მძიმე ავარია წყნეთის გზაზე – რა ხდება შემთხვევის ადგილას

2004 წლიდან 2011 წლის ჩათვლით პროკურატურაში სხვადასხვა მაღალ თანამდებობაზე ნამუშევარი ადამიანი, ნაცაქტივისტი მეუღლით, ცხადია, ზიანს მიაყენებდა სახელმწიფოს, როგორც კი ამის საშუალება მიეცემოდა, – ამის შესახებ საზოგადოებრივი მოძრაობის, „ერთიანი ნეიტრალური საქართველოს“ ერთ-ერთი დამფუძნებელი ვატო შაქარიშვილი სოციალურ ქსელში წერს, რითაც თეთრიწყაროს მოსამართლის, ვლადიმერ ხუჭუას გადაწყვეტილებას ეხმაურება. „ყველას გვახსოვს აშშ-ის საელჩოში დაბარებული მოსამართლეები. ასევე, კანონიერი განაჩენის გამო (მათ შორის ისეთი განაჩენის, რომელიც სტრასბურგმაც დაადასტურა) დასჯილი და დასანქცირებული მოსამართლეები. ასევე, ვნახეთ USAID-ის თუ სხვა ევრო-ამერიკული ფონდების მიერ წახალისებული მოსამართლეები, რომლებიც სისტემაში ჰყავთ ჩანერგილი და საჭირო მომენტში აამოქმედებენ ხოლმე. სამწუხაროა, რომ ვლადიმერ ხუჭუა, ეს ადეიშვილისა და გვარამიას პროკურატურის მაღალჩინოსანი, დღემდე მოსამართლეა! რთული წარმოსადგენი არ არის, რა დონის ბინძური საქმეები აქვს შესრულებული, რომ სააკაშვილისგან ღირსების ორდენიც კი დაუმსახურებია! 2004 წლიდან 2011 წლის ჩათვლით პროკურატურაში სხვადასხვა მაღალ თანამდებობაზე ნამუშევარი ადამიანი, ნაცაქტივისტი მეუღლით, ცხადია, ზიანს მიაყენებდა სახელმწიფოს, როგორც კი ამის საშუალება მიეცემოდა! დავალებამაც არ დააყოვნა საელჩოდან და ხუჭუამ გაკოტრებულ, დამარცხებულ, გამარგინალებულ ოპოზიციას ხავსი გადაუგდო!!!“, – წერს ვატო შაქარიშვილი „ფეისბუქზე“.

“დეზინფორმაცია არჩევნების შედეგების კიდევ ერთი არ ამღიარებლისგან, – ასე პასუხობს „ქართული ოცნების“ დეპუტატი, ლევან ქარუმიძე, ნორვეგიელი კომუნიკაციების კონსულტანტის, ტარიე ჰელანდის მიერ X-ზე გამოქვეყნებულ განცხადებას, სადაც „შემაშფოთებელი ნაბიჯი“ უწოდა პარლამენტის თავმჯდომარე, შალვა პაპუაშვილის პრეზენტაციაში გამოყენებულ საქართველოს რუკას, სადაც ოკუპირებული რეგიონები ნაცრისფრად არის გამოყოფილი. „დეზინფორმაცია არჩევნების შედეგების კიდევ ერთი არ ამღიარებლისგან. თურმე „ქართულმა ოცნებამ“ პრეზენტაციაზე „ცარიელი თეთრი კვადრატი“ წარადგინა. ეს პრეზენტაცია ელექტრონული ფორმით გაეგზავნა სრულიად ქართულ მედიას. ქვემოთ შეგიძლიათ იხილოთ რეალური პრეზენტაციის სქრინი. როგორც ჩანს, კამერებს უჭირთ ნაცრისფერის აღქმა თეთრ ფონზე“, – წერს ლევან ქარუმიძე X-ზე. ოპოზიციის დეზინფორმაციასთან დაკავშირებით შალვა პაპუაშვილის მიერ გამართულ ბრიფინგზე, ერთ-ერთ სლაიდში საქართველოს დროებით ოკუპირებული ტერიტორიები ნაცრისფრად არის აღნიშნული იმის საილუსტრაციოდ, რომ ამ რეგიონებში, ოკუპაციის გამო, “ქართულ ოცნებას” დელეგატები არ ჰყოლია, ამ სლაიდს ოპოზიციის მხრიდან სპეკულაციები მოჰყვა.

დონალდ ტრამპმა მხარდამჭერებს მოუწოდა, ისეთი დიდი უპირატესობით აირჩიონ, რომ გაყალბება შეუძლებელი იყოს. ამის შესახებ აშშ-ის პრეზიდენტობის კანდიდატმა ერთ-ერთ ე.წ. მერყევ შტატში, სამხრეთ კაროლინაში მხარდამჭერებთან შეხვედრისას განაცხადა. ტრამპმა ხაზგასმით აღნიშნა, რომ 5 ნოემბერი აშშ-ის ისტორიაში ყველაზე მნიშვნელოვანი დღეა. მხარდამჭერებთან ერთსაათიანი სიტყვით გამოსვლისას ტრამპმა კიდევ ერთხელ გაიმეორა დაპირებები მექსიკასთან აშშ-ის საზღვრის ჩაკეტვის შესახებ. „ჩვენ კვლავ ვიქნებით თავისუფალი და ამაყი ერი. ყველა ოჯახი გაძლიერდება და ყოველი დღე იქნება სავსე შესაძლებლობებით, იმედითა და თავად ამერიკული ოცნებით“, – განაცხადა ტრამპმა. ამასთან, ტრამპმა კიდევ ერთხელ მოუწოდა მხარდამჭერებს, „დაითხოვონ კამალა“. „ამ არჩევნებში თქვენი ხმით შეგიძლიათ, ერთხელ და სამუდამოდ აჩვენოთ, რომ ეს ქვეყანა მათ არ ეკუთვნით, ეს ქვეყანა თქვენ გეკუთვნით. სწორედ თქვენნაირი მშრომელი პატრიოტები გადაარჩენენ ჩვენს ქვეყანას. ჩვენ ერთად ვიბრძოლებთ, ვიბრძოლებთ და გავიმარჯვებთ“, – აღნიშნა ტრამპმა.

კურსკის რეგიონში ჩრდილოკორეელების რაოდენობის ზრდას ვხედავთ, სამწუხაროდ, არ შეინიშნება ჩვენი პარტნიორების რეაგირების გაძლიერება, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას განაცხადა. უკრაინის პრეზიდენტის თქმით, მთავარსარდალთან, გენერალური შტაბის უფროსსა და უკრაინის თავდაცვის მინისტრთან შეხვედრა გამართა, სადაც ფრონტზე მიმდინარე საბრძოლო ვითარება განიხილეს, განსაკუთრებული ყურადღება კი დონეცკის მიმართულებებს დაეთმო. „მოხსენება წარადგინეს რუსეთის ტერიტორიაზე ჩრდილოკორეული ჯარების შესახებაც. კურსკის რეგიონში უკვე 11 000 მათგანია. ჩვენ ვხედავთ ჩრდილოკორეელების რაოდენობის ზრდას, თუმცა, სამწუხაროდ, არ შეინიშნება ჩვენი პარტნიორების რეაგირების გაძლიერება. სხდომაზე განვიხილეთ საჰაერო თავდაცვის საკითხი. ყველას შეუძლია, დაინახოს, თუ რამდენად გაიზარდა რუსების მიერ „შაჰედების“ და საავიაციო ბომბების გამოყენება. ეს ტერორი ყოველთვიურად იზრდება. ჩვენ გვჭირდება მეტი დახმარება, მათ შორის: დრონებით „შაჰედების“ ჩამოგდების რეალური პრაქტიკის დანერგვა, ჩვენი ძალების ისეთი განვითარება, რომ საბოლოოდ გადაწყდეს რუსული საავიაციო ბომბების პრობლემა“, – განაცხადა ზელენსკიმ.

ანალიტიკოსი გია აბაშიძე სოციალურ ქსელში ეხმიანება თეთრი წყაროს მოსამართლის, ვლადიმერ ხუჭუას მიერ მიღებულ გადაწყვეტილებას, რომელმაც 12 საარჩევნო უბნის შედეგები გააბათილა, ხოლო აღნიშნული გადაწყვეტილება მან არა კანონის ენით, არამედ, ოპოზიციურად განწყობილი მეუღლის - ელზა გურგენიძის გავლენით მიიღო. აბაშიძის განცხადებით, „ნაცების“ ხანმოკლე შავბნელი დავალება შესრულებულია. “თეთრი წყაროს მოსამართლემ, ვლადიმერ ხუჭუამ 12 საარჩევნო უბნის შედეგები გააბათილა, თურმე ბიულეტენებით ხმის ფარულობა არ იყო დაცული. "ნაცსივრცეში" ის ე.წ. "გმირია". რასაკვირველია, მოსამართლე ხუჭუას ამ გადაწყვეტილებაზე სააპელაციო სასამართლო იმსჯელებს, ეს ჩვეული პროცესია. თანდართული "სქრინები" და ვიდეო სოცქსელში ვლადიმერ ხუჭუას მეუღლის, ელზა გურგენიძის ტოქსიკური გზავნილებია და ვინმეს ეჭვი ეპარება, რომ თეთრი წყაროს მოსამართლემ ხუჭუამ კანონის ენით მიიღო გადაწყვეტილება? "ნაცების" ხანმოკლე შავბნელი დავალება შესრულებულია და ეს მოსალოდნელიც იყო, რომ მსგავსი ავაზაკობა მოხდებოდა. თუმცა, დემოკრატიული არჩევნებზე თავდასხმა მაინც ფუჭია რევანშისტებისთვის, საიდანაც არ უნდა დაარტყან დეზინფორმაციითა და მანიპულაციით გამართულ საარჩევნო სისტემას,”- წერს გია აბაშიძე.