დონალდ ტრამპმა ამერიკული მედია ირანზე ავიაიერიშის შედეგების შესახებ გავრცელებული ინფორმაციის გამო გააკრიტიკა

ირანთან 12 დღიანი დაპირისპირების შემდეგ ისრაელის მთელ ტერიტორიაზე საგანგებო მდგომარეობასთან დაკავშირებული ყველა შეზღუდვა მოხსნილია. აღდგა სასწავლო და სამუშაო პროცესი. გაიხსნა საჰაერო სივრცე, ბენ გურიონის და ჰაიფას აეროპორტები სრული ოპერირების რეჟიმში გადავიდნენ.მიმართვა გაავრცელა ისრაელის პრემიერ-მინისტრმა. ბენიამინ ნეთანიაჰუმ სამხედრო კამპანია ისტორიულ გამარჯვებად შეაფასა, რადგან ისრაელმა, მისი თქმით, აღმოფხვრა ირანიდან მომდინარე ორი ეგზისტენციალური საფრთხე - ბირთვული იარაღი და ბალისტიკური რაკეტები.ისტორიულ გამარჯვებას თავის მხრივ ზეიმობს ირანიც. ქვეყნის პრეზიდენტის განცხადებით, მტერმა ვერ მიაღწია თავის მიზნებს, მათ შორის, ბირთვული ობიექტების განადგურებას და ამ მიმართულებით კვლევის შეწყვეტას.სამშვიდობო შეთანხმებას ეხმაურება აშშ-ის პრეზიდენტი. დონალდ ტრამპი დასაშვებად მიიჩნევს ირანში რეჟიმის ცვლილებას და ამასთანავე აღნიშნავს, რომ სურს, რეგიონში ვითარება რაც შეიძლება სწრაფად დამშვიდდეს.

ირანში „მოსადის“ სასარგებლოდ ჯაშუშობაში ბრალდებული სამი პირი სიკვდილით დასაჯეს. ამის შესახებ ინფორმაციას „როიტერი“ ირანულ მედიაზე დაყრდნობით ავრცელებს.მედიის ცნობით, მამაკაცებს ადანაშაულებდნენ ისრაელის სპეცსამსახურებთან თანამშრომლობაში და მათთვის აღჭურვილობის მიწოდებაში, რომელიც ერთ-ერთი პირის მკვლელობისთვის იყო გამოყენებული.ამასთან, გავრცელებული ცნობებით, ისრაელთან 12-დღიანი შეიარაღებული დაპირისპირების მიმდინარეობისას ირანში ისრაელთან კავშირებისთვის 700 ადამიანი დააკავეს.

უკრაინის პრეზიდენტმა, ვოლოდიმირ ზელენსკიმ და საფრანგეთის პრეზიდენტმა, ემანუელ მაკრონმა ჰააგაში, ნატო-ს სამიტის ფარგლებში შეხვედრა გამართეს. ამის შესახებ ინფორმაციას უკრაინის პრეზიდენტი სოციალურ ქსელში ავრცელებს.ვოლოდიმირ ზელენსკის განცხადებით, შეხვედრის დროს მხარეებმა შეაფასეს შემდგომი ერთობლივი ნაბიჯები და განიხილეს „დიპლომატიური სამუშაო რუსეთზე ზეწოლის მოსახდენად“.„განვიხილეთ ჩვენი საჰაერო ფლოტის დამატებითი „მირაჟებით“ გაფართოების შესაძლებლობა, საბრძოლო დრონების ერთობლივი წარმოება და ინვესტიციები“, –  აღნიშნა ვოლოდიმირ ზელენსკიმ.ლიდერებმა ასევე განიხილეს ე.წ. მსურველთა კოალიციის განვითარების საკითხი.როგორც უკრაინის პრეზიდენტი წერს, ნატო-ს სამიტისგან მხარეები ელოდებიან რუსეთის წინააღმდეგ უფრო მკაცრი სანქციების დაწესებას.

„ჩვენ მივაღწიეთ ისტორიულ გამარჯვებას“ - ამის შესახებ ისრაელის პრემიერ-მინისტრმა, ბენიამინ ნეთანიაჰუმ, ვიდეომიმართვაში განაცხადა, რომელიც ოპერაცია „აღმავალი ლომის“ შეჯამებას ეხებოდა.ნეთანიაჰუ აცხადებს, რომ ისტორიული მოვლენა - აშშ-ის მიერ ირანზე დარტყმები ისრაელის მხარდასაჭერად - იმ დიპლომატიური კამპანიის ნაყოფია, რომელსაც ის მინისტრ რონ დერმერთან ერთად ხელმძღვანელობდა.„ისრაელს არ ჰყოლია ტრამპზე უკეთესი მეგობარი და დიდი მადლობა მინდა გადავუხადო მას ჩვენი ერთობლივი მუშაობისთვის“ - აცხადებს ნეთანიაჰუ.ამასთან, ნეთანიაჰუმ მკაცრად გააფრთხილა ირანი:„თუ ვინმე, ვინც არ უნდა იყოს ირანში, შეეცდება ამ პროგრამის აღდგენას, ჩვენ იმავე სიმტკიცით და ძალით ვიმოქმედებთ, რათა აღვკვეთოთ ნებისმიერი მცდელობა. ვიმეორებ, ირანს არ ექნება ბირთვული იარაღი“.

მოვუწოდებ საქართველოს ხელისუფლებას, გაათავისუფლოს ყველა ჟურნალისტი, აქტივისტი და ის ადამიანები, რომლებიც უსამართლოდ არიან დაკავებული, – ამის შესახებ გაფართოების საკითხებში ევროკომისარი მარტა კოსი სოციალურ ქსელში წერს.„ოპოზიციური ხმების დაპატიმრება საქართველოს დემოკრატიულ საფუძვლებზე თავდასხმაა, რომელიც დღითიდღე ირღვევა. მე ვდგავარ იმ ადამიანების გვერდით, რომლებიც იბრძვიან თავისუფალი და პლურალისტური ქართული საზოგადოებისთვის და მოვუწოდებ საქართველოს ხელისუფლებას, რომ გაათავისუფლოს ყველა ჟურნალისტი, აქტივისტი და ის ადამიანები, რომლებიც უსამართლოდ არიან დაკავებული“, – წერს მარტა კოსი.