„მე პირადად და ჩვენი გუნდი, რა თქმა უნდა, ვგმობთ ძალადობას. მნიშვნელობა არ აქვს, რომელი მხრიდან მოხდება. სამწუხაროდ, მე ინფორმაციას ნამდვილად არ ვფლობ იმასთან დაკავშირებით, ვინები იყვნენ ეს ახალგაზრდები და რითი იყვნენ შეიარაღებულები. თუმცა დარწმუნებული ვარ იმაში და გარწმუნებთ, რომ სამართალდამცავები, რა თქმა უნდა, ამაზე რეაგირებას მოახდენენ, – ასე გამოეხმაურა საპარლამენტო უმრავლესობის წევრი ლევან მაჭავარიანი „ნაციონალური მოძრაობის“ ცენტრალურ ოფისთან გასულ ღამეს მომხდარ თავდასხმას.
მაჭავარიანის თქმით, განსაკუთრებით მიუღებელია ორმაგი სტანდარტი, როდესაც გარკვეული ქმედებების დაგმობა მხოლოდ ერთი მხრიდან ხდება.
დეპუტატმა აღნიშნა, რომ რამდენიმე დღეა, ბულინგის კამპანია მიმდინარეობს არა მხოლოდ პოლიტიკოსებისა და დეპუტატების წინააღმდეგ, არამედ მათი ოჯახის წევრების წინააღმდეგაც, რაზეც ოპოზიციისგან და „ენჯეო“ სექტორისგან რეაგირება არ მომხდარა.
„პირადად მე რაც ვიხილე, ეს იყო „ნაციონალური მოძრაობის“ ოფისის დაცვის წევრები ბეისბოლის ბიტებით, იქ მოვისმინეთ არაერთი ცეცხლსასროლი იარაღიდან გასროლა და ეს ყველაფერი არის უკიდურესად მიუღებელი, რა თქმა უნდა. მე, სამწუხაროდ, ინფორმაციას არ ვფლობ, ვინ იყვნენ ეს ახალგაზრდები. უბრალოდ, რაც არის ყველაზე უსიამოვნო, ზოგადად, აბსოლუტური გულწრფელობით გეუბნებით, ეს არის ორმაგი სტანდარტი. როდესაც დაგმობა ხდება მხოლოდ რაღაცა ქმედებების ერთ მხარეს და ვერანაირი, ასე ვთქვათ, ნეგატიური რეაქცია ვერ მოვისმინეთ ვერც თქვენი ტელევიზიებისგან, ვერც ოპოზიციის წარმომადგენლებისგან, ვერც „ენჯეო“ სექტორის წარმომადგენლებისგან იმ ბულინგის კამპანიებთან დაკავშირებით, რომლებსაც უკვე ვხედავთ, რომ რამდენიმე დღეა, გრძელდება. აქ არის პირდაპირ მოწოდებები „ფეისბუქზე“, პირდაპირ ეთერებში, რომ დავაბულინგოთ არა მხოლოდ პოლიტიკოსები და დეპუტატები, არამედ მათი ოჯახის წევრები, მათი შვილები, მივუვარდეთ მათ შვილიშვილებს, იქ რაღაცა კამპანია იყო აგორებული – „84 ტყვია კეფაში“. აქაც თქვენი კომენტარი, სამწუხაროდ, ვერ მოვისმინე და ეს არავის არ დაუგმია. იყო რამდენიმე დღის წინ ყოვლად ამაზრზენი და ამორალური საქციელი, როდესაც ჩვენი ერთ-ერთი დეპუტატის გარდაცვლილ დაზე დაიწერა ისეთი რაღაცები „ფეისბუქზე“, რაც, ალბათ, თქვენივე თვალით იხილეთ. ეს ყველაფერი არის ძალიან ცუდი. ძალადობა შობს ძალადობას. ეგ არის გარდაუვალი, სამწუხაროდ“, – განაცხადა ლევან მაჭავარიანმა.
მისი თქმით, ასეთი ძალადობრივი ქმედებები „ნაციონალური მოძრაობის“ ხელწერაა.
„სამწუხაროდ, რუსეთის გარდა, ამას წლების განმავლობაში აკეთებდა „ნაციონალური მოძრაობა“ და მე ჩამოვთვალე რამდენიმე მაგალითი და შეგვიძლია, ეს გავაგრძელოთ. ეს რომ მოსაწონი არ იყო, „ნაციონალური მოძრაობა“ იმიტომ აღარ არის ხელისუფლებაში და ვერასდროს ვერ მობრუნდება. ეს ჩვენი ხელწერა არ არის. ჩვენ მმართველობაში ვართ უკვე 12 წელია. 12 წლის განმავლობაში ჩვენი ხელწერა ეს არასდროს არ ყოფილა და არასდროს იქნება. თუ რაღაცა თემებია ისეთი, რომლებიც კითხვის ნიშანს ბადებს საზოგადოებაში, მე ღრმად ვარ დარწმუნებული, რომ სამართალდამცავი უწყებები ამ ყველაფერთან დაკავშირებით რეაგირებას მოახდენენ“, – აღნიშნა მაჭავარიანმა.