საქართველოს ტექნიკური უნივერსიტეტის სტუდენტებს, საქართველოს განათლების, მეცნიერებისა და ახალგაზრდობის სამინისტროს ინიციატივით, ზუგდიდის მუნიციპალიტეტში, ანაკლიის ახალგაზრდულმა ბანაკმა უმასპინძლა. ამის შესახებ ინფორმაციას საქართველოს ტექნიკური უნივერსიტეტი ავრცელებს.
სტუ-ის ცნობით, ანაკლიის ახალგაზრდულ ბანაკს, რომელიც ახალგაზრდობის სააგენტოს ორგანიზებით ზაფხულის სეზონზე ფუნქციონირებს, პირველ ნაკადში საქართველოს ტექნიკური უნივერსიტეტის 240 სტუდენტი ეწვია.
ანაკლიის ბანაკი საქართველოს განათლების, მეცნიერებისა და ახალგაზრდობის მინისტრმა, გიორგი ამილახვარმა გახსნა. მინისტრმა პირველი ნაკადის სტუდენტებს ბანაკში მონაწილეობისთვის მადლობა გადაუხადა, მათ ახალგაზრდული ღონისძიებების ხელშეწყობის პროგრამის მიზნებზე ესაუბრა და სასიამოვნო დასვენება უსურვა.
როგორც გიორგი ამილახვარმა აღნიშნა, პროგრამის მიზანი ახალგაზრდების აქტიური დასვენების, სოციალური ინტეგრაციის და მათი ფიზიკური თუ ინტელექტუალური პოტენციალის გამოვლენის ხელშეწყობის პარალელურად, ახალ თაობაში ჯანსაღი ცხოვრების წესის პოპულარიზაცია, ეროვნული და ევროპული ღირებულებების დამკვიდრება და პატრიოტული ღირებულებების წახალისებაა.
ბანაკის გახსნის ღონისძიებაში მონაწილეობდნენ განათლების, მეცნიერებისა და ახალგაზრდობის მინისტრის მოადგილე ნოდარ პაპუკაშვილი, საქართველოს ტექნიკური უნივერსიტეტის რექტორი, აკადემიკოსი დავით გურგენიძე, კანცლერი, პროფესორი კარლო კოპალიანი, უნივერსიტეტის სამეთვალყურეო საბჭოს პრეზიდენტი, პროფესორი ზურაბ გუდავაძე, ვიცე-რექტორი, ასოცირებული პროფესორი თამარ წერეთელი, ახალგაზრდობის სააგენტოს ხელმძღვანელი ვატო ბააკაშვილი, სამეგრელო-ზემო სვანეთის სახელმწიფო რწმუნებული გიორგი გუგუჩია და ზუგდიდის მერი მამუკა წოწერია.
საქართველოს ტექნიკური უნივერსიტეტის რექტორმა სტუდენტებს შემეცნებითა და სიახლეებით დატვირთული დასვენება უსურვა და მათ ბანაკის ფარგლებში დაგეგმილ საგანმანათლებლო, რეკრეაციულ, სპორტულ და კულტურულ ღონისძიებებში აქტიურად ჩართვისკენ მოუწოდა.
„განათლების, მეცნიერებისა და ახალგაზრდობის სამინისტროს მხარდაჭერით და ახალგაზრდობის სააგენტოს უშუალო ჩართულობით, ახალგაზრდულ ბანაკებისთვის შემუშავებულია მრავალფეროვანი აქტივობები იმ მიზნით, რომ სტუდენტებმა, სასწავლო წლის დასრულების შემდეგ, შეძლონ დასვენება, გართობა და თვალსაწიერის გაფართოება. დარწმუნებული ვარ, საქართველოს ტექნიკური უნივერსიტეტის სტუდენტები აქტიურად ჩაერთვებიან ანაკლიის ბანაკში 5 დღის მანძილზე დაგეგმილ ყველა ღონისძიებაში, როგორც საგანმანათლებლო-ინტელექტუალური, ასევე, სპორტული და კულტურული მიმართულებით. სასიხარულოა, რომ ბანაკი თანამედროვე მოთხოვნების შესაბამისადაა აღჭურვილი – არაჩვეულებრივი ინფრასტრუქტურით და მატერიალურ-ტექნიკური ბაზით, ასევე, დაცულია უსაფრთხოების ყველა მოთხოვნა. მადლობას ვუხდით სამინისტროს, პირადად მინისტრ გიორგი ამილახვარს იმ შესაძლებლობის შექმნისთვის, რაც ჩვენი ახალგაზრდების დასვენებას, მათ განვითარებასა და ჯანსაღი ცხოვრების წესის პოპულარიზაციას გულისხმობს. შემეცნებითა და სიახლეებით დატვირთულ დასვენებას ვუსურვებ ჩვენს სტუდენტებს“, – აღნიშნა დავით გურგენიძემ.
უნივერსიტეტის ინფორმაციით, ანაკლიის ბანაკის 5-დღიანი პროგრამის ფარგლებში, საქართველოს ტექნიკური უნივერსიტეტის სტუდენტებმა მონაწილეობა მიიღეს სპორტულ შეჯიბრებებსა და კულტურულ აქტივობებში, ასევე, თემატურ ტრენინგებში, მათ შორის: ქართული ჯარისა და თავდაცვის ძალების საქმიანობის, ნარკოდამოკიდებულების საფრთხეების. ასევე, გლობალიზაციისა და ცვალებადი საერთაშორისო წესრიგის გავლენის შესახებ; Guest Speaker-ის ფარგლებში კი ახალგაზრდები ცნობილ პოლიტიკოსებს, სპორტსმენებსა და ხელოვანებს შეხვდნენ.
საქართველოს ტექნიკური უნივერსიტეტის 240 სტუდენტისგან შემდგარი პირველი ნაკადი ანაკლიის ბანაკიდან დღეს გამოემგზავრა.
წლევანდელი ზაფხულის სეზონზე ანაკლიის ბანაკი სტუდენტთა 13 ნაკადს მიიღებს და ჯამში 3 120 ახალგაზრდას უმასპინძლებს. მონაწილეთა შერჩევა პარტნიორ საგანმანათლებლო დაწესებულებებთან თანამშრომლობით ხორციელდება.