შალვა პაპუაშვილი: ნაცვლად უცხოელი აქტორების მზადყოფნისა, გაასაჯაროონ თავიანთი ბიუჯეტიდან დაფინანსებული პროექტები, ვხედავთ შეტევას კანონზე და მიზანს, დაფინანსების ნაწილი დარჩეს დაფარული

მისი თქმით, გამოჩნდა, რომ არგუმენტები „უცხოური გავლენის გამჭვირვალობის“ კანონის საწინააღმდეგოდ არ არსებობს.

„პრეზიდენტის წარმომადგენელს კითხვებზე, თუ რა იყო კონსტიტუციასთან შეუსაბამო, რომელი მუხლი, მას არ ჰქონდა პასუხი. მგონი, ის, რაც ჩვენ ვიხილეთ ამ კომიტეტზე, იყო ვიზუალიზაცია იმის, რაც ორ თვეზე მეტ პერიოდში დახურულ კარს მიღმა ხდებოდა. ჩვენ ვხდებოდით მათ შორის უცხოელ აქტორებს, ზუსტად ასეთი საუბრები გვქონდა ხოლმე. როცა შევდივართ ხოლმე შინაარსში, იქ არგუმენტები იკლებს და აღარ არის. კონკრეტიკაში შესვლა ყველას უჭირს. ამან კიდევ ერთხელ აჩვენა, რამხელა დეზინფორმაციულ შტურმთან გვაქვს საქმე საქართველოს მოსახლეობის წინააღმდეგ, რომელშიც ჩართული არიან შიდა და გარე აქტორები, ყველა ინსტრუმენტია გამოყენებული, დაწყებული მედიით და დამთავრებული პოლიტიკოსებით, რომ მოხდეს საქართველოს მოსახლეობის დაბნევა.  დღეს იყო პირველი შესაძლებლობა, როცა შეეძლოთ, არგუმენტები წარმოედგინათ და ის გაექცა შინაარსზე მსჯელობას. აღმოჩნდა, რომ ერთადერთი მანდატი, რაც პრეზიდენტის წარმომადგენელს ჰქონდა, არის ის, რომ სტიგმატიზაცია მოახდინოს“, – განაცხადა შალვა პაპუაშვილმა.

პარლამენტის თავმჯდომარის განცხადებით, სამწუხაროა, რომ არც უცხოელ აქტორებს აქვთ კონკრეტული არგუმენტები გამჭვირვალობის კანონთან დაკავშირებით.

„სამწუხაროა, როდესაც ვსაუბრობთ უცხოელ აქტორებზე, ნაცვლად იმისა, რომ ევროპელ ან ამერიკელ აქტორებს ეთქვათ, რომ მზად არიან გაასაჯაროონ აშშ-ის და ევროკავშირის ბიუჯეტიდან დაფინანსებული პროექტები, ჩვენ ვხედავთ შეტევას ამ კანონზე და ფაქტობრივად, ძირითადი მიზანი ამ კანონის სტიგმატიზებისა არის, რომ დაფინანსების ნაწილი დარჩეს დაფარული. დღეს დადასტურებულია, რომ საერთო ჯამში ამ კამპანიის ერთ-ერთი მიზანი არის, რომ დაფარული დარჩეს ეს თანხები და კვლავ ჰქონდეს ამერიკულ და ევროპულ ფონდებს შესაძლებლობა, რომ ფარულად იმუშაონ საქართველოში, დააფინანსონ პარტიები, პოლიტიკური ჯგუფები ისე, რომ მოსახლეობას ამაზე არაფერი უთხრან, ეს ძალიან დასანანია. ღირებულებებზე საუბრის უკან იმალება ქვეყანაში ფარული დაფინანსების პრაქტიკის გაგრძელების სურვილი, რაც შორს არის ევროპული თუ ნებისმიერი მაღალი ღირებულებისგან და მათ შორის ჩვენი წარმოდგენისგან, როგორც ჩვენ წარმოგვიდგენია ჩვენი საერთო ევროპული ღირებულებები“, – განაცხადა  შალვა პაპუაშვილმა.