ირანს ომი არ დაუწყია. როგორც 2025 წლის ზაფხულში, ისე 2026 წლის ზამთარში ჩვენ ვიყავით ჩართული მოლაპარაკების პროცესში და აღმოვჩნდით თავდასხმის ობიექტივში, – ამის შესახებ საქართველოში ირანის ელჩმა, სეიედ ალი მოჯანიმ განაცხადა.
მისივე თქმით, თავდასხმებიდან ერთი საათის შემდეგ, ირანის ისლამურმა რესპუბლიკამ უკვე თავდაცვითი ნაბიჯები გადადგა.
„ირანს აქვს თავდაცვის უფლება, რომელიც განსაზღვრულია საერთაშორისო სამართლის პრინციპებით და გაერო-ს ქარტიით. შესაბამისად, ამ საომარი ოპერაციების დაწყებისთანავე, მე მქონდა შეხვედრა საგარეო საქმეთა სამინისტროში, რომლის ხელმძღვანელობა ჩავაყენე საქმის კურსში. მაშინ თბილისში დიდთოვლობა იყო, რომელმაც გარკვეული შეფერხებები გამოიწვია ელექტროენერგიის, კომუნიკაციების თვალსაზრისით. ამ საომარი ოპერაციებიდან დაახლოებით რამდენიმე საათში მოვახერხე საგარეო საქმეთა სამინისტროს ხელმძღვანელობასთან შეხვედრა. საგარეო უწყებაშიც განვაცხადე, რომ ჩვენი თავდაცვის შესაძლებლობები, ჩვენი შეიარაღება გვაძლევს საშუალებას, თუნდაც ერთი საათის განმავლობაში, ჩვენ მოვახდინოთ ძალების მობილიზება და დავიცვათ ქვეყანა, რომლის ფართობი მილიონ 600 ათასი კვადრატული კილომეტრია“, – განაცხადა ირანის ელჩმა.
მისივე თქმით, გასული 37 წლის განმავლობაში, მიუხედავად არაერთი შეზღუდვისა და ძალიან საშინელი სანქციებისა, ირანმა შეძლო განვითარება და თავდაცვისუნარიანობის ამაღლება.
„ყველას დავანახეთ, რომ არავის მივცემთ უფლებას, ხელყოს ჩვენი ტერიტორიული მთლიანობა და სუვერენიტეტი. ამის შემდეგ უკვე განცხადებას აკეთებს აშშ-ის ომის მინისტრი, რომ ირანის რეჟიმი აღარ არსებობს და უკვე მსოფლიო მიდის უკეთესი ცვლილებებისკენ. ჩვენთვის საკითხავია, თუკი ისლამური ხელისუფლება აღარ არსებობს, მაშინ ამერიკა ვის ებრძვის?! მოჩვენებას ებრძვის?! რომელი ხელისუფლებაა, რომელიც ბომბავს ამერიკის სამხედრო ბაზებს რეგიონში. ვინ გაწირა თუნდაც ამერიკელი სამხედროები სასიკვდილოდ, რომლებიც შემოიჭრნენ ჩვენს ქვეყანაში და დაარღვიეს ჩვენი ტერიტორიული მთლიანობა.
ომის დაწყებამდე, ორი თვის განმავლობაში რეგიონის ქვეყნებთან გვქონდა კომუნიკაცია, გავაფრთხილეთ და საქმის კურსში ჩავაყენეთ, რა შედეგები მოჰყვებოდა ირანის წინააღმდეგ ნებისმიერი აგრესიის დაწყებას. ასეთივე მესიჯები არა მარტო ჩვენს სამხრეთელ მეზობლებთან, არამედ კავკასიელ მეზობლებთანაც მივიტანეთ. დაახლოებით ორი კვირის წინ ჩვენი აწ განსვენებული თავდაცვის მინისტრი ბაქოში შეხვდა პრეზიდენტ ალიევს და ორი დღით ადრე ირანში იმყოფებოდა ასევე სომხეთის თავდაცვის მინისტრი. ზოგადად, ჩვენ ყველა მეზობელ ქვეყანასთან, როგორც აღმოსავლეთით, დასავლეთით, სამხრეთით თუ ჩრდილოეთით, სამეზობლოში ყველა ქვეყანასთან გვქონდა კომუნიკაცია და ისინი გავაფრთხილეთ. მათ ცალსახად და ღიად განვუცხადეთ, რომ ამ ქვეყნების მხრიდან ირანის წინააღმდეგ თუკი იქნება რაიმე ნაბიჯი გადადგმული, ირანი შესაბამის პასუხს გასცემს. მათ განაცხადეს, რომ მათი საჰაერო სივრცე, ტერიტორიები, საზღვაო აკვატორია არანაირად არ გადაეცემა ამერიკას, რომ ამერიკამ გამოიყენოს ისინი ირანის წინააღმდეგ. ჩვენ როდესაც გავიგეთ, რომ ამერიკის ბომბდამშენები ქუვეითიდან იღებდნენ სტარტს, მივიღეთ გადაწყვეტილება, სწორედ ის ადგილი დაგვებომბა.
თავად ტრამპმა განაცხადა, რომ ქუვეითში დაიღუპნენ მათი ჯარისკაცები. ამ ფაქტმაც აჩვენა, რომ სამწუხაროდ, ამერიკამ ბოროტად გამოიყენა ჩვენი მეზობელი ქვეყნების ტერიტორიები ირანის წინააღმდეგ. ჩვენი თავდასხმების ობიექტს არ წარმოადგენს კონკრეტულად მეზობელი ქვეყნები, არამედ ამ მეზობელ ქვეყნებში განლაგებული ამერიკის სამხედრო ბაზები, ლოგისტიკური ცენტრები და დაზვერვის ობიექტები. ირანი არ არის ისეთი ქვეყანა, სტრუქტურა, რომელიც შეიძლება, სუსტად ჩათვალო და საომარი ოპერაციებით დააჩოქო“, – აღნიშნა ირანის ელჩმა.
მისივე თქმით, „ირანი ყოველთვის მიისწრაფვის მშვიდობიანი თანაცხოვრებისკენ და რეგიონში მშვიდობის დამყარებისკენ“.
„გუშინ აშშ-ის სახელმწიფო მდივანმა, მარკო რუბიომ განაცხადა, რომ ირანი ჩვენთვის საფრთხეს არ წარმოადგენდაო. საფრთხეს თუკი არ წარმოადგენდა, რას ნიშნავს ყოველდღიურად მილიარდი დოლარის ხარჯვა ამ უაზრო ომისთვის. საინტერესო იქნება, ამერიკის ოფიციალური პირების, პრეზიდენტის, ვიცე-პრეზიდენტის, სახელმწიფო მდივნის და თავდაცვის მინისტრის განცხადებები შევადაროთ ერთმანეთს. მათში ძალიან ბევრი ურთიერთგამომრიცხავი წინადადებებია. ტრამპი აცხადებს, რომ ჩვენი მიზანია ირანში რეჟიმის შეცვლა, საპირისპიროს ამბობს ჯეი დი ვენსი. თავდაცვის მინისტრი ამბობს, რომ საერთოდ აღარ არსებობს ირანის რეჟიმიო. ჩვენ ყოველთვის მივისწრაფვით მშვიდობიანი თანაცხოვრებისკენ და რეგიონში მშვიდობის დამყარებისკენ. ჩვენ, პირველ რიგში, ვიცავთ ჩვენს ტერიტორიას, მიწა-წყალს და ღირსებას.
საქართველოში ტანისამოსის ერთ-ერთი ატრიბუტი იყო ხანჯალი, ხმალი, რადგან ყოველთვის იყო ომებში, დაპირისპირებებში. ქართველი ყოველთვის მზად უნდა ყოფილიყო თავდაცვისათვის. ჩვენც მიგვაჩნია, რომ მივედით იმ დასკვნამდე, გვქონდეს მშვიდობა. ყოველთვის მზად უნდა ვიყოთ თავდაცვისთვის. შესაბამისად, ჩვენი თავდაცვისუნარიანობა უკვე კარგად გამოჩნდა, თუნდაც ირანის ფარგლებს გარეთ. ჩვენთან არც ელექტროენერგია გათიშულა, არც ენერგოკრიზისი შეგვქმნია და არც საკომუნიკაციო სისტემაში ყოფილა რაიმე პრობლემები. ეს საომარი ოპერაციები როდესაც დასრულდება, უკვე ამის შემდეგ შეიძლება საუბარი რეგიონში მშვიდობის დამყარებაზე.
ქვეყნის თავდაცვა გაგრძელდება იქამდე, ვიდრე იქნება საომარი ოპერაციები. ამაში ჩვენ საკმაოდ დიდი შესაძლებლობები გვაქვს. ჩვენ ვიბრძვით ჩვენს ტერიტორიაზე და მტერი არის ჩვენს ფარგლებს გარეთ. ჩვენი რაკეტები როდესაც მათი ავიამზიდების მიმართულებით მიდის, ისინი წინ ვეღარ მოიწევენ და პირიქით, უკან იხევენ. მტერს ერთადერთი შეუძლია – მხოლოდ ჩვენი მეზობელი ქვეყნების ტერიტორიების გამოყენება. ჩვენც ჩვენს სამეზობლოში მეზობელ ქვეყნებს ვაჩვენებდით და ახლაც დავანახეთ, რომ ირანი არის ერთ-ერთი მნიშვნელოვანი აქტორი რეგიონულ გადათამაშებებში და ირანის უგულვებელყოფა ძალიან რთულია“, – განაცხადა ირანის ელჩმა.
მისივე თქმით, „ირანის კიდევ ერთი მტერი არის ისრაელი, რომელმაც აშშ ჩაითრია ომში და საკმაოდ დიდ ხარჯებში ჩააგდო ამერიკელი გადასახადის გადამხდელები“.
„ისრაელის რეჟიმმა ღაზაში 50 000-ზე მეტ მშვიდობიან მოსახლეს, ქალსა თუ ბავშვს მოუსწრაფა სიცოცხლე. გუშინ ნეთანიაჰუმ განაცხადა, რომ ჩვენ ომი დავუწყეთ ისეთ პირობებში, როდესაც ადგილი აქვს ახალი შიიზმისა და სუნიზმის დაბადებას. ეს მესიჯი უკვე რელიგიური ომის მომასწავებელია. არადა სუნიტურ სახელმწიფოებთან ისრაელს გაფორმებული აქვს აბრაამის შეთანხმება და მაშინ რატომ ეშინია სუნიტური სამყაროსი. შესაძლოა, რომ მას თურქეთისაც ეშინოდეს, თუნდაც ეგვიპტის.
ვფიქრობ, შეიძლება ტრამპისთვის 3-4 კვირა იყოს გადამწყვეტი, მაგრამ ჩვენთვის დროს არ აქვს მნიშვნელობა. ეს ომი როდესაც დასრულდება, საკმაოდ დიდ ცვლილებას გამოიწვევს მსოფლიო გეოპოლიტიკაში. მიმაჩნია, რომ მოფიქრებული უნდა იყოს გარკვეული მექანიზმები, რათა კატასტროფის მასშტაბები არ გაიზარდოს. სამწუხაროდ, საერთაშორისო ორგანიზაციები ვერაფერს აკეთებენ. დაბომბვების დროს, ერთ-ერთი ობიექტი იყო გოგონათა სკოლა, სადაც 158 ბავშვი დაიღუპა, დაიბომბა მუზეუმი, რომელიც იუნესკო-ს კულტურული მემკვიდრეობის ჩამონათვალში იყო შეტანილი. იუნესკო-ს ამ დრომდე არ გაუვრცელებია რაიმე განცხადება. შესაძლოა, მსგავსი შემთხვევები კვლავ განმეორდეს“, – განაცხადა ირანის ელჩმა.
მომზადებულია საქართველოში ირანის საელჩოს თარგმანის მიხედვით.