ორშაბათი, იანვარი 27, 2025

VIDEO:„აღმოვაჩინე, რომ მის ნახატებს არ ჰქონდა ცალი თვალი… ზუსტად ასეთი იყო მიცვალებული…“ – 2 ადამიანის მკვლელობაში ბრალდებულის განაჩენს 12 მსაჯული გადაწყვეტს

2 ადამიანის მკვლელობაში ბრალდებული 44 წლის კაცის ბედი 12 მსაჯულის ხელშია – საუბარია იური კალანდარიშვილის საქმეზე, რომელმაც სანადირო თოფით 2 ახალგაზრდა კაცი, უახლოესი მეგობრები, ბაჩო ბაშარული და ნიკო არჩვაძე მოკლა.

ბრალდებული ამტკიცებს, რომ მეზობელი და მისი თანმხლები თავს დაესხნენ და მოიგერია. ადვოკატი კი, ნაფიც მსაჯულებს უმტკიცებდა, რომ წლების წინ, მეზობლებს შორის დაწყებული დავის ინიციატორი, მოკლული ბაჩო იყო. სადარბაზოში მისი რემონტის ნარჩენებმა იური კალანდარიშვილი შეაწუხა, რასაც მეზობლის ცინიკური პასუხი მოჰყვა. შემდეგ კი, ბრალდებულის კარზე შეურაცხმყოფელი მინაწერებიც გაჩნდა, იური კალანდარიშვილს კარის მეზობლის სახლში ხმაური და შეკრებებიც აღიზიანებდა. ადვოკატი ამტკიცებს, რომ ამ ყველაფრიდან გამომდინარე, ბრალდებულმა საკუთარ კარზე კამერა უსაფრთხოებისთვის დააყენა, რამაც მეზობელი კიდევ უფრო გააღიზიანა და კამერის მიმართულებით, უსიამოვნო ჟესტების ჩვენება დაიწყო.

გასული წლის 5 ივნისს – 37 და 38 წლის განუყრელი მეგობრების სიცოცხლის ბოლო დღე. ბაჩო სახლიდან, ნიკო კი ასურეთიდან მეგობრის დაბადების დღეზე წავიდა. რესტორნიდან ნასვამები დაბრუნდნენ. ვარკეთილში, ბაჩო ბაშარულის სახლში დარჩენას გეგმავდნენ. კადრებში, რომელიც “კურიერი P.S- მა” რამდენიმე თვის წინ მოიპოვა, მათი სიცოცხლის ბოლო წუთები ჩანს.

საქმის პროკურორმა მსაჯულებს საბედისწერო ღამეზე უამბო. მთავარი მტკიცებულება ბრალდებულის კარზე დამონტაჟებულმა კამერამ გადაიღო. ჩანაწერს ხმა არ აქვს.

თავდასხმის მოგერიება თუ განზრახ მკვლელობა – ეს ნაფიცმა მსაჯულებმა უნდა შეაფასონ. მათ მოუწევთ იმის გაანალიზებაც – ცდილობს თუ არა იური კალანდარიშვილი მკვლელობის შემდეგ თავდასხმის ინსცენირებას.

გამოძიებით დადგინდა, რომ ბრალდებულმა 112-ს ნახევარ საათში დაურეკა, მაშინ, როცა ბაჩო ბაშარული და ნიკო არჩვაძე, სავარაუდოდ, უკვე გარდაცვლილები იყვნენ.

რატომ არ მიმართა იური კალანდარიშვილმა 112-ს თუ თავდასხმის საფრთხეს გრძნობდა, რატომ გააღო კარი ნაჭერში შეხვეული რეზინის ჩაქუჩით ხელში – კითხვები მის ადვოკატს დავუსვით.

დედამ შვილი მკვლელობის წინა დღეს უკანასკნელად ნახა. დაზარალებულმა სასამართლოში ბრალდებულის უმკაცრესად დასჯა მოითხოვა. გაიხსენა მისი შვილი და მკვლელობაში ბრალდებულთან პირველი დაპირისპირება. განმარტა, რომ სადარბაზოში დაწყობილი ხის მასალა ბაჩოს და ნიკოს ასურეთში, მშენებარე ფერმაში უნდა წაეღოთ.

შვილმკვდარი დედა ადვოკატების განცხადებასაც გამოეხმაურა. თქვა, რომ ბაჩო მარიხუანას და ალკოჰოლს იშვიათად მოიხმარდა, თუმცა ეს კონფლიქტის მიზეზი არასდროს გამხდარა.

ემოციური იყო სხდომაზე ნიკო არჩვაძის ახალგაზრდა მეუღლის ჩვენებაც.

საპირისპირო მიზანი აქვს ბრალდებულს – დაამტკიცოს, რომ 2 კაცი მოგერიების დროს მოკლა. სხდომები მტკიცებულებების გამოკვლევით, რამდენიმე კვირის განმავლობაში გაგრძელდება, შემდეგ იქნება ვერდიქტი.
ვრცლად ↓

ქეთევან ნინუაhttp://tiflisnews.ge
საინფორმაციო სააგენტო tiflisnews.ge კონტაქტი- ☎️ 557 13 16 73

თუ მოლაპარაკებები ზაფხულამდე არ დაიწყება, უკრაინას განადგურება ემუქრება – უკრაინის დაზვერვა

თუ რუსეთთან სერიოზული მოლაპარაკებები ცეცხლის შეწყვეტის შესახებ ზაფხულამდე არ დაიწყება, ისეთი პროცესები იჩენს თავს, რომელიც უკრაინის არსებობას შეუქმნის საფრთხეს, - განაცხადა უკრაინის თავდაცვის სამინისტროს დაზვერვის მთავარი სამმართველოს ხელმძღვანელმა კირილ ბუდანოვმა. როგორც უკრაინული მედია იუწყება, ბუდანოვმა ეს განცხადება უკრაინის უმაღლეს რადაში დეპუტატებთან დახურული შეხვედრის დროს გააკეთა. „გენშტაბის წარმომადგენლები თავიდან ძალიან ჩახლართულად, მაგრამ საინტერესოდ ჰყვებოდნენ. შემდეგ იყო სხვადასხვა ანგარიშები. მაგრამ ყველაზე მეტად ბუდანოვის პასუხი დაგვამახსოვრდა. ვიღაცამ მას ჰკითხა, რამდენი დრო გვაქვს. და კირილმა ცივი ღიმილით თქვა: „თუ ზაფხულამდე სერიოზული მოლაპარაკებები არ იქნება, შემდეგ, შესაძლოა, უკრაინის არსებობისთვის ძალიან სახიფათო პროცესები წარიმართოს“, - განუცხადა მედიას წყარომ.

„ესტონეთი თუ ნებისმიერი სხვა, რომელიც სხვა სახელმწიფოს პოლიტიკაში უხეშად ჩარევას კადრულობს, მსოფლიო დღის წესრიგს უპირისპირდება“ – გურამ მაჭარაშვილი

ბრიუსელში მიმდინარე სხდომას, სადაც საქართველოში მიმდინარე მოვლენებსაც განიხილავენ, "ხალხის ძალის" წევრი, გურამ მაჭარაშვილი გამოეხმაურა. მისი შეფასებით, სხდომაზე უვიზო რეჟიმის შეჩერების ინიციირებით, ესტონეთი სხვა სახელმწიფოს პოლიტიკაში უხეშად ერევა. "ესტონეთი იქნება ეს თუ ნებისმიერი სხვა სახელმწიფო, რომელიც იმას კადრულობს, რომ სხვა სახელმწიფოს პოლიტიკაში უხეშად ერევა, ეს ნიშნავს ზუსტად იმას, რომ მსოფლიო დღის წესრიგს უპირისპირდება. ესტონეთს შევეკითხოთ, როგორი დამოკიდებულება აქვთ ლგბტ თემთან და ტრანსგენდერებთან დაკავშირებით, სხვა ქვეყნის პოლიტიკაში ჩაურევლობასთან დაკავშირებით - ეწინააღმდეგა ტრამპის პოლიტიკას ესტონეთი? მაშინ გამოვიდეს და თქვას," - აცხადებს გურამ მაჭარაშვილი.

ირაკლი ფავლენიშვილი: “ნაცმოძრაობის” წევრები უარს ამბობენ ქონებრივი დეკლარაციის შევსებაზე – ჩვენ არ ვართ არანაირი პარლამენტის წევრები და არც მომავალში ვიქნებით

 „ერთიანობა ნაციონალური მოძრაობის“ წევრები უარს ამბობენ ქონებრივი დეკლარაციის შევსებაზე, რადგან პარტიის წევრების გადაწყვეტილებით პარლამენტის წევრის სტატუსით ისინი არ აპირებენ ამ დეკლარაციის შევსებას, რადგან არ წარმოადგენენ არალეგიტიმურ პარლამენტს.“ - ამის შესახებ "ნაციონალური მოძრაობის" წარმომადგენელმა ირაკლი ფავლენიშვილმა განაცხადა. “ანტიკორუფციულმა ბიურომ მოგვმართა „ერთიანობა ნაციონალურ მოძრაობას“, რომ წარგვედგინა ჩვენი ქონებრივი დეკლარაცია, როგორც ე.წ. პარლამენტს წევრებს. ჩვენ არაერთხელ გაგვიცხადებია, რომ არანაირი მონაწილეობის მიღებას არ ვაპირებდით და არც მომავალში  არ ვაპირებთ ე.წ. პარლამენტში მუშაობას, რომელიც არ წარმოადგენს ქართველი ხალხის ნებას. ის ღალატობს კონსტიტუციურ პრინციპებს, საქართველოს ეროვნულ ინტერესებს. ჩვენ არასოდეს წინააღმდეგი არ ვყოფილვართ, რომ გამჭვირვალე ყოფილიყო ჩვენი ქონებრივი დეკლარაცია, მაგრამ ამას გავაკეთებთ ნებისმიერ სხვა ფორმატში, რადგან ჩვენ არ ვართ არანაირი ნიშნით ე.წ. პარლამენტის წევრები და არც მომავალში ვიქნებით.“ - განაცხადა ირაკლი ფავლენიშვილმა.

საზავო შეთნხმების მიხედვით, ათასობით პალესტინელმა ღაზის სექტორის ჩრდილოეთ ნაწილში დაბრუნება დაიწყო

საზავო შეთნხმების მიხედვით, ათასობით პალესტინელმა ღაზის სექტორის ჩრდილოეთ ნაწილში დაბრუნება დაიწყო. მანამდე განცხადება გაავრცელა ისრაელის თავდაცვის ძალებმა, რომლის თანახმად, ღაზის მცხოვრებლებს შეუძლიათ დაბრუნება ნეტზარიმის დერეფნით 07:00 საათიდან. ღაზის სექტორის მცხოვრებლებს უფლება აქვთ, დაბრუნდნენ ფეხით ნეტზარიმის გზით და რაშიდის ქუჩით. სატრანსპორტო საშუალებების გავლა აღმოსავლეთით, სალაჰ ა-დინის ქუჩაზე, უსაფრთხოების შემოწმების შემდეგ, 09:00 საათიდან არის დაშვებული. ისრაელის არმიამ ასევე გასცა მთელი რიგი გაფრთხილებები ღაზის მოსახლეობისთვის, მათ შორის: არ გადაიყვანონ ტერორისტული ელემენტები ან არ გადაიტანონ იარაღი ჩრდილოეთ ღაზაში; არ მიუახლოვდნენ ისრაელის თავდაცვის ძალების პოზიციებს და ჯარებს ღაზაში ან ისრაელის ტერიტორიაზე; არ მიუახლოვდნენ რაფაჰის გადასასვლელს და ფილადელფის დერეფნის ტერიტორიას სამხრეთ ღაზაში და არ იბანაონ, არ ჩაყვინთონ ან არ ითევზაონ ხმელთაშუა ზღვაში უახლოეს დღეებში.

ირაკლი კობახიძე არაბთა გაერთიანებული საამიროების პრეზიდენტს შეხვდა

საქართველოს პრემიერ-მინისტრი ირაკლი კობახიძე არაბთა გაერთიანებული საამიროების პრეზიდენტს, შეიხ მოჰამედ ბინ ზაიედ ალ ნაჰიანს შეხვდა. საქართველოს მთავრობის მეთაურს, დელეგაციასთან ერთად, არაბთა გაერთიანებული საამიროების პრეზიდენტმა რეზიდენციაში უმასპინძლა. შეხვედრაზე საუბარი შეეხო ორმხრივი თანამშრომლობის სხვადასხვა მიმართულებას და საინვესტიციო და ეკონომიკური კავშირების გაღრმავების პოზიტიურ დინამიკას. პრემიერ-მინისტრმა აღნიშნა, რომ საქართველოს მთავრობა მიესალმება არაბთა გაერთიანებული საამიროებიდან განხორციელებულ ინვესტიციებს და უმსხვილესი დეველოპერული, ლოგისტიკური კომპანიების ინტერესს საქართველოში ინვესტირების კუთხით. ამ კონტექსტში აღინიშნა აბუ დაბის პორტების ჯგუფის მსხვილი ინვესტიცია თბილისის მშრალი პორტის პროექტში, რომლის ოფიციალური გახსნა 2025 წელს იგეგმება, ასევე, უმსხვილეს დეველოპერულ კომპანია EMAAR-თან მოლაპარაკებების წარმატებით დასრულება, რომლის შედეგად, საქართველოში მრავალმილიარდიანი ინვესტიცია განხორციელდება. საქართველოს მთავრობამ გამოთქვა ინტერესი, გაგრძელდეს მოლაპარაკებები აბუ დაბის სახელმწიფო საინვესტიციო კომპანიასთან სტრატეგიული ლოგისტიკური-სატრანსპორტო პროექტების მიმართულებით თანამშრომლობის შემდგომი გაფართოების მიზნით. შეხვედრისას ასევე ყურადღება დაეთმო რეგიონში არსებულ გამოწვევებს და სტაბილურობის განსაკუთრებულ მნიშვნელობას. საქართველოს პრემიერ-მინისტრმა არაბთა გაერთიანებული საამიროების პრეზიდენტი ოფიციალური ვიზიტით საქართველოში მოიწვია. ინფორმაციას მთავრობის ადმინისტრაციის პრესსამსახური ავრცელებს.

ბოლო სიახლეები