სახელმწიფო უსაფრთხოების სამსახური აცხადებს, რომ სამსახურებრივი უფლებამოსილების ბოროტად გამოყენებისა და უკანონო შემოსავლების ლეგალიზაციის ბრალდებით დაკავებულ რომეო მიქაუტაძეს უკანონო გზით მილიონობით ლარის სარგებელი აქვს მიღებული.
bm.ge დაინტერესდა, რა ქონებით მოვიდა და რა ქონებით დატოვა საჯარო სამსახური საქართველოს ეკონომიკისა და მდგრადი განვითარების მინისტრის ყოფილმა მოადგილემ რომეო მიქაუტაძემ. ანტიკორუფციული ბიუროს ვებგვერდის თანახმად, ის დეკლარაციების შევსებას 2017 წელს იწყებს, როცა იმჟამინდელი ენერგეტიკის მინისტრის, კახა კალაძის მოადგილე გახდა.
მიქაუტაძის ქონებრივი დეკლარაციების ანალიზი აჩვენებს, რომ 2017 წლიდან 2024 წლამდე პერიოდში მისი და მისი ოჯახის წევრის საკუთრებაში არსებული აქტივები მნიშვნელოვნად გაიზარდა. ცვლილებები ფიქსირდება როგორც უძრავ ქონებაში, ასევე ფინანსურ აქტივებსა და ვალდებულებებში.
უძრავი ქონება
თუ 2017 წელს მიქაუტაძეს თბილისში ერთ ბინა (113.44 კვ.მ, ჩუქებით მიღებული 2011 წელს) ჰქონდა და მეუღლე ფლობდა:
- ბინას ბათუმში (44 კვ.მ, ნასყიდობა 2017, $20,000),
- მანსარდს თბილისში (48 კვ.მ, ნასყიდობა 2011, $10,000),
2024 წლის დეკლარაციით მათ საკუთრებაში დამატებით არის:
- ბინა მადრიდში — 120 კვ.მ, შეძენილი 660,000 ევრო (შეძენილი 2024);
- ბინა ჭავჭავაძის გამზირზე — 240,000 დოლარი (შეძენილი 2018);
- სასტუმრო ბეთლემის ქ. 15 (479.71 მ²) — 825,000 დოლარი (შეძენილი 2020);
- სასტუმროს ეზო ბეთლემის ქ. 15 (300 მ²) — 0 ლარი (შეძენილი 2021);
- მიწის ნაკვეთი წყნეთში — 320,000 დოლარი (შეძენილი 2023);
- მიწის ნაკვეთი დედოფლისწყაროში — 12,000 დოლარი (შეძენილი 2022);
- სარდაფი (127.4 მ²) — შეძენილი 2019;
- სათავსო — შეძენილი 2018.
მოძრავი ქონება და კრიპტოაქტივები
2017 წელს: მხოლოდ ერთი მსუბუქი ავტომანქანა – Mini Cooper Paceman, 23,000 ევრო ღირებულებით.
2024 წელს: დეკლარაციაში არ ფიქსირდება ახალი მანქანები, მაგრამ პირველად ჩნდება კრიპტოაქტივები:
- 13,000 აშშ დოლარის ღირებულების Ripple.
- 3,000 აშშ დოლარის ღირებულების Shiba Inu (84 მილიონი ერთეული).
საბანკო ანგარიშები და ნაღდი ფული
2017 წელს:
- საბანკო ანგარიშებზე: დაახლოებით 4,200 დოლარი და 4,280 ლარი.
- ოვერდრაფტი და საკრედიტო ბალანსი ჯამურად 421,000 ლარამდე.
2024 წელს:
- საბანკო ანგარიშებზე ფიქსირდება მცირე დადებითი ნაშთები.
- თუმცა დეკლარაციაში პირველად ჩნდება 115,000 აშშ დოლარის ოდენობის ნაღდი ფული – დანაზოგის სახით.
ვალდებულებები
ფინანსურ ვალდებულებებში მნიშვნელოვან ცვლილებებს ვხედავთ: თუ 2017 წელს ჰქონდა მხოლოდ 420,000 ლარის ოდენობის სესხი, 2024 წლისთვის ოჯახს რამდენიმე ახალი სესხი აქვს:
- მცირე ბიზნესის სესხი – 85,000$;
- იპოთეკური სესხი – 100,000$;
- ორი სესხი სასტუმროებზე – 685,000 და 230,000 ევრო.
შემოსავლები, ანაზღაურება და საჩუქრები
2017 წელს: დეკლარაციაში დაფიქსირებულია დივიდენდებიდან მიღებული 10,000 ლარი.
2024 წელს:
- რომეო მიქაუტაძის ანაზღაურება – 85,470 ლარი ( მინისტრის მოადგილეობის).
- მეუღლის საერთო ანაზღაურება რამდენიმე კომპანიაში მუშაობიდან – 266,230 ლარი.
- მიღებულია საჩუქარი – 10,000 დოლარი დედისგან.
- დამატებითი შემოსავლები – ვალების დაბრუნება, ყოველდღიური ხარჯებისთვის თანხები, სამედიცინო ხარჯები და სხვა – ათეულობით ათასი ლარისა და უცხოური ვალუტის ოდენობით.
სამეწარმეო საქმიანობა
დეკლარაციების შედარება აჩვენებს, რომ სამეწარმეო აქტივობა მნიშვნელოვნად გაფართოებულია როგორც ბიზნესის რაოდენობის, ასევე სფეროების მიხედვით. 2017 წელს: მეუღლე, ნინო მიქაუტაძე ფლობდა 100%-იან წილს და იყო დირექტორი შპს “Little One”-ში
- 2024 წლის დეკლარაციაში ჩანს, რომ რომეო მიქაუტაძე იყო მეწილე შპს „ჯორჯიან ენერგო სერვისში“ და შპს „როქსთოუნში“ (ორივე შემთხვევაში მონაწილეობა დასრულდა 01.12.2023), ასევე არის მეწილე შპს „ბლუბერი ლაბში“ (მონაწილეობა უვადოა).
- ნინო მიქაუტაძის მონაწილეობა: ნინო მიქაუტაძე 2024 წლის დეკლარაციით არის დირექტორი შპს „პარაგონსა“ და შპს „ვიუ ფოინთში“, ასევე მეწილე შპს „პარაგონსა“ და შპს „ვიუ ფოინთში“. გარდა ამისა, მან დაასრულა მონაწილეობა შპს „ლითლ ვან“, შპს „მ და ბ“ და შპს „მინი მი Georgia“ კომპანიებში.
- 2017 წლის დეკლარაციაში ნინო მიქაუტაძე იყო 100%-იანი მესაკუთრე-დირექტორი შპს „Little One“-ში
რაც შეეხება მიქაუტაძის ოჯახის სხვა შემოსავლებს და გასავლებს თანამდებობიდან წასვლამდე. დეკლარაციით ირკვევა, რომ მინისტრის მოადგილეს აქტიურად უბრუნებდნენ სხვადასხვა პირები ვალს.
რომეო მიქაუტაძე:
- ვალი შემოსავალი: 16400 EUR (ეთერ მთვრალაშვილის მიერ განხორციელებულია 3 ჩარიცხვა).
- ვალი შემოსავალი: 4000 GEL (ეთერ მთვრალაშვილის მიერ განხორციელებულია ჩარიცხვა).
- ვალი შემოსავალი: 17600 GEL (გიორგი ქურცუას მიერ დაბრუნებული ვალი, 6 ჩარიცხვა).
- ყოველდღიური საყოფაცხოვრებო ხარჯებისათვის შემოსავალი: 5000 USD (საკანდელიძე გიორგი).
- ყოველდღიური საყოფაცხოვრებო ხარჯებისათვის შემოსავალი: 18000 GEL (ნიკოლეიშვილი თამარ).
- ყოველდღიური საყოფაცხოვრებო ხარჯებისათვის შემოსავალი: 25000 GEL (სალუქვაძე ეკატერინე).
- ყოველდღიური საყოფაცხოვრებო ხარჯებისათვის შემოსავალი: 30000 GEL (ყუფარაძე მერი).
- ყოველდღიური საყოფაცხოვრებო ხარჯებისათვის შემოსავალი: 15000 GEL (ღამბაშიძე მარიამი).
- ყოველდღიური საყოფაცხოვრებო ხარჯებისათვის შემოსავალი: 15000 GEL (ასლანიშვილი ლელა).
- ქონების მართვა: 65000 GEL (ბადალაშვილი მერაბ);
- რომეო მიქაუტაძის მიერ მეგობრისთვის შეძენილი საჩუქრის ღირებულება: 6859 GEL, შპს “კოლიბრი”;
- რომეო მიქაუტაძის სამოგზაურო ხარჯები მეგობრებთან ერთად: 18 000 ევრო.