გიდასტურებთ, ჩემი მკაფიო პოზიცია იყო, რომ მელია იყო დასაკავებელი. მელია მართლა იყო დასაკავებელი, რადგან სამაჯურის სროლა იყო სახელმწიფოს გამოწვევა და სახელმწიფოს, რა თქმა უნდა, უნდა ემოქმედა. ეს გააკეთა იმისთვის, რომ სახელმწიფო გამოეწვია, ჩვეულებრივი ხულიგანი პოლიტიკოსია, – ამის შესახებ საქართველოს შინაგან საქმეთა ყოფილმა მინისტრმა, ყოფილმა პრემიერმა, გიორგი გახარიამ საგამოძიებო კომისიის სხდომაზე განაცხადა.
გახარიას თქმით, მისი პოზიცია იყო მელიას დაკავება, თუმცა მიაჩნდა, რომ ეს უნდა მომხდარიყო იმ მომენტში და იმ ფორმით, რომ შემდგომ მელიას ამნისტირება და გაშვება არ გამხდარიყო საჭირო.
„კობახიძე მოვიდა, მთხოვა, ძალიან მთხოვა, რომ მივსულიყავი, რადგან უჭირდა პარლამენტარებთან. მივედი, გავაკეთე ის, რაც გავაკეთე. ამის შემდგომ მოხდა ის, რაც მოხდა და უკვე ჩვენ მივყვებით ოპერატიულად ამ პროცესს. დილით სამსახურში მოვედი ჩვეულებრივად, როგორც ყოველდღე, არანაირი აზრი, არც გადადგომა, საერთოდ არაფერი, ჩვეულებრივად მივყვებოდით დღეს. ამის შემდგომ რამდენჯერმე შევიკრიბეთ პარტიაში, იქ, სადაც თქვენ არცერთი არ იყავით. სხვადასხვა აზრი იყო. ზოგი ამბობდა, დავიჭიროთ, ზოგი ამბობდა, არ დავიჭიროთ ახლა, ამ პირობებში და ამ გარემოში. ზოგი ამბობდა ხვალ, ზოგი – ზეგ, ზოგი – დაველოდოთ. სხვადასხვა აზრი არსებობდა. ყოველ საათში მქონდა ოპერატიული ინფორმაცია, იმ შენობაში რა ხდებოდა, ის შენობა უკვე გატენილი იყო ჩვეულებრივი ბოევიკებით, სხვადასხვა რეგიონიდან ჩამოყვანილი ხალხით, აჭარიდან, პანკისიდან, იქ უკვე გაკეთებული იყო სხვადასხვა ბარიკადი, კიბის უჯრედები დაბლოკილი და ა.შ. ჯოხებით შეიარაღებული, საბრძოლველად გამზადებული, იმ ჯოხის უკან შემდეგ რას ამოაძრობდნენ, კაციშვილმა არ იცის. ეს ოპერატიული ინფორმაცია მოდიოდა და ამაზე იყო მსჯელობა, ამიტომ შევიკრიბეთ რამდენჯერმე. მე არც მაშინ შემიცვლია პოზიცია, მაშინაც ვთვლიდი და იმის შემდეგაც ვამბობდი, რომ მელია, რა თქმა უნდა, იყო დასაკავებელი. დასაკავებელი იყო იმ მომენტში და იმ ფორმით, რომ შემდგომ მელიას ამნისტირება და გაშვება არ დაგვჭირვებოდა. ეს იყო მთავარი მიზანი და მიზეზი, რომ მელია დაგვეჭირა ისე და სამართალი აგვესრულებინა ისე, რომ არანაირი ამნისტიის მოთხოვნის რესურსი უცხოელებისთვის არ დაგვეტოვებინა, ეს არ ყოფილიყო პოლიტიკური აქტი, ეს ყოფილიყო ჩვეულებრივი კრიმინალის დაკავების აქტი. ეს იყო მთავარი. ამასაც თავი რომ დავანებოთ, ამ ღამეს დაიწყო საპოლიციო ძალების მომზადება და რაღაც მომენტში მე გამიჩნდა აზრი, რომ დავიწყოთ საუბარი, იქნებ დღეს, გამთენიისას კი არ დავაკავოთ, დავაკავოთ ხვალ საღამოს ან ზეგ საღამოს. დღეებზე იყო ლაპარაკი. დაპირება გაცემული იყო, რომ დასაკავებელია და დაპირებას მე ყოველთვის ვასრულებ და ყოველთვის შევასრულებდი. საუბარი იყო დღეებზე. ამის შემდეგ მე ვუკავშირდები პოლიტსაბჭოს ყველა წევრს, მთავრობის ყველა წევრს და ვეუბნები, რომ, მეგობრებო, დილით ადრე, თუ არ ვცდები, რვა საათი შემოგთავაზეთ, ხომ არ მოვაწყოთ პოლიტსაბჭოს სხდომა, როგორ გავაკეთოთ, რადგან რეალურად დავინახე, რომ სერიოზული შეჯახების რისკი არსებობდა. ამასობაში ჩემი კაბინეტის წევრებთან, შინაგან საქმეთა მინისტრთან, სუს-თან, ყველასთან კავშირზე ვარ, ინფორმაციები მომდის“, – განაცხადა გახარიამ.
ამასთან, გახარიამ კომისიის თავმჯდომარეს, თეა წულუკიანს მიმართა: „ამ ჩემს მიწერილზე თქვენ ამბობდით, რომ დღეს, ამ პირობებში, ამ შტერი მელიას დაკავებას აზრი არ აქვს, ამიტომ ჯობია, ეს გადავავადოთ, რამდენი ხანიც საჭიროა, რომ დაწყნარდეს სიტუაცია“.
გიორგი გახარიას განცხადებით, თეა წულუკიანის აზრი იყო ასევე, რომ საჭიროების შემთხვევაში, „ნაციონალური მოძრაობის“ ცენტრალური ოფისისთვის პენიტენციური დაწესებულების ნომერი მიენიჭებინათ. თეა წულუკიანმა საპასუხოდ განმარტა, რომ ეს თქვა მაშინ, ვიდრე მელიას იმუნიტეტს მოუხსნიდნენ.
გიორგი გახარიას თქმით, მისი გადადგომა უკავშირდებოდა პროცესებში სამართავად ბიძინა ივანიშვილის ჩართვას და არა იმას, რომ არ სურდა მელიას დაკავება.
„პოლიტსაბჭოს და მთავრობის წევრები, მე არ ვიტყვი უმრავლესობას, მაგრამ ბევრი იყო ჩემს აზრზე, ყველა ამბობდა, რომ ალბათ ასე სჯობია. ამიტომ შევიკრიბოთ დილით. შემდეგ უცებ ეს ხალხი ყველა გაქრა. ეს იყო უხილავი კაცის ხელი. ამის შემდეგ, მიუხედავად იმისა, რომ შინაგან საქმეთა მინისტრი, რომელიც, როგორც თქვენ ბრძანებთ, ქალბატონო თავმჯდომარევ, მთავრობის ხელმძღვანელს უნდა ექვემდებარებოდეს, რომ ვესაუბრებოდი და ვეკითხებოდი, აბა განსაკუთრებულ დავალებათა დეპარტამენტის ძალებში რა ხდება, უბრალოდ სიმართლეს ვერ მეუბნებოდა. მარტივი რამ მოხდა. პროცესში სამართავად, მე არ ვიცი, კონკრეტულად თქვენთან თუ სხვა ყველასთან, შემოვიდა ივანიშვილი, რომელმაც ეს პროცესი თავიდან ბოლომდე წაიღო თავის თავზე და დაიწყო ამ პროცესის მართვა. რას აპირებდა და როგორ მართავდა, წარმოდგენა არ მაქვს, მაგრამ მე ეს დადასტურებულად, ფაქტებით ვიცი და ჩემი გადადგომა იმით კი არ იყო გამოწვეული, რომ მელია არ უნდა დაგვეკავებინა, ჩემი გადადგომა გამოწვეული იყო იმით, რომ არც თქვენ, არც საქართველოს მოქალაქეებს, არავის აღარ სჭირდებოდა პრემიერი, რომელსაც მინისტრებს უმართავს ადამიანი, რომელმაც ერთი თვის წინ თქვა, პოლიტიკიდან მივდივარ და არასდროს არ დავბრუნდებიო.
მე თუ გამოვედი და ვთქვი, რომ ამაზე ვერ შევთანხმდი, მაშინ მხოლოდ და მხოლოდ დავიცავი გუნდი და სახელმწიფოს ინტერესები. დღეს გეუბნებით, მე არ გადავმდგარვარ მელიას გამო, ეს გამორიცხული საკითხია, რადგან მაშინ ისევე გულწრფელად თითოეულ თქვენგანს ვეთანხმებოდი, რომ ეს გასაკეთებელი იყო. მე გადავდექი იმის გამო, რომ ჩავთვალე, ასეთი პრემიერი არც არავის აღარ სჭირდებოდა და გავაკეთე ის, რაც გავაკეთე. მაშინ დავინახე პირველად და მაშინ გავავლე პარალელი იმასთან, რა შეიძლებოდა მომხდარიყო 20 ივნისს, რადგან თუ ასე მარტივად, მიმდინარე ღონისძიების დროს არანაირი პრობლემა არ იყო პრემიერის გვერდის ავლით, ძალოვანი სტრუქტურების და გასამხედროებული საჯარისო ქვედანაყოფების გაყვანა-გამოყვანა და მათი მოძრაობა, არაფერი უკვე გამორიცხული არ არის. მაშინ მე ეს არც დამიშვია და ამიტომ ვიღებდი ყოველთვის ყველაფერს ჩემს თავზე და დღეს გონივრული ეჭვი გამიჩნდა, რადგან 2021 წლის 18 თებერვალს რაც მოხდა, იმას უამრავი ადამიანი დაასაბუთებს“, – განაცხადა გიორგი გახარიამ.
თეა წულუკიანის კითხვაზე, „თქვენ როგორ აპირებდით მელიას დაკავებას, ნაზად?“, – გახარიამ უპასუხა: „ეფექტურად, ისე, როგორც აკავებენ ჩვეულებრივ კრიმინალს. ოპერატიულად“.