ერთობლივად ჩატარებული ღონისძიების ფარგლებში, სგპ სარფში აკრძალული ნივთიერების შემცველი მედიკამენტების შემოტანის მცდელობის ფაქტი აღიკვეთა

იურისტების შემთხვევაში, დისბალანსი ჩარიცხულ სტუდენტებსა და შრომის ბაზრის მოთხოვნას შორის არის 2920, ანუ 2920 ჩარიცხული სტუდენტი არის განწირული იმისათვის, რომ იურისტის დიპლომს ვერასოდეს გამოიყენებს საკუთარ პროფესიულ საქმიანობაში, რა თქმა უნდა, ჩვენი მიზანია ამის თავიდან არიდება და, სწორედ, ამიტომ ჩატარდა შრომის ბაზრის ანალიზი, - ამის შესახებ პრემიერ-მინისტრმა ირაკლი კობახიძემ შრომის ბაზრის კვლევის პრეზენტაციისას განაცხადა.მთავრობის მეთაურმა დეტალურად ისაუბრა იმ მიმართულებებზე, სადაც შრომის ბაზრის მოთხოვნასა და უმაღლესი განათლების სისტემის მიერ გამოშვებულ სტუდენტებს შორის დისბალანსი ფიქსირდება.„კვლევაში წარმოდგენილია მონაცემები, რომელიც აჩვენებს იმას, თუ რომელია დეფიციტით გამორჩეული მიმართულებები. აშკარად ჩანს, რომ პედაგოგიკა არის ერთ-ერთი ასეთი მიმართულება, სადაც გვყავს ნაკლები სტუდენტი, ვიდრე არის შრომის ბაზრის მოთხოვნა. საინჟინრო-ტექნიკურ მიმართულებებში არის უმეტეს შემთხვევებში დაფიქსირებული დეფიციტი, ეს ეხება მშენებლობას, ანუ გვჭირდება იმაზე მეტი მშენებელი, ვიდრე, დღეს, უმაღლესი განათლების სისტემა აწვდის შრომის ბაზარს. ქიმიური ტექნოლოგია და მეტალურგია, ენერგეტიკა, ტრანსპორტი, ამ მიმართულებებითაც არის ნაკლებობა. საექთნო და სამეანო საქმე, სოციალური მუშაობა, ეს არის ის სფეროები, სადაც მკვეთრი დეფიციტი ფიქსირდება მიწოდების კუთხით.რაც შეეხება სიჭარბის მაგალითებს, სამართალი უკვე ვახსენე, სადაც არის მკვეთრი სიჭარბე, ანალოგიურად - ეკონომიკაშიც გვაქვს სიჭარბე, რაც შეეხება ბიზნესის ადმინისტრირებას, აქ, რეალურად, დაბალანსებულია მონაცემები, თუმცა აქ სხვა პრობლემას ვაწყდებით, იმის გამო, რომ კურსდამთავრებულთა კვალიფიკაციის დონე არ არის საკმარისად მაღალი, რეალურად, შრომის ბაზარზე მაინც ფიქსირდება მკვეთრი დეფიციტი. აქ არის თავსებადობა რიცხვებს შორის, ანუ რამდენსაც უშვებს უმაღლესი განათლების სისტემა, იმდენზე არის მოთხოვნა შრომის ბაზარზე, თუმცა კვალიფიკაციის პრობლემის გამო, რეალურად, მაინც შეგვიძლია ვთქვათ, რომ არის დეფიციტი ბიზნესის ადმინისტრირების მიმართულებითაც შრომის ბაზარზე.სოციალური და პოლიტიკური მეცნიერებები - აქაც ფიქსირდება ძალიან მკვეთრი დისბალანსი. არის მოთხოვნადი სპეციალობა, ძალიან ბევრი ამთავრებს, თუმცა შრომის ბაზარზე არის დაახლოებით 5-ჯერ ნაკლები მოთხოვნა, ვიდრე გვყავს კურსდამთავრებულები სოციალური და პოლიტიკური მეცნიერებების მიმართულებით. იგივე ეხება უცხო ენებს, სადაც არის მკვეთრი სიჭარბე,“- აღნიშნა პრემიერმა.

დღეს ოთხი წელი შესრულდა რუსეთ-უკრაინის ომის დაწყებიდან. ამ ომმა თავისი ხანგრძლივობით უკვე გადაასწრო დიდ სამამულო ომს, ხოლო ნგრევითა და ადამიანური ტკივილით არაფრით განსხვავდება მისგან, - ამის შესახებ საქართველოს პარლამენტის თავმჯდომარე, შალვა პაპუაშვილი წერს.როგორც პაპუაშვილი აღნიშნავს, როგორც ამერიკის შეერთებული შტატების პრეზიდენტი ამბობს, ეს არის ომი, რომელიც არასდროს უნდა დაწყებულიყო.თუმცა, მისი თქმით, დღესაც ვხედავთ ძალებს, რომელთაც ამ ომის გაგრძელება სჭირდებათ და აწყობთ.„დღეს ოთხი წელი შესრულდა რუსეთ-უკრაინის ომის დაწყებიდან. ამ ომმა თავისი ხანგრძლივობით უკვე გადაასწრო დიდ სამამულო ომს, ხოლო ნგრევითა და ადამიანური ტკივილით არაფრით განსხვავდება მისგან. ფრონტის ხაზი ისევ იქაა, სადაც 80 წლის წინ და საქართველოც ისევე განიცდის მის სიმძიმეს, როგორც მაშინ, გასული საუკუნის 40-იან წლებში. მართლაც, როგორც ამერიკის შეერთებული შტატების პრეზიდენტი დღეს ამბობს, ეს არის ომი, რომელიც არასდროს უნდა დაწყებულიყო. თუმცა, ჩვენ დღესაც ვხედავთ ძალებს, რომელთაც ამ ომის გაგრძელება სჭირდებათ და აწყობთ. დიდი ძალების ინტერესთა დაპირისპირების დროს კი, ყველაზე მძიმე ფასს იხდის ის ქვეყანა და ის ხალხი, რომლის მიწაც ბრძოლის ველად იქცევა. ეს ომი რაც შეიძლება მალე უნდა დასრულდეს. მშვიდობამ უნდა დაისადგუროს. უკრაინის სახელმწიფო უნდა გადარჩეს. უსაფრთხოების ახალი არქიტექტურა აუცილებლად უნდა დაეფუძნოს სუვერენიტეტისა და ეროვნული თვითმყოფადობის პატივისცემის პრინციპს. საქართველოს ომის დაწყების პირველივე დღიდან ჰქონდა სწორედ ეს ხედვა და ეს სულისკვეთება. ჩვენ ურთულეს გარემოში ვატარებდით მშვიდობის პოლიტიკას, როდესაც ომის მოსურნეები, გარედან წნეხით და შიგნიდან ციხის გატეხით, ცდილობდნენ ომის ცეცხლის რკალში საქართველოს ჩაბმას. თუმცა, ჩვენ ჩვენი ეროვნული ინტერესები მტკიცედ დავიცავით ოთხი წლის წინაც და მტკიცედ ვიცავთ დღესაც. დღეს, როდესაც ჩვენი რეგიონი კვლავ ახალი დაპირისპირებების საფრთხის წინაშე დგას, საქართველოსთვის სიმტკიცე, ერთიანობა და სუვერენული არჩევანის დაცვა არა მხოლოდ პოლიტიკური, არამედ ისტორიული აუცილებლობაა. სამწუხაროდ, ომი ისევ ახლოსაა და კვლავ ათასობით სიცოცხლეს დაღუპვით ემუქრება. ისევ ვერ ხერხდება მშვიდობის ფორმულის მოძებნა. ჩვენ ვლოცულობთ მშვიდობისთვის და უკრაინელი ხალხისთვის. ვუსურვებთ მათ გამძლეობას და ხანგრძლივი მშვიდობის მიღწევას,“ - წერს პაპუაშვილი.

საფრანგეთის საგარეო საქმეთა სამინისტროში დაბარებული აშშ-ის ელჩი ჩარლზ კუშნერი უწყებაში არ გამოცხადდა, რის გამოც საგარეო საქმეთა მინისტრმა, ჟან-ნოელ ბარომ დიპლომატის წინააღმდეგ ზომების მიღების ბრძანება გასცა.ჟან-ნოელ ბარომ კუშნერი ფრანგი ულტრამემარჯვენე აქტივისტის, კვენტინ დერანკის მკვლელობასთან დაკავშირებული კომენტარების გამო დაიბარა, რომელიც აშშ-ის საელჩომ გამოაქვეყნა. დიპლომატიური წყაროს ინფორმაციით, საფრანგეთი მიიჩნევს, რომ ეს შიდა საქმეებში ჩარევაა.„ელჩი ჩარლზ კუშნერი დღეს საგარეო საქმეთა სამინისტროში გამოიძახეს. ის არ გამოცხადდა“, – განაცხადა დიპლომატიურმა წყარომ.დიპლომატიური წყაროს ცნობით, გამოუცხადებლობის გამო, საფრანგეთის საგარეო საქმეთა მინისტრმა გადაწყვიტა ამერიკელი დიპლომატის წინააღმდეგ „სანქციების“ დაწესება. მან შეზღუდა კუშნერის პირდაპირი წვდომა საფრანგეთის მთავრობის წევრებთან, თუმცა კუშნერს კვლავ შეეძლება საელჩოში საქმიანობის გაგრძელება და საგარეო საქმეთა სამინისტროში გამოცხადება დიპლომატიური შეხვედრებისთვის, რომლებიც უთანხმოებების მოგვარებას ისახავს მიზნად.ცნობისთვის, ჩარლზ კუშნერის ვაჟი, ჯარედ კუშნერი შეერთებული შტატების პრეზიდენტის, დონალდ ტრამპის ქალიშვილზე, ივანკა ტრამპზეა დაქორწინებული.

რა ცვლილებები იგეგმება საარჩევნო კოდექსში?! პარლამენტში წარდგენილი ინიციატივა საერთაშორისო დამკვირვებლებს და მათ თანმხლებ თარჯიმნებს შეეხება.ცვლილებების მიხედვით, საერთაშორისო დამკვირვებლის სტატუსს მხოლოდ უცხო ქვეყნის მოქალაქე - 18 წელს გადაცილებული პირი მიიღებს.განისაზღვრება მათი თანმხლები თარჯიმნების რეგისტრაციის წესიც. ფოტო, ვიდეო და აუდიო ჩანაწერების უფლების მიღებას კი თავად ცესკო განსაზღვრავს.ინიციატივა პარლამენტის იურიდიულ საკითხთა კომიტეტს ეკუთვნის. სრულად იზიარებენ ინიციატივას მმართველ გუნდში.პარლამენტის თავმჯდომარის პირველი მოადგილის, გია ვოლსკის განცხადებით, სამართლიანი არჩევნების ჩატარება ყველანაირ ექსტრემიზმს მოუსპობს განვითარების პერსპექტივას."ყველანაირად ხელს შევუწყობთ იმას, რომ საერთაშორისო დამკვირვებლებმა, პროფესიონალებმა იმუშაონ საქართველოში და პირუთვნელი დასკვნა წარმოადგინონ, ისევე, როგორც ეუთომ წარმოადგინა დასკვნა, რომელიც გააფთრებული შეტევის ობიექტად იქცა.სამართლიანი არჩევნების ჩატარება ყველანაირ ექსტრემიზმს მოუსპობს განვითარების პერსპექტივას, ამის შიში აქვთ ზოგიერთებს. ვფიქრობ, საერთაშორისო დონეზე, ამ საკითხის შეფასება იქნება პოზიტიური", - განაცხადა გია ვოლსკიმ.

"ქართულმა ოცნებამ“ საქართველოს ევროპული ინტეგრაციის კურსი არა მხოლოდ შეაჩერა, არამედ ფაქტობრივად საპირისპიროთი შეცვალა, - ამის შესახებ ევროპარლამენტარ რასა იუკნევიჩიენეს მიერ საქართველოს შესახებ მომზადებულ ანგარიშის პროექტში წერია.საქართველოს შესახებ ანგარიშის პროექტს რასა იუკნევიჩიენე 25 თებერვალს ევროპარლამენტის საგარეო საქმეთა კომიტეტში წარადგენს.ანგარიშის პროექტი სრულ სოლიდარობას უცხადებს ქართველ ხალხს, რომელიც „დემოკრატიული უკუსვლის, რეპრესიების, მტრული რიტორიკის, დეზინფორმაციისა და მუქარის ფონზე ევროპული და დემოკრატიული საქართველოსთვის ბრძოლას განაგრძობს“.ანგარიში აღნიშნავს „იმ ფაქტს, რომ უკუსვლა ფიქსირდება ცხრავე პრიორიტეტის განხორციელებაში, რაც საქართველოსთვის კანდიდატის სტატუსის მინიჭების პირობას წარმოადგენდა“.პროექტი „ხაზს უსვამს „ქართული ოცნების“ განცხადებების აბსურდულობას იმის შესახებ, რომ ევროკავშირში ინტეგრაცია მთავარ პრიორიტეტად რჩება, მაშინ როდესაც მისი უმაღლესი თანამდებობის პირები და მთავრობასთან დაკავშირებული მედია სისტემატურ კამპანიას აწარმოებენ და ევროკავშირის, მისი ოფიციალური პირებისა და დიპლომატების წინააღმდეგ მანიპულაციურ ნარატივებს, დეზინფორმაციასა და შეთქმულების თეორიებს ავრცელებენ“ და „გმობს იმ ფაქტს, რომ 2024 წლის ოქტომბრის გაყალბებული საპარლამენტო არჩევნების შემდეგ, „ქართულმა ოცნებამ“ სრული ავტორიტარიზმისკენ სვლა კიდევ უფრო გააძლიერა“. ანგარიში „ხაზს უსვამს, რომ ევროკავშირისა და მისი წევრი სახელმწიფოების მიერ დაწესებული მიზანმიმართული პერსონალური სანქციები ბიძინა ივანიშვილის, „ქართული ოცნების“ ლიდერების, მოსამართლეების, პროკურორებისა და სხვა თანამდებობის პირების წინააღმდეგ, რომლებიც პასუხისმგებელი არიან საქართველოში დემოკრატიულ უკუსვლაზე, არჩევნების გაყალბებაზე, ადამიანის უფლებების დარღვევებზე და პოლიტიკური ოპონენტებისა და აქტივისტების დევნაზე, დაუსჯელობის წინააღმდეგ მნიშვნელოვან ინსტრუმენტს წარმოადგენს“.ასევე, პროექტი „შეუძლებლად მიიჩნევს საქართველოს ხელისუფლებასთან ურთიერთობას იქამდე, ვიდრე მათი რეპრესიების, შეზღუდვებისა და ევროკავშირის წინააღმდეგ მიმართული დეზინფორმაციის მიმდინარე კურსის შეცვლა არ მოხდება“.დოკუმენტი „აღნიშნავს, რომ 2025 წლის 4 ოქტომბრის მუნიციპალურ არჩევნებს ოპოზიციური პარტიების უმრავლესობამ ბოიკოტი გამოუცხადა და მწუხარებას გამოთქვამს, რომ საქართველოს საარჩევნო კოდექსში შეტანილმა ცვლილებებმა ადგილობრივი დამკვირვებლების, მედიისა და საარჩევნო სუბიექტების რეგისტრაციის შესახებ ახალი შეზღუდვები დააწესა“.ანგარიში „ხაზს უსვამს გრანტების შესახებ კანონში 2026 წლის 28 იანვარს გამოცხადებულ ცვლილებებს, რაც მნიშვნელოვნად აფართოებს იმის მნიშვნელობას, თუ რა ითვლება „გრანტად“ და უცხოეთიდან მთავრობის წინასწარი ნებართვის გარეშე დაფინანსების მიღებას სისხლის სამართლის დანაშაულს ხდის“. პროექტი „შეშფოთებას გამოთქვამს იმის გამო, რომ "ქართულმა ოცნებამ“ უკვე არაერთი კანონპროექტი მიიღო, რომელიც მიზნად ისახავს სამოქალაქო საზოგადოებისა და დამოუკიდებელი მედიის ჩახშობას“ და ანგარიში „ყველა პოლიტიკური პატიმრისა და სხვა უკანონოდ დაკავებული პირის დაუყოვნებლივ გათავისუფლების მოწოდებით კიდევ ერთხელ გამოდის“.„გმობს „ქართული ოცნების“ მიერ პოლიტიკური ოპონენტების დევნას, მათ უკანონო დაკავებას, მუქარასა და ფიზიკურ თავდასხმებს და პოლიტიკური ნიშნით დაკავებული ყველა ოპოზიციონერი პოლიტიკოსის დაუყოვნებლივ გათავისუფლების მოწოდებით გამოდის“. ანგარიში „შეშფოთებას გამოხატავს საქართველოს პარლამენტის 88 წევრის მიერ შეტანილ საკონსტიტუციო სარჩელთან დაკავშირებით, მათ მიერ სამი ძირითადი ოპოზიციური პარტიის საქმიანობის არაკონსტიტუციურად გამოცხადების შესახებ“.ასევე, ანგარიში „მიესალმება ეუთო-ს მოსკოვის მექანიზმის ამოქმედებას“ და „აღნიშნავს, რომ კომისიის წინადადება საქართველოს დიპლომატიური, სამსახურებრივი და ოფიციალური პასპორტების მფლობელებისთვის უვიზო მიმოსვლის შეჩერების შესახებ, „ქართული ოცნების“ რეჟიმის მიერ ფუნდამენტური ღირებულებების დარღვევის პირდაპირ შედეგს წარმოადგენს. მწუხარებას გამოვთქვამთ, რომ დემოკრატიულ უკუსვლასა და რეპრესიებზე პასუხისმგებელი ქართველი ოფიციალური პირებისთვის ევროკავშირის მასშტაბით უვიზო მიმოსვლის აკრძალვა უნგრეთისა და სლოვაკეთის წინააღმდეგობის გამო შეუძლებელი გახდა. გაფრთხილებით აღნიშნავს, რომ საქართველოს ხელისუფლების მხრიდან უმოქმედობამ შესაძლოა მთელი ქვეყნის მოსახლეობისთვის უვიზო მიმოსვლის შეჩერება გამოიწვიოს“.პროექტში აღნიშნულია, რომ „ევროკავშირის უმაღლესი წარმომადგენლის განცხადებებთან და სანქციებთან დაკავშირებით საბჭოს გადაწყვეტილებებთან საქართველოს შესაბამისობის დონე 40%-მდე დაეცა. იმედგაცრუებას იწვევს ის, რომ უკრაინის მხარდამჭერ საერთაშორისო და ევროკავშირის ინიციატივებთან საქართველო სისტემატურ თანხვედრაში არ არის“. ანგარიში „საქართველოს ხელისუფლებას თანამშრომლობის გაძლიერებისკენ მოუწოდებს, რათა საქართველოს ტერიტორიის ევროკავშირის სანქციებისგან თავის არიდების მიზნით გამოყენება არ დაუშვას“, ასევე, „აღნიშნავს, რომ „ქართულმა ოცნებამ“ ევროატლანტიკური ინტეგრაციის გზის მიტოვების შემდეგ ჩინეთთან, რუსეთთან და ირანთან თანამშრომლობის მიმართულება აირჩია“.ანგარიშის პროექტი „კიდევ ერთხელ მკაცრად გმობს რუსეთის მიერ საქართველოს რეგიონების, აფხაზეთისა და სამხრეთ ოსეთის, მიმდინარე ოკუპაციასა და „ბორდერიზაციის“ პროცესს, რაც საქართველოს სუვერენიტეტისა და ტერიტორიული მთლიანობის დარღვევას წარმოადგენს“.