17 ოქტომბერი ვეტერანის დღეა

უკრაინის პრეზიდენტი ვოლოდიმირ ზელენსკი აშშ-ში ოფიციალური ვიზიტით ჩავიდა. როგორც ზელენსკი სოციალურ ქსელში წერს, დაგეგმილი აქვს შეხვედრები აშშ-ის პრეზიდენტ დონალდ ტრამპთან, ასევე, აშშ-ის თავდაცვისა და ენერგეტიკის კომპანიების წარმომადგენლებთან.მისივე თქმით, მაშინ, როდესაც რუსეთი ფსონს დებს ტერორზე, უკრაინა მდგრადობის უზრუნველყოფაზე მუშაობს.„უკვე ვაშინგტონში ვარ. დღეს შეხვედრები მაქვს თავდაცვის კომპანიების წარმომადგენლებთან – მძლავრი იარაღის მწარმოებლებთან, რომლებსაც ნამდვილად შეუძლიათ ჩვენი დაცვის გაძლიერება. კერძოდ, განვიხილავთ საჰაერო თავდაცვის სისტემების დამატებით მიწოდებას. დღეს ასევე შევხვდები ამერიკული ენერგეტიკული კომპანიების წარმომადგენლებს. ახლა, როდესაც რუსეთი ფსონს დებს ტერორზე ჩვენი ენერგეტიკული სექტორის წინააღმდეგ და ყოველდღიურ დარტყმებს ახორციელებს, ჩვენ ვმუშაობთ უკრაინის მდგრადობის უზრუნველსაყოფად.ხვალ დაგეგმილია შეხვედრა პრეზიდენტ ტრამპთან – და ჩვენ ველოდებით, რომ ტერორისა და ომის შეკავების იმპულსი, რომელსაც წარმატებით მიაღწიეს ახლო აღმოსავლეთში, ხელს შეუწყობს რუსეთის ომის დასრულებას უკრაინის წინააღმდეგ. პუტინი ნამდვილად არ არის უფრო მამაცი, ვიდრე „ჰამასი“ ან სხვა ნებისმიერი ტერორისტი. ძალისა და სამართლიანობის ენა გარდაუვლად იმუშავებს რუსეთის წინააღმდეგაც. უკვე ვხედავთ, რომ მოსკოვი ჩქარობს დიალოგის განახლებას, როგორც კი „ტომაჰავკების“ შესახებ გაიგებს. მშვიდობისა და საიმედოდ გარანტირებული უსაფრთხოების გარდა ალტერნატივა არ უნდა არსებობდეს – და უმნიშვნელოვანესია, რაც შეიძლება მალე დავიცვათ ხალხი რუსული დარტყმებისა და თავდასხმებისგან. მადლობას ვუხდი ყველას, ვინც გვეხმარება!“,- წერს ვოლოდიმირ ზელენსკი.

ჩვენ თუ გავცემთ სახელმწიფოს სახელით დიპლომს, გინდა სახელმწიფო, გინდა კერძო უნივერსიტეტში, ამ დიპლომის ხარისხი უნდა იყოს თანაბარი, რაც დღეს არ არის უზრუნველყოფილი, – ამის შესახებ საქართველოს პრემიერ-მინისტრმა, ირაკლი კობახიძემ „იმედის“ ეთერში განაცხადა.როგორც მთავრობის მეთაურმა აღნიშნა, ყველა უნივერსიტეტში ხარისხი უნდა იყოს თანაბარი, შესაბამისად, პროფესორების კვალიფიკაციაც თანაბარი უნდა იყოს ყველგან.„დღეს სხვა ვითარება გვაქვს. არ მინდა, კონკრეტულად დავასახელო უნივერსიტეტები, მაგრამ ერთ უნივერსიტეტში პროფესორების კვალიფიკაცია არის გარკვეული დონის, მეორეში არის ამაზე დაბალი, მესამეში ამაზე დაბალი და მეოთხეში ამაზე დაბალი, თბილისშიც კი, რეალურად ასეა. ამ დროს სახელმწიფო არის პასუხისმგებელი მის მიერ გაცემული დიპლომის ხარისხზე. ხარისხში იგულისხმება, რომ მაღალი კვალიფიკაციის ლექტორმა უნდა გასწავლოს, სხვანაირად მაღალი ხარისხის განათლებას ვერ მიიღებ. სახელმძღვანელოები უნდა გქონდეს, სასწავლო პროგრამას უნდა ჰქონდეს თავისი სტანდარტი და ა.შ. არაფერი არ არის დღეს უზრუნველყოფილი, მათ შორის რეგიონული კუთხითაც.რეგიონებში არის ხშირ შემთხვევაში უფრო დაბალი ხარისხის განათლება უზრუნველყოფილი, ვიდრე დავუშვათ დედაქალაქში მოქმედ რომელიმე უნივერსიტეტში კონკრეტულ ფაკულტეტზე. ამ დროს სტანდარტი რა არის, მაგალითად გერმანია რომ ავიღოთ. გერმანიაში არის უნივერსიტეტები მთელი ქვეყნის მასშტაბით. ერთ ქალაქში არის სტანდარტულად ერთი უნივერსიტეტი, გამონაკლისია ბერლინი. ისტორიიდან გამომდინარე, ორი უნივერსიტეტია, სხვა ყველგან არის ერთი უნივერსიტეტი. გარკვეული მეტ-ნაკლებობა ყველგან არის, მაგრამ ყველა უნივერსიტეტში მთელი ქვეყნის მასშტაბით, 100 უნივერსიტეტი მაინც არის, ყველგან არის უზრუნველყოფილი თანაბარი ხარისხის განათლება. რაზეც სახელმწიფო იღებს პასუხისმგებლობას, იმას აკეთებს. გინდა, მიუნხენში ისწავლე და გინდა ლიუბეკში, მნიშვნელობა არ აქვს, ხარისხი არის მეტ-ნაკლებად ერთი. ეს უნდა უზრუნველვყოთ. თუ ჩვენ გავცემთ სახელმწიფოს სახელით დიპლომს, გინდა სახელმწიფო, გინდა კერძო უნივერსიტეტში, ამ დიპლომის ხარისხი უნდა იყოს თანაბარი, რაც დღეს არ არის უზრუნველყოფილი.ასმაგი სხვაობა შეიძლება იყოს ხარისხებს შორის დღევანდელი მოცემულობით სხვადასხვა უნივერსიტეტებს შორის, ზოგან ორმაგი, ზოგან სამმაგი და ა.შ. უნდა მოხდეს ხარისხის გათანაბრება, კვალიფიკაციაც პროფესორების უნდა იყოს თანაბარი, პროგრამები უნდა იყოს თანაბარი ხარისხის, სახელმძღვანელოები და ა.შ“, – განაცხადა ირაკლი კობახიძემ.

3+1 სისტემა ძირითადად არ შეეხება სამედიცინოს, სხვა მიმართულებებით არსებითად შესაძლებელია დანერგვა, – ამის შესახებ საქართველოს პრემიერ-მინისტრმა ირაკლი კობახიძემ „იმედის“ ეთერში განაცხადა.როგორც მთავრობის მეთაურმა აღნიშნა, მაგისტრატურას კონკრეტული მიზანი უნდა ჰქონდეს, რაც დღეს არ აქვს.„ჩვენ შესაბამისი დარგის სპეციალისტებთან გვქონდა კონსულტაციები იურიდიული მიმართულებით. შემიძლია გითხრათ, რომ დაახლოებით 23 საგანი გამოვიდა ძირითადი, რაც უნდა გაიაროს სტუდენტმა და ამის მიღმა რჩება შესაძლებლობა, რომ დამატებით არჩევითი 10-მდე საგანი აიღოს, რომელსაც გაივლის და ამით სპეციალიზაციას უზრუნველყოფს. რეალურად, სავსებით საკმარისია სამი წელი იმისათვის, რომ ამ საბაკალავრო, საბაზისო ცოდნას დაეუფლოს სტუდენტი.მაგისტრატურას კონკრეტული მიზანი უნდა ჰქონდეს, რაც დღეს არ აქვს. მაგისტრატურა დღეს არის ბაკალავრიატის აბსტრაქტული გაგრძელება. კონკრეტული ამოცანები უნდა ჰქონდეს მაგისტრატურასაც, აკადემიური წერა და სხვა უნარების განვითარება. ამაზე უნდა იყოს აგებული მთლიანად ეს სისტემა. 3+1-ს აქვს ბევრი პლუსი, მათ შორის ხარჯების ეკონომია ყველა მიმართულებით, ოპტიმიზაცია, ეკონომია იქნება უზრუნველყოფილი. როდესაც 4+2-დან გადადიხარ 3+1-ზე ამით 25%-ით უზრუნველყოფ ხარჯების ეკონომიას, რესურსები სხვანაირად შეგიძლია გადაანაწილო.მეორე მნიშვნელოვანი ფაქტორი რაც არის, დაახლოებით 30 ათასი სტუდენტი აბარებს უნივერსიტეტებში ყოველწლიურად. 30 ათასით მეტი დაემატება შრომით ბაზარს, რაც ეკონომიკისთვის არის ძალიან მნიშვნელოვანი. უკვე ბევრი მიმართულება გვაქვს ჩვენ, სადაც დღეს არის კადრების დეფიციტი. ჩათვალეთ, რომ 30 ათასი ადამიანით მეტი შევა შრომით ბაზარზე ამ რეფორმის განხორციელების საფუძველზე“, – განაცხადა ირაკლი კობახიძემ.

აშშ-ის პრეზიდენტი დონალდ ტრამპი სოციალურ ქსელში წერს, რომ რუსეთის პრეზიდენტთან, ვლადიმერ პუტინთან გამართული სატელეფონი საუბარი ძალიან ნაყოფიერი იყო.როგორც დონალდ ტრამპი აღნიშნავს, ვლადიმერ პუტინმა მას ახლო აღმოსავლეთში მიღწეული წარმატება მიულოცა. ტრამპის თქმით, რუსეთის პრეზიდენტმა მადლობა გადაუხადა აშშ-ის პირველ ლედის, მელანია ტრამპს ჩართულობისთვის.როგორც ტრამპი აღნიშნავს, საუბარი ასევე შეეხო ამერიკასა და რუსეთს შორის სავაჭრო ურთიერთობებს.„დიდი დრო დავუთმეთ რუსეთსა და შეერთებულ შტატებს შორის ვაჭრობაზე საუბარს, როდესაც უკრაინასთან ომი დასრულდება. სატელეფონო საუბრის დასასრულს შევთანხმდით, რომ მომავალ კვირას გაიმართება ჩვენი მაღალი დონის მრჩევლების შეხვედრა. შეერთებული შტატების პირველ შეხვედრებს, სხვა პირებთან ერთად, უხელმძღვანელებს სახელმწიფო მდივანი მარკო რუბიო. შეხვედრის ადგილი უნდა განისაზღვროს“, – წერს ტრამპი.დონალდ ტრამპმა აღნიშნა, რომ ის და ვლადიმერ პუტინი ერთმანეთს უნგრეთში შეხვდებიან.„შემდეგ მე და პრეზიდენტი პუტინი შევხვდებით შეთანხმებულ ადგილას, უნგრეთის დედაქალაქ ბუდაპეშტში, რათა ვნახოთ, შეგვიძლია თუ არა დავასრულოთ ეს „უსახელო“ ომი რუსეთსა და უკრაინას შორის“, – აღნიშნა აშშ-ის პრეზიდენტმა.ტრამპის თქმით, ხვალ ზელენსკისთან შეხვედრა ექნება თეთრ სახლში, სადაც განიხილავს პრეზიდენტ პუტინთან საუბარს და სხვა საკითხებს.„მჯერა, რომ დღევანდელი სატელეფონო საუბრით დიდი პროგრესი იქნება მიღწეული“, – წერს ტრამპი.

სუსტი კავშირია უმაღლესი განათლების პრიორიტეტებსა და შრომის ბაზრის მოთხოვნებს შორის, საჭიროა სისტემური მიდგომა, – ამის შესახებ პრემიერ-მინისტრმა ირაკლი კობახიძემ განათლების რეფორმის პრეზენტაციისას განაცხადა.მისივე თქმით, მთავრობის ანალიზის შედეგად, ბაზრის მოთხოვნებსა და რაოდენობრივად გამოშვებულ სპეციალისტებს შორის აცდენა ხშირად ძალიან დიდია.„ჩვენ მცირე ანალიზი ჩავატარეთ, თუ როგორია თანხვედრა ბაზრის მოთხოვნებსა და რაოდენობრივად გამოშვებულ სპეციალისტებს შორის და აცდენა ხშირ შემთხვევაში არის ორმაგი, სამმაგი, ოთხმაგი და ხუთმაგიც კი. წინასწარ არავის აქვს გამოკვლეული, მაგალითად, რამდენი იურისტი გვჭირდება, რამდენი ეკონომისტი, რამდენი ინჟინერი და ა.შ. ყოველგვარი სიღრმისეული ანალიზის გარეშე ნაწილდება კვოტები უნივერსიტეტებზე და ასე უსისტემოდ წარიმართება შემდეგ ეს ყველაფერი. ამის შედეგია ის, რომ ხშირად – იურისტი, მაგალითად – ამთავრებს თავისი სპეციალობით უნივერსიტეტს და შემდეგ სრულიად სხვა მიმართულებით საქმდება, იგივე ეხება ეკონომისტებს და ა.შ. აქაც საჭიროა უფრო სისტემური მიდგომა. წინასწარ უნდა შევისწავლოთ შრომის ბაზრის მოთხოვნები, რათა ყველა სტუდენტმა შეძლოს თავისი სპეციალობით მუშაობის გაგრძელება და დასაქმება“, – განაცხადა პრემიერმა.