და მხარს დაუჭერს სხვადასხვა საგანმანათლებლო ღონისძიების ჩატარებას საუნივერსიტეტო სივრცეში.გარდა ამისა, მემორანდუმის ფარგლებში სტუდენტებს საშუალება ექნებათ მიიღონ ინფორმაცია ბაზარზე არსებული აქტუალური ვაკანსიებისა და კარიერული განვითარების პროგრამების შესახებ, ჰქონდეთ პირდაპირი კომუნიკაცია პოტენციურ დამსაქმებელთან და გაიარონ კონსულტაციები, განივითარონ პრაქტიკული უნარ-ჩვევები, რაც შრომის ბაზარზე მათ კონკურენტუნარიანობას გაზრდის.