რეზოლუციები უკიდურესად მიკერძოებულია და საქართველოს ევროინტეგრაციის წინააღმდეგ მიმართული კონკრეტული დოკუმენტებია, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებთან განაცხადა.
„ასეთი ბევრი, ცოტა აბსტრაქტული სიტყვების გამოყენება რატომ სჭირდება ადამიანს?! იმიტომ, რომ მტკიცებულება როცა არ არსებობს, ასეთი შეფასებებით უნდა გადაიფაროს ეს ყველაფერი. აღქმა – „გულწრფელი სურვილების ნაკლებობა“, წარმოიდგინეთ რა შეფასებაში შევდივართ იმის გამო, რომ მტკიცებულებები არ არსებობს. როცა რეზოლუციებზე ვსაუბრობთ, იმ რეზოლუციებში წერია, რომ სააკაშვილი უნდა იყოს თავისუფალი და ბიძინა ივანიშვილი უნდა იყოს დასჯილი. ასეთი „სიმართლე“ წერია იმ რეზოლუციებში. ეს რეზოლუციები უკიდურესად მიკერძოებულია და საქართველოს ევროინტეგრაციის წინააღმდეგ მიმართული კონკრეტული დოკუმენტებია. დოკუმენტში, სადაც წერია, რომ სისხლის სამართლის დამნაშავე სააკაშვილი, პოლიტიკურ თაღლითობაში დამნაშავე, რაც დაადასტურა ბეჭდით ევროპის სასამართლომ, უნდა იყოს გარეთ და სხვა ხალხი, რომლებსაც დიდი წვლილი აქვთ ამ ქვეყნის გადარჩენაში უნდა იყოს დასჯილი, ასეთი „სიმართლით“ არის ნაკარნახევი ეს განცხადებები“, – აღნიშნა მამუკა მდინარაძემ.