ეუთო-ს საპარლამენტო ასამბლეის პრეზიდენტის, ასეთი მაღალი დონის სტუმრის ჩამოსვლა ყველასთვის სასიხარულო უნდა იყოს. როგორც ვხედავთ, ეს ისტერიკას იწვევს გარკვეულ პოლიტიკურ საზოგადოებაში, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
ვოლსკიმ შეაფასა ოპოზიციაში გაკეთებული განცახდებები ევროპარლამენტარ რიჰარდ კოლსის სოციალურ ქსელში გავრცელებულ ინფორმაციასთან დაკავშირებით, რომლის მიხედვითაც, ეუთო-ს საპარლამენტო ასამბლეის პრეზიდენტი 8-10 იანვარს საქართველოში დელეგაციის ვიზიტს გეგმავს.
„ვიზიტი თავისთავად მნიშვნელოვანია, რადგან ერთია, რა ინფორმაცია მოგდის, რა ინფორმაციას უყურებ ყოველდღე, როგორი პროპაგანდისტული მანქანა მუშაობს, რათა დაამკვიდროს გარკვეული აზრი, შეხედულებები, თუნდაც აღქმები იმასთან დაკავშირებით, რას წარმოადგენს საგარეო პოლიტიკა საქართველოში ან როგორ ჩატარდა, რა პრეტენზიები შეიძლება არსებობდეს არჩევნების შედეგებთან მიმართებით, მაგრამ მეორეა, როდესაც ადგილზე ჩადიხარ, ვითარებას ეცნობი და ამასთან დაკავშირებით ყველა მხარეს ელაპარაკები. რასაკვირველია, ისტერიკას წარმოშობს, როდესაც, მაგალითად, ეუთო-ს ან ოდირის ხელმძღვანელობა აკეთებს განცხადებას, რომელიც არ შეესაბამება სტრატეგიას, რომელსაც რევოლუციური გეგმა ჰქვია. ასეთი უპრეცედენტო ზეწოლა როცა ხორციელდება, კოორდინირებული, ორკესტრირებული შეტევა ხდება, არის შემთხვევა, რომელსაც შეიძლება საგანგებო გამოწვევა ვუწოდოთ არა მარტო ჩვენი ხელისუფლებისთვის, არამედ ქართული საზოგადოებისთვის, სახელმწიფოსთვის, საქართველოს დამოუკიდებლობისათვის. ვიდრე მსოფლიოში არ გადალაგდება პოლიტიკური კონიუნქტურა, არ დაიწყება ახალი პროცესები, მოლაპარაკებების, კონსტრუქციული თანამშრომლობის დღის წესრიგი არ ექნება მსოფლიოს, იქამდე აუცილებელია, ქვეყანამ როგორმე მოახერხოს გადარჩენა ამ უპრეცედენტო ზეწოლის პირობებში.
ამ დონის საერთაშორისო სტუმრის ჩამოსვლა, რასაკვირველია, ოპოზიციის რიგებში განიხილება, როგორც გარკვეული აღიარება იმ არჩევნების შედეგების, იმ ხელისუფლების, რომელიც დღეს საქართველოს ჰყავს აბსოლუტურად ლეგიტიმური არჩევნების შემდეგ. ასეთი მაღალი დონის სტუმრის ჩამოსვლა ყველასთვის სასიხარულო უნდა იყოს და, როგორც ვხედავთ, ეს ისტერიკას იწვევს გარკვეულ პოლიტიკურ საზოგადოებაში“, – განაცხადა გია ვოლსკიმ.