შსს – დაგეგმილი აქციის ორგანიზატორებსა და მონაწილეებს ვაფრთხილებთ, კანონსაწინააღმდეგო ქმედებისგან თავი შეიკავონ, წინააღმდეგ შემთხვევაში, პოლიცია მიიღებს შესაბამის ზომებს

გენდერული ძალადობა არამხოლოდ პიროვნული ტრაგედიაა, ეს ასევე არის ადამიანის ძირითადი უფლებების დარღვევა, რომელიც გავლენას ახდენს ინდივიდებზე, ოჯახებსა და საზოგადოებებზე მთელ მსოფლიოში, მათ შორის, საქართველოში, – ამის შესახებ საქართველოში ევროკავშირის ელჩის, პაველ ჰერჩინსკის განცხადებაშია ნათქვამი, რომელსაც ქალთა მიმართ ძალადობის აღმოფხვრის საერთაშორისო დღესთან დაკავშირებით ავრცელებს. როგორც ელჩი აცხადებს, სტატისტიკა ქალთა მიმართ ძალადობის საგანგაშო მასშტაბებს ავლენს. „თითქმის ყოველმა მესამემ მსოფლიოში, ცხოვრებაში ერთხელ მაინც ფიზიკური ან სექსუალური ძალადობა განიცადა. ბოლო მონაცემებით ირკვევა, რომ საქართველოში ყოველი მეორე ქალი ცხოვრების გარკვეულ ეტაპზე ძალადობას განიცდიდა. ამ გამოწვევებთან გასამკლავებლად საქართველოში ევროკავშირი აფინანსებს პროექტებს, რომლებიც გენდერული ძალადობის წინააღმდეგ საბრძოლველად სახელმწიფო და არასახელმწიფო აქტორების შესაძლებლობებს აძლიერებს. ჩვენი პროექტები ძალადობის პრევენციის მიზნით ცნობიერებას ამაღლებს და ქალებს უფასო იურიდიულ, სოციალურ ან ფსიქოლოგიურ დახმარებას უწევს. ევროკავშირის მიერ დაფინანსებული პროექტები ასევე სტერეოტიპებისა და მავნე წარმოდგენების შესაცვლელად და საინფორმაციო კამპანიების დასაწყებად მუშაობს. ასევე, ეს პროექტები SafeYou აპლიკაციის გამოყენებას უწყობს ხელს“, – ნათქვამია ჰერჩინსკის განცხადებაში. ამასთან, პაველ ჰერჩინსკის თქმით, უპირველესი გზა ქალების გასაძლიერებლად არის იმის უზრუნველყოფა, რომ მათ შიშის გარეშე და ძალადობისგან დაცულად შეძლონ ცხოვრება. „უნდა დავარღვიოთ გენდერული ძალადობის გარშემო არსებული დუმილი და სტიგმა. წელს გენდერული ძალადობის წინააღმდეგ 16-დღიანი აქტივიზმის თემა არის: „ყოველ 10 წუთში ერთხელ ქალს კლავენ. გაერთიანდით ქალების მიმართ ძალადობის დასასრულებლად“. ერთად შეგვიძლია, შევქმნათ მომავალი, რომელშიც პატივისცემა, ღირსება და უსაფრთხოება ყველასთვის გარანტირებულია“, – ნათქვამია ელჩის განცხადებაში.

ზამთრის პერიოდში, პირველი დეკემბრიდან პირველ მარტამდე გზის ცალკეულ მონაკვეთებზე სატრანსპორტო საშუალების ზამთრის საბურავებით მოძრაობა სავალდებულოა, – ამის შესახებ შინაგან საქმეთა სამინისტროს მიერ გავრცელებულ ინფორმაციაშია აღნიშნული. ამასთან, შსს-ს განმარტებით, ზამთრის პერიოდში, მეტეოროლოგიური პირობების გათვალისწინებით, პოლიციის მიერ, შესაძლოა, დაწესდეს სატრანსპორტო საშუალების არანაკლებ წამყვან თვლებზე მოცურების საწინააღმდეგო ჯაჭვის დამაგრების მოთხოვნა. „ზამთრის საბურავი უნდა აკმაყოფილებდეს შემდეგ კრიტერიუმებს: საბურავზე დატანილი უნდა იყოს სიმბოლო – ფიფქი. საბურავის პროტექტორის სიღრმე უნდა იყოს: არანაკლებ 3 მმ. მსუბუქი ავტომობილებისთვის (M1) და სატვირთოებისთვის (N1, N2, N3); არანაკლებ 4 მმ. − მიკროავტობუსისთვის (M2) და ავტობუსისთვის (M3); საბურავის დამზადებიდან არ უნდა იყოს გასული 10 წელი; საბურავზე შესაძლებელი უნდა იყოს დამზადების თარიღის წაკითხვა; ავტობუსისთვის (M3) და 3.5 ტონაზე მეტი სრული მასის მქონე სატვირთო სატრანსპორტო საშუალებისთვის (N2, N3) დასაშვებია იმგვარი ზამთრის საბურავით გადაადგილება, რომელზეც არ არის დატანილი სიმბოლო – ფიფქი. ამ შემთხვევაში საქართველოს შინაგან საქმეთა სამინისტროს დანაყოფი უფლებამოსილია, ზემოაღნიშნული კატეგორიების სატრანსპორტო საშუალებებისთვის დააწესოს არანაკლებ ერთი წამყვანი ღერძის ყველა თვალზე სათანადო მახასიათებლების მქონე მოცურების საწინააღმდეგო ჯაჭვის დამაგრების მოთხოვნა; მოცურების საწინააღმდეგო ჯაჭვი უნდა იყოს ქარხნული წესით დამზადებული, სატრანსპორტო საშუალების საბურავის ზომის შესაბამისი და თოვლით/ყინულით დაფარული გზის ზედაპირზე გამოსაყენებლად ვარგისი; მოცურების საწინააღმდეგო ჯაჭვი გამოყენებული უნდა იყოს მხოლოდ თოვლით ან/და ყინულით დაფარულ გზაზე. თუ ზამთრის საბურავი ან/და მოცურების საწინააღმდეგო ჯაჭვი არ შეესაბამება დადგენილ მოთხოვნებს, პოლიციელი უფლებამოსილია, პირს აუკრძალოს დადგენილებით განსაზღვრულ ადგილას/გზის მონაკვეთზე შესვლა; თუ ზამთრის საბურავი ან/და მოცურების საწინააღმდეგო ჯაჭვი არ შეესაბამება დადგენილ მოთხოვნებს და ამ სატრანსპორტო საშუალებით მოძრაობა საფრთხეს უქმნის საგზაო მოძრაობის მონაწილეებს, პირს, შესაძლოა, დროებით ჩამოერთვას სატრანსპორტო საშუალება და განთავსდეს დაცულ სადგომზე; ზამთრის საბურავისა და მოცურების საწინააღმდეგო ჯაჭვის მოთხოვნებთან შეუსაბამობის შემთხვევაში პირი დაჯარიმდება 100 ლარით და მართვის მოწმობისთვის მინიჭებული ქულათა რაოდენობა შეუმცირდება 5 ქულით. დეტალური ინფორმაცია ზამთრის საბურავისა და მოცურების საწინააღმდეგო ჯაჭვის სათანადო მახასიათებლების, ასევე, იმ ადგილის/გზის მონაკვეთების ჩამონათვალის შესახებ, სადაც ზამთრის პერიოდში სატრანსპორტო საშუალების მოძრაობა სავალდებულო იქნება ზამთრის საბურავებით ან/და მოცურების საწინააღმდეგო ჯაჭვით, იხილეთ ბმულზე“, – აღნიშნულია შსს-ს ინფორმაციაში.

ჩეხეთის დედაქალაქ პრაღაში მიმდინარე რაგბი ევროპის ჩემპიონატზე საქართველოს 18-წლამდე მორაგბეთა ნაკრებმა ფინალში ესპანეთი 32:11 დაამარცხა და ტურნირის გამარჯვებული ზედიზედ მეექვსედ გახდა. პირველ ტაიმში უმცროსმა „ბორჯღალოსნებმა“ სამი ლელოს დადება მოახერხეს, თავი საბა შარვაშიძემ, ანრი შველიძემ და დავით ბარბაქაძემ გამოიჩინეს, გიგი სირბილაძემ ორო ლელო ზუსტად გარდასახა, პირველი ტაიმის ბოლოს კი საჯარიმო დარტყმა ზუსტად შეასრულა. ესპნალებმა მხოლოდ ორი ჯარიმის გატანა მოახერხეს და პირველი ტაიმი ქართველმა მორგბეებმა 22:6 მოიგეს. მეორე ტაიმში საქართველოს ნაკრებმა მონაგარს კიდევ 10 ქულა მიუმატა – გიგი სირბილაძემ ერთი ჯარიმა გაიტანა, ერთ ეპიზოდში კი ესპანელები საჯარიმო ლელოთი დაისაჯნენ, ხოლო მეტოქემ ერთი ლელოს დადება მოახერხა და საბოლოოდ უმცროსმა „ბორჯღალოსნებმა“ შეხვედრა 32:11 მოიგეს. შეგახსენებთ, რომ მიმდინარე ტურნირზე ქართველმა ჭაბუკებმა მეოთხედფინალში გერმანია 67:0 დაამარცხეს, ხოლო ნახევარფინალში ნიდერლანდებს 36:5 სძლიეს.

პუტინი ისევ იმუქრება და აცხადებს, რომ რუსეთი ახალი ბალისტიკური რაკეტის, ბრძოლის ველზე გამოცდას გააგრძელებს. განცხადება კრემლის ლიდერმა თავდაცვის სამინისტროსა და სამხედრო სამრეწველო კომპლექსის ხელმძღვანელობასთან შეხვედრისას გააკეთა და ისიც აღნიშნა, რომ რუსეთი აღნიშნული რაკეტების სერიულ წარმოებას დაიწყებს.

უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინას აქვს ყველა შანსი, ომის მომავალ წელს დასასრულებლად, ხოლო 2025 წლის იანვარში ცნობილი გახდება, აშშ-ის ახალარჩეული პრეზიდენტის, დონალდ ტრამპის წინადადებები ომის დასრულების შესახებ. „მე მსურს ვიხილო, ამერიკის შეერთებული შტატების ახალი პრეზიდენტის წინადადებები. ვფიქრობ, ამ წინადადებებს უკვე იანვარში ვიხილავთ. მჯერა, გვექნება ამ ომის დასრულების გეგმა. დარწმუნებული ვარ, გვაქვს ყველა შანსი, მომავალ წელს ამის გასაკეთებლად. არსებობს შესაბამისი ნაბიჯები. ჩვენ გვესმის, რომ რუსეთი ყველა ნაბიჯზე არ წამოვა. მაგრამ არსებობს გაერო-ს წესდება და ჩვენი ყველა ნაბიჯი, რომელიც გაერო-ს წესდებას ეფუძნება, პარტნიორების მხარდაჭერას მიიღებს“, – განაცხადა მან. ზელენსკიმ ასევე აღნიშნა, რომ ტრამპთან მისი შეხვედრა ბევრ ფაქტორზეა დამოკიდებული, მათ შორის შეხვედრის ლეგიტიმურობაზე, თუმცა მოსამზადებელი შეხვედრები შესაძლებელია ინაუგურაციამდეც. „არ ვიცი, როდის იქნება შეხვედრები, არ მაქვს მონაცემები, გუნდები მუშაობენ. ბევრ რამეზეა დამოკიდებული, არა მხოლოდ გრაფიკებზე, ეს დამოკიდებულია შესაბამისი შეხვედრების ჩატარების ლეგიტიმურობაზე, თუ გვსურს შეხვედრები, სადაც რაიმე საკითხები წყდება, ეს ინაუგურაციის შემდეგ მოხდება. თუ გვექნება რაიმე მოსამზადებელი შეხვედრები, ისინი შეიძლება ინაუგურაციამდეც გაიმართოს“, – განაცხადა მან. ამავდროულად, უკრაინის პრეზიდენტმა ხაზი გაუსვა, რომ შეხვედრამდე მნიშვნელოვანია არ მიეცეს შესაძლებლობა, „ამა თუ იმ ტალღებს, ამა თუ იმ გარემოცვას დააპირისპირონ უკრაინის და აშშ-ის პრეზიდენტები“. „ეს ძალიან მნიშვნელოვანია, რადგან ამის მსურველი ბევრია“, – აღნიშნა ზელენსკიმ.