აქციის მონაწილეები თბილისის სახელმწიფო უნივერსიტეტიდან მსვლელობით საკანონმდებლო ორგანოსკენ მიემართებიან.
აქციის მონაწილეთა ძირითადი მოთხოვნებია აქციებზე დაკავებულთა გათავისუფლება და ახალი საპარლამენტო არჩევნების ჩატარება.
მსვლელობას შეუერთდნენ „ნაციონალური მოძრაობის“ წევრებიც. პარტიის ერთ-ერთი ლიდერის, პეტრე ცისკარიშვილის განცხადებით, აქციაზე დღეს იმყოფებიან საკრებულოების მოქმედი წევრები „ნაციონალური მოძრაობიდან“, რომელთა მკაფიო პოზიციაა, რომ არ აპირებენ 4 ოქტომბრის „სპეცოპერაციაში“ მონაწილეობას.
„აქ ჩვენი პარტიის მხრიდან აბსოლუტური უმრავლესობა არიან საკრებულოს წევრები, მოქმედი საკრებულოს დეპუტატები, რომლებსაც აქვთ ძალიან მკაფიოდ ჩამოყალიბებული აზრი, რომ რუსულ სპეცოპერაციაში შესვლა 4 ოქტომბერს არის დაუშვებელი. იქ მონაწილეობა ბიძინა ივანიშვილის წისქვილზე დაასხამს წყალს, ამიტომ მათ აქვთ ძალიან მკაფიოდ ჩამოყალიბებული პოზიცია იმასთან დაკავშირებით, რომ არ შეიძლება ამ პოლიტიკური ნაბიჯის გადადგმა და ასეთი შეცდომის დაშვება“, – განაცხადა პეტრე ცისკარიშვილმა.
ამასთან, ცისკარიშვილი ნეგატიურად აფასებს იმ ფაქტს, რომ „ლელომ“ და პარტიამ „გახარია – საქართველოსთვის“ გადაწყვიტეს არჩევნებში მონაწილეობა.
„ჩვენ პოლიტიკოსები ვართ და ამ ქვეყანაში სამართლიანი და თავისუფალი სამართლიანი არჩევნები როცა ჩატარდება კონკურენტულ გარემოში, პოლიტპატიმრების გარეშე, აუცილებლად მივიღებთ მონაწილეობას. სხვათა შორის, 5 ნომერიც სწორედ ამ მიზნით შევინარჩუნეთ, რადგან ჩვენი პოლიტიკური იდენტობის, ბრენდის ნაწილია. 5-იანით ვიასპარეზებთ შემდგომ თავისუფალ და სამართლიან არჩევნებში, მაგრამ 4 ოქტომბერს რაც ტარდება, ამას არჩევნებს ვერ ვუწოდებთ, ეს არის სპეცოპერაცია და ძალიან ცუდს შვრებიან, თუ ამ სპეცოპერაციაში აპირებენ შეჰყვნენ ბიძინა ივანიშვილს და მიიღონ მონაწილეობა“, – განაცხადა ცისკარიშვილმა.