ევროკავშირის საელჩოს მიერ დაფინანსებული ორგანიზაციები ემზადებიან თვითმმართველობის არჩევნების ჩაშლისთვის, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.
პაპუაშვილის თქმით, ევროკავშირის ბიუჯეტის ფული არჩევნების ჩაშლისთვის იხარჯება.
„ამ ცრუ, ყალბი კამპანიის შემდეგ, რომელიც, მათ შორის, ევროკავშირის მიერ დაფინანსებული ორგანიზაციების ხელით იყო წარმოებული, მოვისმინეთ ეუთო-ს გენერალური მდივნის განცხადება, რომ 26 ოქტომბრის არჩევნების შედეგები ასახავს ამომრჩევლის ნებას. ეს არის პასუხი ყველა იმ ქვეყნის ხელისუფლების, ბრიუსელის ბიორკრატების, ზოგიერთი ელჩის, საქართველოში მოქმედი ელჩის მიმართ, რომლებიც შეურაცხყოფას აყენებდნენ ქართველ ხალხს იმით, რომ მის მიერ არჩეული ხელისუფლების მიმართ რაღაც ცივ დამოკიდებულებას აჩვენებდნენ, თითქოს ეს არჩევნები ხინჯიანი იყო.
მას შემდეგ, რაც ეუთო-ს გენერალურმა მდივანმა თქვა, რომ სრულად ასახულია ხალხის ნება ამ არჩევნების შედეგებში, ვფიქრობ, ამ ხელისუფლებებმა – ბრიუსელმა, ზოგიერთმა ელჩმა ბოდიში უნდა მოუხადონ ქართველ ხალხს, რადგან აბრალებდნენ, თითქოს ქართულ დემოკრატიას არ აქვს იმის უნარი, ქართველმა ხალხმა თავად აირჩიოს ხელისუფლება. ეს განცხადება, მათ შორის, ეხება ზოგიერთი „ენეჯეოს“ მიერ წარმოებულ კამპანიას. კერძოდ, ნინო ლომჯარიას „ენჯეოს“ – „ჩემი ხმა“. 2024 წლის არჩევნების წინაც, თუ არ ვცდები, წარმოებაც კი იყო მათზე საარჩევნო მიზნის მქონე სუბიექტებად გამოცხადებასთან დაკავშირებით, რამდენიმე „ენჯეოზე“. მაშინ ვამბობდით, რომ ევროკავშირის საელჩო აფინანსებს სააგიტაციო კამპანიას და, მათ შორის, ეს ორგანიზაცია „ჩემი ხმა“, რომელიც რამდენიმე „ენჯეოს“ აერთიანებდა, ჩართული იყო პირდაპირ „ქართული ოცნების“ წინააღმდეგ აგიტაციაში“, – განაცხადა შალვა პაპუაშვილმა.
პარლამენტის თავმჯდომარის თქმით, ის „ენჯეოები“, რომლებიც თავს ესხმიან ცესკო-ს და არჩევნებს, ევროკავშირის ბიუჯეტიდან ფინანსდებიან მას შემდეგ, რაც აშშ-ის დაფინანსება აღარ არის ამ სფეროში.
„ვინ ჩივის „ენჯეოების“ აგიტაციას, როდესაც თავად ევროკავშირის ელჩი იყო ჩართული „ქართული ოცნების“ წინააღმდეგ აგიტაციაში, არღვევდა, დაარღვია ვენის კონვენცია, ადამიანური და დიპლომატიური ეთიკაც იმით, რომ სხვა ქვეყნის მოსახლეობაზე ცდილობდა გავლენის მოხდენას საარჩევნო შედეგიდან გამომდინარე. ახლაც იმავეს ვხედავთ და ეს არის პირველი სიგნალი. აქედანვე უნდა ვიყოთ ძალიან ხმამაღალი და მკაცრი იმ „ენჯეოების“ შეფასებაში, რომლებიც თავს ესხმიან ცესკო-ს და არჩევნებს. ეს ორგანიზაციები ფინანსდებიან ევროკავშირის ბიუჯეტიდან მას შემდეგ, რაც ვხედავთ, რომ აშშ-ის დაფინანსება ამ სფეროში აღარ არის. ზოგ ორგანიზაციაზე არც ვიცით, მათ შორის ამ ორგანიზაციაზე, უშუალოდ ვისგან, მაგრამ დაახლოებით წარმოდგენა გვაქვს. ასე რომ, ევროკავშირის ელჩის სანქცირებით ხდება დაფინანსება ორგანიზაციების, რომლებიც აქედანვე იწყებენ მუშაობას ადგილობრივი თვითმმართველობის არჩევნების ჩაშლაზე. ევროკავშირის ბიუჯეტის ფული იხარჯება საქართველოში თვითმმართველობის არჩევნების ჩაშლისთვის. ეს არის ფაქტი.
ვინაიდან შარშან ვცდილობდით, არჩევნების წინ რაღაცნაირად დაგვეზოგა ზოგი უცხოელი, ელჩი იქნებოდა თუ პოლიტიკოსი, ვხედავთ, რა შედეგი მოიტანა ამან, კიდევ უფრო უხეშად ერეოდნენ ჩვენს არჩევნებში, ამიტომ, აქედანვე უნდა ითქვას, რომ ევროკავშირის საელჩოს მიერ დაფინანსებული ორგანიზაციები ემზადებიან თვითმმართველობის არჩევნების ჩაშლისთვის. ამიტომ სრული პასუხისმგებლობა იქნება დონორებზე. ყოველ შემთხვევაზე ვიქნებით ხმამაღალი და პირდაპირ ვამხელთ როგორც ორგანიზაციას, ასევე დონორს, ვინაიდან ეს გახლავთ საერთაშორისო სამართლის დარღვევა. ჩვენი ამოცანაც არის, რომ ევროკავშირს არ დავარღვევინოთ საერთაშორისო სამართალი. ეს არის ჩვენი ხალხის სურვილიც, რომ ის რეპუტაცია, რომელიც აქვს ევროკავშირს და რომელსაც ასე აფუჭებს ბრიუსელის ბიუროკრატია, ეს რეპუტაცია შევუნარჩუნოთ. ბრიუსელის ბიუროკრატიას და ზოგიერთ დონორს არ მივცეთ შესაძლებლობა, რეპუტაცია შეულახოს ევროკავშირს, რეპუტაცია შეულახოს იმ ევროპულ ღირებულებებს, რომელზეც სიტყვით ასე ხშირად ლაპარაკობენ, საქმით კი არიან საერთაშორისო სამართლის დამრღვევები. ასე რომ, მისასალმებელია ცესკო-ს განცხადება და ჩვენც ყველა ასეთ შემთხვევაზე გვექნება ხმამაღალი რეაგირება. სუვერენული სახელმწიფოს არჩევნებში ნებისმიერ ჩარევას, ვინც არ უნდა იყოს, რომელი ორგანიზაციაც, რომელი ქვეყნის ელჩიც, არავის გავუტარებთ, ყველას ვამხელთ ასეთ მცდელობაში. ჩვენი არჩევნების ჩაშლის შესაძლებლობას უცხოელებს ნამდვილად არ მივცემთ“, – განაცხადა შალვა პაპუაშვილმა.