სამშაბათი, იანვარი 14, 2025

საქართველოს ტექნიკური უნივერსიტეტის პროფესორი კაიროს უნივერსიტეტში UNESCO-UIA-ს არქიტექტურული პროგრამების ვალიდაციის საბჭოს სააკრედიტაციო კომისიის მუშაობაში მონაწილეობდა

საქართველოს ტექნიკური უნივერსიტეტის დიზაინის საერთაშორისო სკოლის დეკანის მოადგილემ და არქიტექტორთა საერთაშორისო კავშირის (UNESCO-UIA) არქიტექტურული პროგრამების ვალიდაციის საბჭოს წევრმა, პროფესორმა გოჩა მიქიაშვილმა კაიროს (ეგვიპტე) უნივერსიტეტის არქიტექტურული ინჟინერიის და ტექნოლოგიების პროგრამის სააკრედიტაციო შეფასების პროცესში მიიღო მონაწილეობა. ამის შესახებ ინფორმაციას სტუ ავრცელებს.

მისივე ცნობით, ხუთწევრიანმა კომისიამ, რომლის შემადგენლობაში, სტუ-ის პროფესორთან ერთად არიან ბრიტანელ არქიტექტორთა სამეფო ინსტიტუტის (RIBA) და აფრიკის კონტინენტზე UIA-ის რეგიონული წარმომადგენლები, საფუძვლიანად შეისწავლა კაიროს უნივერსიტეტიდან წინასწარ მიღებული სააკრედიტაციო დოკუმენტაცია და სტუდენტთა პორტფოლიოები და დაადგინა სააკრედიტაციოდ წარმოდგენილი პროგრამის სწავლის შედეგების სრული შესაბამისობა UIA-ს არქიტექტურული განათლების ქარტიის მოთხოვნებთან და მას 5 წლიანი უპირობო ვალიდაცია მიანიჭა.

სტუ-ის ვიცე-რექტორის, პროფესორ თამარ წერეთლის თქმით, დიზაინის საერთაშორისო სკოლის (IDS) დეკანის მოადგილის, პროფესორ გოჩა მიქიაშვილის მონაწილეობა UNESCO-UIA-ის ვალიდაციის კომისიის საქმიანობაში, მნიშვნელოვანია ინტერნაციონალიზაციის ხელშეწყობისა და გლობალური ურთიერთობების გაფართოების თვალსაზრისით.

„უმაღლესი საგანმანათლებლო დაწესებულებების ასეთი თანამშრომლობა და ინსტიტუციურ აქტივობებში ჩართვა აძლიერებს როგორც ფაკულტეტის, ისე უნივერსიტეტის რეპუტაციას და აკადემიურ პარტნიორობას, ამავდროულად ხელს უწყობს განათლების განვითარების, ხარისხის უზრუნველყოფისა და კულტურული გაცვლის უფრო ფართო მიზნებს. უპირველეს ყოვლისა, UNESCO-UIA-ს ეგიდით საერთაშორისო აკრედიტაციის კომისიებში აქტიური ჩართულობა აძლიერებს მასში მონაწილე ინსტიტუტების ხილვადობას და პრესტიჟს. საქართველოს ტექნიკური უნივერსიტეტი თავისი პროგრამების გლობალურ სტანდარტებთან შესაბამისობაში მოყვანით და მაღალი ხარისხის აკადემიური პრაქტიკისადმი ერთგულების დადასტურებით, საერთაშორისო ასპარეზზე ცდილობს აღიარებული იყოს არქიტექტურული განათლების საზოგადოების აქტიურ მოთამაშედ. ასეთი ურთიერთქმედება ნიშანს აძლევს ამჟამინდელ და მომავალ სტუდენტებს, ისევე როგორც პროფესორებსა და სხვა დაინტერესებულ მხარეებს, რომ უნივერსიტეტი ესწრაფვის დაადაროს თავისი საგანმანათლებლო შეთავაზებები საერთაშორისოდ აღიარებულ სტანდარტებს. ხარისხისადმი ამ ერთგულებამ შეიძლება გააძლიეროს სტუდენტების მოზიდვის მცდელობები და გაზარდოს ჩვენი, როგორც სასურველი აკადემიური პარტნიორის მიმზიდველობა. მეტიც, ასეთ მისიებში მონაწილეობა ხელს უწყობს აკადემიურ სივრცეში პარტნიორობის განვითარებას. აკრედიტაციის პროცესში ექსპერტთა მრავალმხრივ კომისიებთან და სხვა პრესტიჟული ინსტიტუტების წარმომადგენლებთან თანამშრომლობით საქართველოს ტექნიკურ უნივერსიტეტს შეუძლია ჩამოაყალიბოს მნიშვნელოვანი ურთიერთობები, რომლებიც გზას გაუხსნის ერთობლივი კვლევის ინიციატივებს, თანამშრომელთა გაცვლას და ერთობლივი საგანმანათლებლო პროგრამების განხორციელებას. ეს პარტნიორობა ხელს შეუწყობს კულტურათაშორისი სწავლების გამოცდილების გაზიარებას და სწავლების ინოვაციური მეთოდოლოგიების დანერგვას. ასეთი მცდელობები ქმნის ურთიერთდაკავშირებულ საგანმანათლებლო ლანდშაფტს, სადაც პროფესორ-მასწავლებლები და სტუდენტები ერთნაირად სარგებლობენ გლობალური იდეებისა და პრაქტიკის მდიდარი სპექტრით“, – აცხადებს თამარ წერეთელი.

სტუ-ის დიზაინის საერთაშორისო სკოლის დეკანის მოადგილის თქმით, აკრედიტაციის პროცესი მოიცავდა ყოვლისმომცველ დისკუსიებს სასწავლო გეგმის შემუშავების, სწავლების სტრატეგიებისა და შეფასების მეთოდების ირგვლივ, რამაც სააკრედიტაციო კომისიის წევრებს მიაწოდა ღირებულ ინფორმაცია უახლესი საგანმანათლებლო მოდელებისა და არქიტექტურული განათლების განვითარებადი ტენდენციების შესახებ.

„ცოდნის გაცვლა ამდიდრებს ჩვენს სასწავლო გეგმას, რაც უზრუნველყოფს მისი აქტუალურობის და კონკურენტუნარიანობის შენარჩუნებას. საუკეთესო საერთაშორისო პრაქტიკის გაცნობა ასევე ხელს უწყობს უფრო მოქნილი და გლობალურად აღიარებული ჩარჩოების მიღებას, რაც ხელს უწყობს სტუდენტებისა და პროფესორ-მასწავლებლების მობილობის პროცესს ინსტიტუტებს შორის. გარდა ამისა, საერთაშორისო აკრედიტაციის კომისიაში მონაწილეობა ხაზს უსვამს საქართველოს ტექნიკური უნივერსიტეტის სტრატეგიულ როლს კულტურათაშორისი დიალოგისა და აკადემიური სრულყოფის ხელშეწყობაში. UNESCO-UIA-ს ვალიდაციის კომისიის საქმიანობაში მონაწილეობა უზრუნველყოფს სტუ-ის არქიტექტურული პროგრამების უნიკალური ძლიერი მხარეების წარმოჩენას. დისკუსიებში ჩართვით, რომლებიც განიხილავდნენ კაიროს უნივერსიტეტის არქიტექტურული პროგრამის შესაბამისობას გლობალურ სტანდარტებთან, შესაძლებლობა მომეცა გამეზიარებინა საკუთარი შეხედულებები იმის შესახებ, თუ როგორ შეესაბამება ან აღემატება სტუ-ის არქიტექტურული პროგრამები სტანდარტებს. მსგავსი ჩართულობა უზრუნველყოფს უფრო მყარ საერთაშორისო პარტნიორობას, აძლიერებს ჩვენი უმაღლესი საგანმანათლებლო დაწესებულების აკადემიურ რეპუტაციას, ხელს უწყობს საუკეთესო გლობალური პრაქტიკის ათვისებას და საერთაშორისო აკადემიური ურთიერთობების გაფართოებას“, – აცხადებს გოჩა მიქიაშვილი.

ქეთევან ნინუაhttp://tiflisnews.ge
საინფორმაციო სააგენტო tiflisnews.ge კონტაქტი- ☎️ 557 13 16 73

ვოლოდიმირ ზელენსკი ჩრდილოეთ კორეელი სამხედროების დაკითხვის ვიდეოს აქვეყნებს და აცხადებს, რომ უკრაინა მზადაა, ისინი სამშობლოში დააბრუნოს რუსეთში მყოფი უკრაინელი ტყვეების სანაცვლოდ

უკრაინის პრეზიდენტი ვოლოდიმირ ზელენსკი სოციალურ ქსელში ჩრდილოეთ კორეელი სამხედროების დაკითხვის ვიდეოს აქვეყნებს, რომლებიც კურსკის ოლქში ტყვედ აიყვანეს. ზელენსკის განცხადებით, უკრაინა მზადაა, ისინი სამშობლოში დააბრუნოს რუსეთში მყოფი უკრაინელი ტყვეების სანაცვლოდ. „მხოლოდ დროის საკითხია, როდის მოახერხებენ ჩვენი ბიჭები კიდევ სხვების დაკავებას. მსოფლიოში არავინ უნდა ეჭვობდეს, რომ რუსეთის არმია ჩრდილოეთ კორეის სამხედრო დახმარებაზეა დამოკიდებული. პუტინმა სამი წლის წინ ნატო-სთვის ულტიმატუმებით და ისტორიის გადაწერის მცდელობით დაიწყო, ახლა კი ფხენიანის სამხედრო დახმარების გარეშე ვერ ძლებს. უკრაინა მზადაა, კიმ ჩენ ინს მისი ხალხი დაუბრუნოს, თუ ის შეძლებს მათ გაცვლას ჩვენს მეომრებში, რომლებიც რუსეთში ტყვეობაში იმყოფებიან“, – აღნიშნა უკრაინის პრეზიდენტმა. გავრცელებულ ვიდეოში ერთ-ერთი ტყვე უარის ნიშნად თავს აქნევს კითხვაზე, იცოდა თუ არა, რომ უკრაინის წინააღმდეგ იბრძოდა. თარჯიმნის თქმით, ტყვეს ეუბნებოდნენ, რომ უბრალოდ წვრთნებზე მიდიოდა. „თუ დაბრუნება მოუწევს, დაბრუნდება. თუ აქ დარჩენის შანსს მისცემენ, დარჩება“, – გადმოსცემს თარჯიმანი. ამასთან, მეორე ჩრდილოკორეელმა ტყვემ თანხმობის ნიშნად დააქნია თავი კითხვაზე, სურს თუ არა ჩრდილოეთ კორეაში დაბრუნება. მოგვიანებით მიმართვაში ზელენსკიმ განაცხადა, რომ ერთმა ტყვემ უკრაინაში დარჩენის სურვილი გამოთქვა, მეორემ – ჩრდილოეთ კორეაში დაბრუნების.

ლოს ანჯელესის ადგილობრივ ხელისუფლებაში აცხადებენ, რომ მზად არიან მოსალოდნელი ძლიერი ქარისთვის, რამაც შესაძლოა, ტყის ხანძრები გააძლიეროს

ლოს ანჯელესში მეხანძრეები ცეცხლის ჩასაქრობად მუშაობას განაგრძობენ. როგორც მედია წერს, ისინი ნელ-ნელა ახერხებენ ხანძრის ლოკალიზებას, თუმცა ძლიერი ქარი კვლავ საფრთხეს უქმნის სან ფერნანდოს ხეობის მჭიდროდ დასახლებულ თემებს. ლოს ანჯელესის ადგილობრივ ხელისუფლებაში აცხადებენ, რომ მომავალი კვირისთვის მოსალოდნელი ძლიერი ქარის ახალი ტალღისთვის მზად არიან, რამაც შესაძლოა, რეგიონში ტყის ხანძრები კიდევ უფრო გააძლიეროს. სახანძრო სამსახურში ამბობენ, რომ წყლის სისტემა მზად არის ხანძრის დამატებითი კერების ჩასაქრობად. გასულ კვირას აშშ-ის სიდიდით მეორე ქალაქში ერთდროულად გაჩენილი ექვსი ხანძრის შედეგად, ამ დროისთვის, სულ მცირე, 16 ადამიანია დაღუოული. დაკარგულად ითვლება, სულ მცირე, კიდევ 16 პირი. ადგილობრივი ოფიციალური პირები განმარტავენ, რომ საბძებრო სამუშაოების გაგრძელებასთან ერთად, დაღუპულთა რიცხვი სავარაუდოდ კიდევ გაიზრდება. სახანძრო სამსახურის ინფორმაციით, ცეცხლმა 12 000 შენობა-ნაგებობა დააზიანა ან გაანადგურა.

მოსამართლეებმა რესტორან „ბაბილოს“ ტერიტორია სამართალდამცველების დახმარებით დატოვეს, ადგილზე რჩებიან აქციის მონაწილეები

მოსამართლეებმა რესტორან „ბაბილოს“ ტერიტორია დატოვეს. ადგილზე მყოფმა სამართალდამცველებმა აქციის მონაწილეები რესტორნის პერიმეტრიდან გარკვეული მანძილით გადასწიეს და ერთგვარი კორიდორი შექმნეს, რის შემდეგაც რესტორანში მყოფმა მოსამართლეეებმა ტერიტორიის დატოვება შეძლეს. რაც შეეხება აქციის მონაწილეებს, ისინი ამ დრომდე რჩებიან „ბაბილოს“ მიმდებარე ტერიტორიაზე. მანამდე ადგილზე ვითარება რამდენჯერმე დაიძაბა, რის შედეგადაც სამართალდამცველებმა ადგილიდან კიდევ რამდენიმე ადამიანი გაიყვანეს. ჯერჯერობით უცნობია, ისინი დააკავეს თუ ტერიტორიას გაარიდეს. რესტორან „ბაბილოსთან“, სადაც, არსებული ინფორმაციით, მოსამართლეების კორპორატიული წვეულება მიმდინარეობდა, აქციის მონაწილეები რამდენიმე საათის წინ შეიკრიბნენ. ისინი რესტორანში მისულ მოსამართლეებს შეძახილებით დახვდნენ. დაპირისპირება მოხდა მას შემდეგაც, რაც რამდენიმე მოსამართლემ რესტორანი დატოვა. აქციის მონაწილეებმა ისინი შეძახილებით გააცილეს, ასევე კვერცხები დაუშინეს. ადგილზე მომხდარი სიტყვიერი დაპირისპირებისა და ფიზიკური შეხლა-შემოხლის შედეგად, სამართალდამცველებმა რამდენიმე პირი ადმინისტრაციული წესით დააკავეს.

VIDEO: ვრცელდება გოგა მანიას უახლესი წინასწარმეტყველება

ვრცელდება ეზოტერიკოს გოგა მანიას უახლესი წინასწარმეტყველება, რომელიც 12 იანვრით თარიღდება. ვრცლად ↓

ვოლოდიმირ ზელენსკი – ჩვენ შევთავაზეთ დახმარება სლოვაკეთის ხალხს რუსეთიდან გაზის ტრანზიტის შეწყვეტასთან ადაპტაციის პერიოდში, მაგრამ ფიცომ ქედმაღლურად უარი განაცხად

უკრაინის პრეზიდენტმა, ვოლოდიმირ ზელენსკიმ სლოვაკეთის პრემიერ-მინისტრის, რობერტ ფიცოს კრიტიკულ განცხადებებს უპასუხა და აღნიშნა, რომ მან უარი განაცხადა კიევის მიერ შეთავაზებულ დახმარებაზე რუსული გაზის მიწოდების შეწყვეტის შედეგების შესამსუბუქებლად. „კარგია, რომ სლოვაკეთის პრემიერ-მინისტრი ფიცო უკვე დაბრუნდა ვიეტნამის ძვირადღირებული სასტუმროდან და ბრატისლავაში იმყოფება. პირადად მისთვის ეს რთული უნდა იყოს – ფუფუნებაში ცხოვრებიდან გადასვლა საკუთარი შეცდომების გამოსწორების მცდელობაზე“, – წერს ზელენსკი სოციალურ ქსელში. ვოლოდიმირ ზელენსკიმ სლოვაკეთის პრემიერის შეცდომად დაასახელა რუსეთთან თანამშრომლობის გაგრძელების იმედი. „ჩვენ შევთავაზეთ დახმარება სლოვაკეთის ხალხს რუსეთიდან გაზის ტრანზიტის შეწყვეტასთან ადაპტაციის პერიოდში, მაგრამ ფიცომ ქედმაღლურად უარი განაცხადა. ევროპაში ბევრი აფრთხილებდა მას, რომ არ შეიძლება უბრალოდ არაფრის კეთება და ლოდინი. ახლა ის ცდილობს, პიარით, სიცრუითა და ხმაურიანი ბრალდებებით გადააბრალოს პასუხისმგებლობა სხვას. მაგრამ პრობლემა სწორედ იმაშია, რომ მან ფსონი დადო მოსკოვზე და არა საკუთარ ქვეყანაზე, გაერთიანებულ ევროპასა და საღ აზრზე. ეს თავიდანვე განწირული ფსონი იყო“, – აღნიშნა უკრაინის პრეზიდენტმა. ზელენსკიმ იმედი გამოთქვა, რომ ევროპაში ენერგიის მიწოდების ახალი წყაროების მოძიება, ევროკავშირთან თანამშრომლობა და ამერიკული გაზის მიწოდების გაზრდა დაეხმარება იმ პრობლემების მოგვარებაში, რაც „ზოგიერთი ევროპელი პოლიტიკოსის ახლომხედველობამ გამოიწვია“. ცნობისთვის, სლოვაკეთის პრემიერ-მინისტრმა, რობერტ ფიცომ უკრაინა, როგორც არასაიმედო პარტნიორი, მკაცრად გააკრიტიკა და თქვა, რომ მობეზრდა უკრაინის პრეზიდენტის, ვოლოდიმირ ზელენსკის ევროპაში სიარული, მისი „მათხოვრობა“ და „სხვების შანტაჟი“. ამასთან, სლოვაკეთის პრეზიდენტმა, პეტერ პელეგრინიმ განაცხადა, რომ უარს ამბობს კიევში ოფიციალურ ვიზიტზე უკრაინის მიერ რუსული გაზის ტრანზიტის შეწყვეტის გამო.

ბოლო სიახლეები