გურამ მაჭარაშვილი – დემოკრატიულ ქვეყნებში თუ უსაფრთხოება უნდა დაიცვან სახელმწიფოებმა, ჩვენ რატომ არ უნდა დავიცვათ, ჩვენთან რატომ არის ანტიდემოკრატიული ის, რაც ევროპისა და ამერიკის ქვეყნებში დემოკრატიულია

საქართველოს ფინანსთა სამინისტროს საგამოძიებო სამსახურმა უპრეცედენტო რაოდენობის, კერძოდ, 75 137 ბოთლი ალკოჰოლური სასმელი და 318 000 კოლოფი უაქციზო სიგარეტი ამოიღო.ამის შესახებ საგამოძიებო სამსახურში გამართულ ბრიფინგზე განაცხადეს.როგორც აღინიშნა, დაკავებულია დანაშაულში თანამონაწილე შვიდი პირი.„გამოძიებით დადგენილია, რომ ბრალდებულებს შიდა ქართლის რეგიონში, წლების განმავლობაში გააჩნდათ არალეგალურად მოქმედი, ალკოჰოლური სასმელების მწარმოებელი ქარხანა, სადაც კუსტარულად ხდებოდა სხვადასხვა დასახელების, ქართული და უცხოური, ბრენდული ალკოჰოლური სასმელების უკანონო ჩამოსხმა-რეალიზაცია.საგამოძიებო მოქმედებების შედეგად, ამოღებულ იქნა, სარეალიზაციოდ გამზადებული, 75 137 ბოთლი უაქციზო ალკოჰოლური სასმელი, კერძოდ არაყი BELUGA (ბელუგა), BELVEDER (ბელვედერი), GREY GOOSE (გრეი გუსი), ვისკი BORKAN (ბორკან) და CHIVAS REGAL (ჩივას რეგალი).ჩხრეკისას ქარხანაში ასევე აღმოვაჩინეთ ხსენებული სასმელების წარმოებისთვის განკუთვნილი დიდი რაოდენობით ბოთლები, საცობები,  ეტიკეტები, შესაფუთი მასალა, ხოლო ცისტერნებში –  დაახლოებით 24 ტონა  ალკოჰოლური სითხე, რომლითაც ხდებოდა ზემოაღნიშნული ფალსიფიცირებული სასმელების დამზადება.ქარხნის მიმდებარე ტერიტორიაზე არსებულ ერთ-ერთი საწყობიდან დამატებით ამოვიღეთ 318 000 კოლოფი უაქციზო სიგარეტი KARELIA (კარელია). ასევე, ამოღებულია სიგარეტის შეფუთვისათვის და წარმოებისათვის განკუთვნილი ტექნიკური დანადგარები.ამოღებული უაქციზო ალკოჰოლური სასმელების და სიგარეტების საორიენტაციო ღირებულებამ შესაძლოა ათეულობით მილიონი შეადგინოს, რასაც საბოლოოდ საქმეზე ჩატარებული შესაბამისი ექსპერტიზა დაადგენს.ვაგრძელებთ საგამოძიებო და ოპერატიული ღონისძიებების წარმოებას ორგანიზებულ დანაშაულებრივ საქმიანობაში ჩართული სხვა პირების მხილების მიზნით.გამოძიება საქართველოს სისხლის სამართლის კოდექსის 196-ე მუხლის მე-3 ნაწილით და მე-200 მუხლის მე-4 ნაწილით მიმდინარეობს, რაც სასჯელის სახედ და ზომად ითვალისწინებს თავისუფლების აღკვეთას 7-დან 10 წლამდე ვადით“, – აცხადებენ საგამოძიებო სამსახურში.

დედაქალაქის მერის, კახა კალაძის განცხადებით, უკრაინიდან საქართველოში დიდი ოდენობით ასაფეთქებელი ნივთიერების ტრანსპორტირების ფაქტი, რომელშიც, გამოძიების ინფორმაციით, მეზობელი სახელმწიფოს სპეცსამსახურები ფიგურირებენ, ძალიან მძიმე ფაქტია და მეტყველებს, რომ მტერი არ ისვენებს.როგორც კახა კალაძემ დღეს ჟურნალისტებს განუცხადა, ყველანაირად ცდილობენ, ქვეყანაში როგორმე მოახდინონ სახელმწიფო გადატრიალება და სისხლისღვრა.„ძალიან მძიმე ფაქტია. აღიარებითი ჩვენებები, რაც მოპოვებულია, კიდევ ერთხელ მეტყველებს, რომ მტერი არ ისვენებს, ყველანაირი მცდელობა აქვთ, ქვეყანაში როგორმე მოახდინონ სახელმწიფო გადატრიალება, სისხლისღვრა, რევოლუცია და ხალხის დაპირისპირება. მადლობა სახელმწიფო უსაფრთხოების სამსახურს, თითოეულ თანამშრომელს ამ პრევენციული ღონისძიებებისთვის. როგორც ვიცი, გამოძიება მიმდინარეობს, არსებობს ძალიან ბევრი კითხვა, ამიტომ დაველოდოთ. რა თქმა უნდა, არის ძალიან მძიმე ფაქტი, როდესაც ამ ტიპის დანაშაულთან გვაქვს საქმე“, – განაცხადა თბილისის მერმა.

ზოგიერთი ევროპელი ბიუროკრატის განცხადება, როცა თეთრზე ამტკიცებენ, რომ შავია, დაფუძნებულია ტყუილზე და თავად ევროკავშირს აზიანებს, – ამის შესახებ დედაქალაქის მერმა, კახა კალაძემ მედიასთან ისაუბრა.კალაძე გამოეხმაურა ევროკავშირის მაღალი თანამდებობის პირების მიერ „კოალიცია ცვლილებებისთვის“ ერთ-ერთი ლიდერის, ელენე ხოშტარიას დაკავების საკითხზე გაკეთებულ განცხადებებს, რომლებშიც მას პოლიტპატიმარს უწოდებენ.კახა კალაძის შეფასებით, ეს ყველაფერი პოლიტიკური სპეკულაციებია.„ეს არის ჩვეულებრივი პოლიტიკური სპეკულაციები, სიბინძურე, რასაც ამ ბიუროკრატებისგან ვხედავთ. მათი განცხადებები დაფუძნებულია ტყუილზე და აზიანებს თავად მათ, ევროკავშირს. როგორ შეიძლება, ადამიანმა მტკიცებით ფორმაში თეთრზე თქვას შავიაო. სამწუხაროდ, ეს პირველი შემთხვევა არ არის და საზოგადოება ყველაფერს კარგად აფასებს. ყველა ხედავს, რომ ქვეყანაში არსებული ძალადობრივი ჯგუფების შექმნაში წლების განმავლობაში უამრავი თანხა დაიხარჯა. ეს ყველაფერი გარედან ფინანსდება. მათ ჰყავთ თავიანთი პატრონები, როგორც ქვეყნის შიგნით ზოგიერთი დიპლომატის სახით, ასევე გარედან. ყველაფერი ცუდი, რაც ქვეყანაში ხდება – სიძულვილი, ძალადობა, საზოგადოების დაპირისპირების მცდელობა, დაფინანსებულია გარე ძალებისგან“, – განაცხადა კახა კალაძემ.თვითმმართველობის არჩევნებზე ოპოზიციის შანსებს რაც შეეხება, თბილისის მერის თქმით, ისინი სხვა ქვეყნის ინტერესებს ემსახურებიან, რის გამოც ქვეყნის პოლიტიკაში მათი ადგილი არ არის.„ხედავთ, ოპოზიციას რა მხარდაჭერა აქვს და რა მდგომარეობაში არიან. მათ მოსახლეობისგან არანაირი მხარდაჭერა, რესურსი არ აქვთ, რომ გაიმარჯვონ. 4 ოქტომბერს ისინი ყველა საარჩევნო ოლქში აუცილებლად დამარცხდებიან. ქართველი ხალხი კიდევ ერთ განაჩენს გამოუტანს მათ. ისინი აგენტები არიან და სხვა ქვეყნის ინტერესებს ემსახურებიან. რა თქმა უნდა, ასეთი პოლიტიკური პარტიების ადგილი ქვეყნის პოლიტიკაში არ არის“, – აღნიშნა კახა კალაძემ.

ჩემი და პოლიტიკური პარტიის, „გახარია საქართველოსთვის“ გზები გაიყო, – ამის შესახებ დიმიტრი ცქიტიშვილი სოციალურ ქსელში წერს.როგორც ცქიტიშვილი ამბობს, აღნიშნულის მიზეზი არის ფუნდამენტური განსხვავება არჩევნების საკითხთან დაკავშირებით.„მინდა, საჯაროდ განვაცხადო, რომ ჩემი და პოლიტიკური პარტიის, „გახარია საქართველოსთვის“ გზები გაიყო (პარტიას ოფიციალურად ვერ დავტოვებ, რადგანაც ფორმალურად წევრი არ ვყოფილვარ). მიზეზი არის არა უბრალოდ აზრთა სხვადასხვაობა არჩევნებში მონაწილეობა-არმონაწილეობის თაობაზე, არამედ ფუნდამენტური განსხვავება არჩევნების საკითხთან დაკავშირებით.4 ოქტომბრის არჩევნები ჩემთვის არ და ვერ იქნება ტაქტიკური, ეტაპობროვი საკითხი, მიუხედავად იმისა, რომ ზოგადად ინსტიტუციური დემოკრატიული ბრძოლის მხარდამჭერი ვარ. არსებულ ვითარებაში ასეთი ფორმით და დინამიკით არჩევნებში მონაწილეობა ვერ მოემსახურება ქვეყნის დემოკრატიულ კალაპოტში დაბრუნებას.რამდენჯერმე საჯაროდ ვთქვი და ახლაც ვიმეორებ: არჩევნებში მონაწილეობას აზრი ექნებოდა მხოლოდ პოლიტიკურ ძალთა კოორდინირებული მოქმედების შემთხვევაში, უსამართლო პოლიტიკურ ბრძოლაში რეჟიმის დამარცხების თუნდაც მცირე შანსით.სამწუხაროდ, დღეს არსებული პოლიტიკური ძალების ფრაგმენტაცია ყველაზე არახელსაყრელი გზა არის საზოგადოების პროტესტის მხარდასაჭერად და რეჟიმის დასამარცხებლად.მინდა, მჯეროდეს, რომ რომელიმე გზა მაინც მოიტანს შედეგს, თუმცა ყველას უნდა გვესმოდეს, რომ 5 ოქტომბერს, შესაძლოა, დადგეს უკვე განსხვავებული რეალობა და ამისთვისაც უნდა ვიყოთ მზად“, – წერს დიმიტრი ცქიტიშვილი.

შსს-ს ინფორმაციით, ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების ბრალდებით დააკავეს 2009 წელს დაბადებული პირი, რომელიც აქციის მონაწილეებთან იარაღის დემონსტრირებას ახდენდა. შსს ბესიკის ქუჩაზე მომხდარ ინციდენტზე ინფორმაციას ავრცელებს და აცხადებს, რომ 30-მდე აქტივისტი რუსთაველისა და ბესიკის ქუჩის კვეთაზე სიტყვიერად დაუპირისპირდა რამდენიმე მოქალაქეს, საიდანაც ერთ-ერთმა მოახდინა პისტოლეტის დემონსტრირება, რის გამოც აქციის ორი მონაწილე გაეკიდა მას. შსს-ს თანახმად, აღნიშნული პირი შევიდა ბესიკის ქუჩის მიმდებარედ არსებულ კაფეში, სადაც აქტივისტებმა შებოჭეს და წაართვეს იარაღი, რომელიც პირველადი დათვალიერებით, სავარაუდოდ, არის პნევმატური პისტოლეტი. უწყების ცნობით, დადასტურების შემთხვევაში დანაშაული 7 წლით თავისუფლების აღკვეთას ითვალისწინებს. "შინაგან საქმეთა სამინისტროს საპატრულო პოლიციის თანამშრომლებმა ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების ბრალდებით 2009 წელს დაბადებული დ.გ. დააკავეს. გამოძიებით დგინდება, რომ 2025 წლის 15 სექტემბერს, საზოგადოებრივი მაუწყებლის შენობის მიმდებარე ტერიტორიიდან მსვლელობით წამოსული ოცდაათამდე აქტივისტი რუსთაველისა და ბესიკის ქუჩის კვეთაზე სიტყვიერად დაუპირისპირდა რამდენიმე მოქალაქეს, საიდანაც ერთ-ერთმა მოახდინა პისტოლეტის დემონსტრირება, რის გამოც აქციის ორი მონაწილე გაეკიდა მას. აღნიშნული პირი შევიდა ბესიკის ქუჩის მიმდებარედ არსებულ კაფეში, სადაც აქტივისტებმა შებოჭეს და წაართვეს იარაღი, რომელიც პირველადი დათვალიერებით, სავარაუდოდ, არის პნევმატური პისტოლეტი. ხსენებული პირი და წართმეული იარაღი აქტივისტებმა გადასცეს საპატრულო პოლიციის თანამშრომლებს. დადასტურების შემთხვევაში დანაშაული 7 წლით თავისუფლების აღკვეთას ითვალისწინებს", - ნათქვამია ინფორმაციაში.