მე არ მგონია, რომ ჩვენი ოპონენტები, რომლებიც ამბობენ, რომ ეს პროგნოზირებადი იყო, გულწრფელები არიან – არ იყო ეს პროგნოზირებადი და არც მგონია, რომ ლოგიკური იყო, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძემ მოსამართლეებისთვის დაწესებულ სანქციებზე საუბრისას გადაცემა „იმედი LIVE“-ში განაცხადა.
„ამას მოულოდნელობის ეფექტი რა თქმა უნდა, ჰქონდა. მაგალითად, ვკითხოთ ოპონენტებს და ახსნან, ვალერიან ცერცვაძე რატომ იყო იქ, რომელიც აღმოჩნდა, რომ 6 წელია, აღარ არის მოსამართლე. ვფიქრობ, არც აშშ-ის ელჩს აქვს პასუხები ამასთან დაკავშირებით და იმიტომ მოუწია ისეთი პასუხების გაცემა, როგორიც გასცა. ხან ითქვა, რომ სარწმუნო წყაროებია, ხან ითქვა, რომ ღია წყაროებია, სინამდვილეში როგორც ირკვევა, წყლის მეტი არაფერია. რა თქმა უნდა თავს შევიკავებ ნებისმიერი მოსამართლის მიმართ ჩემი პირადი სიმპათიის ან ანტიპათიის დაფიქსირებისგან, ეს არ შეიძლება სწორი იყოს პოლიტიკოსის მხრიდან, მაგრამ მომწონს თუ არ მომწონს, ამის მიღმა უნდა ვთქვათ, რომ საქართველოს – დამოუკიდებელი ქვეყნის სასამართლო ხელისუფლების წარმომადგენლებზე როდესაც არის ასეთი ბრალდება, არ შეიძლება, რომ რახან ჩემთვის ავტორიტეტულმა ადამიანმა ან სტრატეგიულმა პარტნიორმა თქვა, ბრმად ვენდო. ძალიან მნიშვნელოვანია ამას ბოლომდე მივყვეთ და თუ რამე სათქმელი არსებობს, ითქვას“, – განაცხადა სარჯველაძემ.