შარლ მიშელი, ურსულა ფონ დერ ლაიენი და რობერტა მეცოლა რუსეთ-უკრაინის ომის ორ წლისთავთან დაკავშირებით ერთობლივ განცხადებას აქვეყნებენ

ევროპული საბჭოს ვებგვერდზე განცხადება ევროპული საბჭოს პრეზიდენტის შარლ მიშელის, ევროკომისიის პრეზიდენტის ურსულა ფონ დერ ლაიენისა და ევროპარლამენტის პრეზიდენტის რობერტა მეცოლას სახელით ქვეყნდება.

განცხადებაში ევროკავშირის ლიდერები უკრაინას ომის დასრულებაში დახმარებას ჰპირდებიან. ისინი კიდევ ერთხელ გამოხატავენ მხარდაჭერას უკრაინის დამოუკიდებლობის, სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში. ომზე კი პასუხისმგებლობას რუსეთსა და კრემლის ხელმძღვანელობას აკისრებენ. განცხადების თანახმად, ევროკავშირი ასევე პირობას დებს, უკრაინის გვერდით იდგეს და მხარი დაუჭიროს მას ამ ომში იმდენ ხანს, რამდენიც საჭირო იქნება „უკრაინელი ხალხის, ევროპაში მშვიდობისა და უსაფრთხოების და საერთაშორისო წესრიგისთვის.“

„ევროკავშირი განაგრძობს ძლიერი და ურყევი პოლიტიკური, სამხედრო, ფინანსური, ეკონომიკური, დიპლომატიური და ჰუმანიტარული მხარდაჭერის გაწევას, რათა დაეხმაროს უკრაინას, დაიცვას თავი და მისი ხალხი, საკუთარი ქალაქები და კრიტიკულად მნიშვნელოვანი ინფრასტრუქტურა, აღადგინოს მისი ტერიტორიული მთლიანობა, დაიბრუნოს ათასობით დეპორტირებული ბავშვი და დაასრულოს ომი“, – ნათქვამია განცხადებაში.

ლიდერები ასევე ჰპირდებიან უკრაინას აუცილებელი სამხედრო დახმარების გაწევას, კერძოდ კი, კრიტიკულად მნიშვნელოვანი საბრძოლო მასალებისა და რაკეტების მიწოდებას.

„ჩვენ მივიღეთ უპრეცედენტო ზომები ევროკავშირის დონეზე ევროპული თავდაცვის ინდუსტრიის წარმოების გასაზრდელად და გავაგრძელებთ შესაძლებლობების გაზრდას, რაც საშუალებას მოგვცემს, გავაძლიეროთ ჩვენი სამხედრო მხარდაჭერა და თანამშრომლობა უკრაინასთან, ამავდროულად, განვამტკიცოთ ჩვენი თავდაცვისუნარიანობა და ევროპული სუვერენიტეტი“, – აღნიშნულია განცხადებაში.

“საზოგადოებრივი მაუწყებელი”