„ამჟამად ცნობილ ყველა ზომიერ ეგზოპლანეტას შორის, LHS-1140b შეიძლება საუკეთესო კანდიდატი იყოს, რომლის ზედაპირზეც, ერთ მშვენიერ დღეს, არაპირდაპირი გზით დავაფიქსირებთ თხევად წყალს და ეს ამის პირველი შემთხვევა იქნება მზის სისტემის მიღმა. ეს კი უდიდესი საეტაპო მოვლენა იქნება სიცოცხლისათვის პოტენციურად ხელსაყრელ ეგზოპლანეტათა ძებნაში“, — ამბობს მონრეალის უნივერსიტეტის ასტროფიზიკოსი შარლ კადიო.
LHS-1140b სულ რამდენიმე წლის წინ აღმოაჩინეს. მისი რადიუსი დედამიწისას 1,73-ჯერ აჭარბებს, მასა კი 5,6-ჯერ. მართალია, ის ჩვენს პლანეტაზე დიდია, მაგრამ არც იმდენად, რომ კლდოვანი არ იყოს. ამას გარდა, საკუთარ ვარსკვლავს იმაზე გაცილებით ახლოდან უვლის გარშემო, ვიდრე დედამიწა მზეს — ერთ შემოვლას სულ რაღაც 25 დღეს ანდომებს.
მისი ვარსკვლავი რომ მზის მსგავსი იყოს, ეს მანძილი ძალიან ახლოს იქნებოდა სიცოცხლისთვის. სამაგიეროდ, ეს ვარსკვლავი ცივი, მკრთალი წითელი ჯუჯაა და შესაბამისად, ეგზოპლანეტა მის სასიცოცხლო ზონაში ექცევა. ასე უწოდებენ მანძილს ვარსკვლავიდან, სადაც არც იმდენად ცივა, რომ პლანეტის ზედაპირზე წყალი გაიყინოს და არც იმდენად ცხელა, რომ აორთქლდეს.
მიუხედავად ამისა, ასეთი სიახლოვის გამო, პლანეტა მოქცევით იქნება ჩაკეტილი. ანუ, მისი ბრუნვის პერიოდი ორბიტულ პერიოდს ემთხვევა და ვარსკვლავისკენ მუდმივად ერთი მხარეა მოქცეული, ზუსტად ისე, როგორც მთვარის ერთი მხარე დედამიწისკენ.
სასიცოცხლო ზონაში მდებარეობა ავტომატურად არ ნიშნავს იმას, რომ პლანეტაზე სიცოცხლისათვის საჭირო ყველა პირობაა. LHS-1140b-ის ქიმიური შემადგენლობის უკეთესად შესასწავლად, საჭიროა მის ატმოსფეროში შეხედვა, თუკი ასეთი საერთოდ აქვს. სწორედ ეს გააკეთეს კადიომ და მისმა კოლეგებმა ჯეიმს ვების კოსმოსური ტელესკოპის გამოყენებით.
ეს სისტემა ჩვენგან სულ რაღაც 50 სინათლის წლით არის დაშორებული, რაც საკმარისად ახლო მანძილია, რათა დეტალური ინფორმაცია შევაგროვოთ სინათლის იმ ცვლილების შესახებ, რაც ამ ეგზოპლანეტის თავის ვარსკვლავსა და ჩვენ შორის გავლისას ხდება. ვარსკვლავის სინათლის გარკვეული ნაწილი პლანეტის ატმოსფეროში გაივლის, რა დროსაც, ტალღის სიგრძეების ნაწილს ამ ატმოსფეროში არსებული ატომები შთანთქავს ან აძლიერებს. იმის გათვალისწინებით, თუ რომელ ტალღის სიგრძეებზე მოხდა ზემოქმედება, შესაძლებელია დადგინდეს, ზუსტად რომელი ატომებია ჩართული საქმეში. ნახეთ სრულად