შალვა კერესელიძე ფრეზეთში დევნილთა დასახლებაში მცხოვრებ იძულებით გადაადგილებულ პირებს შეხვდა

ოპოზიციონერებს არანაირი შესაძლებლობა არ აქვთ, პოლიტიკაში წარმატებულები რომ იყვნენ, რადგან ისინი სხვა ქვეყნის ინტერესებს ემსახურებიან და დავალებებს გარედან იღებენ, – ამის შესახებ დედაქალაქის მერმა, კახა კალაძემ მედიასთან განაცხადა.როგორც მან აღნიშნა, ოპოზიციურ ძალებს აქამდეც არაერთხელ ჰქონიათ გაერთიანების მცდელობა, თუმცა მათ შორის შიდა დაპირისპირება აშკარად ჩანს.„გვახსოვს, მანამდე რა განცხადებებს აკეთებდნენ გაერთიანებასთან დაკავშირებით, თუმცა თავიდანვე ჩანდა, რომ ეს ყველაფერი დროებითი იყო. ჩვენ კარგად ვიცით ამ ადამიანების ერთმანეთთან დამოკიდებულება. მე გარედან როგორც ვხედავ, ბრძოლა მიდის – ვის ერქმევა მთავარი ოპოზიციური პარტია. მათ შორის არსებული დაპირისპირება აშკარად ჩანს, ამაზე ღიად საუბრობენ და ერთმანეთს თავს ესხმიან. მათ გაერთიანება ბევრჯერ სცადეს, მაგრამ წარმოუდგენელია ამ ადამიანების, ამ დაჯგუფების ერთ პლატფორმაზე შეყვანა. თუმცა, მათ წარსულს თუ გადავხედავთ, ყველა „ნაციონალურ მოძრაობაში“ აღმოცენებული ელემენტია. რეალურად, მათ არანაირი შესაძლებლობა არ აქვთ, პოლიტიკაში წარმატებულები რომ იყვნენ. ამის მთავარი მიზეზი არის ის, რომ ისინი სხვა ქვეყნის ინტერესებს, გარე აქტორებს ემსახურებიან, გარედან დავალებებს იღებენ. როდესაც ასე მოქმედებ, ქართველი ხალხის მხრიდან ვერანაირი თანადგომა ვერ გექნება.რაც შეეხება 26 მაისის აქციას, დიდი ინტერესი მათ მიმართ არ მაქვს, რადგან იმდენი საქმეა გასაკეთებელი ქალაქში, მათი ქმედებები თუ აქციები არ მაინტერესებს. ასიათასობით ადამიანი უნდა გამოსულიყო და ყველამ ვნახეთ რამდენიც გამოვიდა“, – აღნიშნა კახა კალაძემ.რაც შეეხება საქართველოს ყოფილი პრეზიდენტის, მიხეილ სააკაშვილის განცხადებას საპროტესტო აქციისა და ზოგადად ოპოზიციის შესახებ, თბილისის მერის თქმით, ეს განცხადებაც შიდა დაპირისპირებაზე მიუთითებს.„ეს კიდევ ერთხელ მიუთითებს შიდა დაპირისპირებაზე. თუ დააკვირდით, ოპოზიციას საზოგადოებისთვის არანაირი ხედვა არ წარმოუდგენია, თუ რა გეგმა აქვს ქვეყანასთან დაკავშირებით. ისინი იბრძვიან მხოლოდ იმისთვის, თუ ვინ იქნება ოპოზიციის მთავარი წარმომადგენელი. რაც შეეხება სააკაშვილის მხრიდან რევოლუციურ სცენარზე საუბარს, ვინც კი კანონს დაარღვევს, ამას შესაბამისი რეაგირება მოჰყვება. კანონის ფარგლებში, ყველას შესაბამისი პასუხი გაეცემა“, – განაცხადა კახა კალაძემ.

გაერო შეშფოთებას გამოხატავს ლიბანში ისრაელის სამხედრო ოპერაციის გამო. ამის შესახებ გაერო-ს ახლო აღმოსავლეთისა და ჩრდილოეთ აფრიკის რეგიონული ოფისი სოციალურ ქსელ X-ზე წერს.„ჩვენ სერიოზულად შეშფოთებული ვართ ისრაელის სამხედრო ოპერაციების გაძლიერებისა და მოსახლეობის გადაადგილების ბრძანებების დამანგრეველი შედეგებით. დაუყოვნებლივ საჭიროა დეესკალაცია“, – აღნიშნულია განცხადებაში.გაერო-ს განცხადებით, წინასწარი ინფორმაცია მიუთითებს, რომ ისრაელის ბოლო დარტყმების შედეგად დაღუპულთა შორის უამრავი სამოქალაქო პირია, მათ შორის ქალები და ბავშვები.მანამდე, ლიბანის ჯანდაცვის სამინისტრომ გაავრცელა ინფორმაცია, რომ ისრაელის დარტყმების შედეგად 27 მაისს, სულ მცირე, 34 ადამიანი დაიღუპა და 77 დაშავდა.

გორში მომხდარი ფაქტი არის ძალიან მძიმე და დარწმუნებული ვარ, გულგრილი ვერც ერთი ადამიანი ვერ დარჩებოდა, თუმცა ძალიან მნიშვნელოვანია, რომ შესაბამისმა სამსახურებმა რეაგირება მოახდინეს, – ამის შესახებ დედაქალაქის მერმა, კახა კალაძემ ჟურნალისტებს განუცხადა.მისი თქმით, ფაქტზე შესაბამისი უწყებების რეაგირება ადასტურებს, რომ კანონის წინაშე ყველა თანასწორია.„ფაქტი, რა თქმა უნდა, ძალიან მძიმე იყო და დარწმუნებული ვარ, გულგრილი ვერც ერთი ადამიანი ვერ დარჩებოდა, ვინც ნახა ეს კადრები, თუმცა აქ არის მეორე ძალიან მნიშვნელოვანი საკითხი – შესაბამისმა სამსახურებმა მოახდინეს რეაგირება. ეს არის კიდევ ერთი დასტური, რომ კანონის წინაშე ყველანი ვართ თანასწორნი და არავის მიეცემა შესაძლებლობა, ვინც არ უნდა იყოს, რომ კანონი დაარღვიოს და ამაზე თვალი დავხუჭოთ“, – განაცხადა კახა კალაძემ.რაც შეეხება ოპოზიციის განცხადებებს, რომ ადგილი აქვს სისტემურ დანაშაულს, კახა კალაძემ განაცხადა, რომ სისტემური დანაშაულებები ქვეყანაში 2012 წლამდე ხდებოდა.„სისტემური დანაშაული ხდებოდა 2012 წლამდე. გვახსოვს, რა ვითარება იყო მაშინ საქართველოში, როგორი დამოკიდებულება იყო განსხვავებული აზრის მქონე ადამიანების მიმართ და, ზოგადად, რა პროცესები მიდიოდა. ხალხი ძალიან კარგად ხედავს ყველაფერს, ძალიან კარგად ხედავს განსხვავებას და კარგად აკეთებს ანალიზს, რა ხდებოდა ქვეყანაში, როგორ საქართველოში ვცხოვრობდით და დღეს რა მოცემულობა გვაქვს“, – აღნიშნა დედაქალაქის მერმა.პროკურატურამ გორში პოლიციელების მიერ სამსახურებრივი უფლებამოსილების ძალადობით გადამეტების ბრალდებით ექვსი პირი დააკავა.

საქართველოში არამდგრადი ამინდები გრძელდება. სინოპტიკოსების ინფორმაციით, უახლოეს დღეებში ქვეყნის მასშტაბით მოსალოდნელია როგორც ძლიერი წვიმა და ქარი, ისე ჰაერის ტემპერატურის მკვეთრი კლება.სინოპტიკოსების პროგნოზით, მიმდინარე კვირაში დასავლეთ საქართველოს უმეტეს რაიონში იწვიმებს, ხოლო აღმოსავლეთ საქართველოში ქარის გაძლიერებაა მოსალოდნელი.29 მაისს, თითქმის მთელი საქართველოს მასშტაბით იწვიმებს და დასავლეთის მიმართულების ძლიერი ქარი იქროლებს.თუმცა მანამდე, 28 მაისს, ამინდი დროებით გამოიდარებს. როგორც დასავლეთ, ისე აღმოსავლეთ საქართველოში მზიანი და თბილი დღეა მოსალოდნელი. ჰაერის ტემპერატურა შესაძლოა 30 გრადუსსაც გადააჭარბოს.სინოპტიკოსები აცხადებენ, რომ სწორედ ამის შემდეგ განვითარდება ამინდის მკვეთრი ცვლილება — 29 მაისს ძლიერი ნალექისა და ქარის ფონზე ტემპერატურა დაახლოებით 15-16 გრადუსამდე დაეცემა, რაც თითქმის 15-გრადუსიან ვარდნას ნიშნავს.არამდგრადი ამინდი მაისის ბოლომდე შენარჩუნდება. 30-31 მაისსაც ქვეყნის სხვადასხვა რეგიონში კვლავ მოსალოდნელია წვიმა და ქარი.

გილოცავთ ღირსი მამის, დავით გარეჯელის ხსენების დღეს. ყოველთვის დიდ მადლს ვგრძნობ მის წმინდა საფლავთან მოსვლით და აქ ლოცვით. ვევედრებით საქართველოსთვის, ჩვენი ეკლესიისთვის, ამ წმინდა მონასტრისთვის, საქართველოში ბერ-მონაზვნობის აღორძინებისთვის და გაძლიერებისთვის, – ამის შესახებ უწმინდესმა და უნეტარესმა, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, შიო მესამემ დავითგარეჯის მამათა მონასტერში ქადაგებისას განაცხადა.„საოცარი მამა იყო დავით გარეჯელი, ისევე, როგორც ღირსი იოანე ზედაზნელი და მისი ყველა მოწაფე, რომლებმაც დააფუძნეს სამონასტრო ცხოვრება საქართველოში. მათ შორის მამა დავითი ერთ-ერთი დიდი მნათობია, რომელიც განთქმულია მსოფლიოში, არა მარტო საქართველოში. ისეთი დიდი მადლი მოიხვეჭა მან ღვთის წინაშე, ისეთი მადლმოსილი იყო. როგორ, რა ღვაწლით მოიღვაწა მან ასეთი დიდი მადლი? ჩვენ ბიბლიაში ვკითხულობთ, რომ ღმერთი ამპარტავანთა შემუსრავს, ხოლო მდაბალთა მისცემს მადლს. მამა დავითი იყო განსაკუთრებული, განსაკუთრებულად გამორჩეული ამ უდიდესი სათნოებით, რასაც სიმდაბლე ეწოდება. ეს ჩვენ ვიცით მისი ცხოვრებიდან.ყველა ადამიანს, ვისაც სურს სულიწმიდის მადლის მოხვეჭა, უნდა დავფიქრდეთ, როგორ უნდა მოვიხვეჭოთ ეს მადლი, რადგან, როგორც იცით, წმინდა მამების სწავლებით, ამ მადლის მოხვეჭა არის მთავარი მიზანი ჩვენი საეკლესიო, სულიერი ცხოვრების. რა თქმა უნდა, ეს არის უმოკლესი გზა მადლის მოხვეჭისა, სიმდაბლის ქონა, სიმდაბლის ღვაწლი, არა განკითხვა ძმისა თვისისა და განცდა თვისთა ცოდვათა. ასეთი მადლის მოსახვეჭად აუცილებელია ლოცვა, ლოცვის გარეშე ამ თვისებებს ადამიანი ვერ მოიხვეჭს.სახარებაში, რომელიც წაკითხული იყო დღევანდელ წმინდა ლიტურგიაზე, იყო უფალი იესო ქრისტეს სწავლება ლოცვის მნიშვნელობაზე. ეს ერთ-ერთი ბოლო ქადაგება იყო მისი მოციქულებისადმი, თითქოს უფალმა ყველაფერი ასწავლა მოციქულებს. ბოლოს აგვირგვინებს თავის სწავლებას ამ ცნებით ლოცვის შესახებ, რომ ითხოვეთ და მოგეცემათ. უფალი აძლევს ამ შესაძლებლობას, მაგრამ ჩვენი ლოცვა უნდა იყოს ძალიან უბრალო, უბრალო გულით, ყოველგვარი ხელოვნურობის, დაძაბულობის გარეშე. დაახლოებით ისეთი, როგორც შვილები სთხოვენ მშობლებს რაღაცას, ჩვენი ლოცვაც ასეთი უბრალოდ უნდა იყოს, გულის უბრალოებით. ამაზეც ამბობს უფალი, რომ თუ არ იქნებით როგორც ყრმები, ვერ შეხვალთ ცათა სასუფეველში. დასძენს, რომ თუ არ დამდაბლდებით, როგორც ეს ყრმა და ვინ დაიმდაბლებს თავს, როგორც ეს ყრმა, ის უდიდესი იქნება ცათა სასუფეველში. წარმოიდგინეთ, უფალი ამ ცნებას უკავშირებს სრულყოფილ სიხარულს, თითქოს ამბობს, რომ ის ამისთვის მოვიდა, რომ ჩვენ ვევედროთ უფალს და მივიღოთ ღვთისგან ყველაფერი, პირველ რიგში, სულიწმიდის მადლი, რომ ჩვენი სიხარული იყოს სრულყოფილი. გვაძლევს ამ საშუალებას, რომ ჩვენ, ვისაც შეიძლება, გვეგონოს არასწორად, რომ უკვე ზრდასრულები ვართ და ღვთის გარეშეც შეგვიძლია ფონს გასვლა, უფალი გვიბრუნებს იმ საშუალებას, რომ წარდგეთ ღვთის წინაშე და როგორც შვილებმა, ისე ვევედროთ მამას, მივიღოთ ბევრად მეტი, ვიდრე მისგან ვთხოვთ.ამიტომ, როდესაც ჩვენ სალოცავად ვდგებით, უნდა გვახსოვდეს, რომ ეს არის უმთავრესი საქმე, რომლის გარეშეც არცერთი სხვა საქმე ჩვენს ცხოვრებაში ჯეროვნად არ წარიმართება, რომ ლოცვა არის ყველაზე ძლიერი რამ ამ დედამიწაზე. როგორც ამბობს წმინდა იოანე ოქროპირი, არაფერი შეედრება ლოცვას და მის ძალას, რომ ლოცვის დროს განქარვდება მწუხარება, სევდა, გარბიან დემონები, ყოველგვარი წინააღმდეგობა და ცხრება ვნებები და ჩვენ ვდგავართ ჩვენი ზეციერი მამის წინაშე და როგორც ეს დიდი წმინდა მამა ამბობს, ყველაზე ღარიბიც რომ იყოს ადამიანი, მაინც ყველაზე მდიდარია, თუ ლოცვა იცის და ვინც არ მიმართავს უფალს, ოქროს ტახტზეც რომ იჯდეს, ის მაინც ყველაზე ღარიბია.ვფიქრობთ დღეს მადლზე, ლოცვის მნიშვნელობაზე, სულიწმიდის მადლის მოხვეჭაზე. ოღონდ კიდევ არის ამისთვის ერთი მთავარი პირობა. იმისთვის, რომ ეს მადლი მივიღოთ და გვქონდეს ლოცვის კადნიერება და მადლი, უფალი ერთ პირობას გვიდებს – მამას უყვარხართ თქვენ, მამაჩემს, მაგრამ მხოლოდ იმიტომ, რომ თქვენ მე შემიყვარეთ. უფალი გვეუბნება, რომ უნდა ვიყოთ ქრისტესმიერი, გვწამდეს მისი და ვსწავლობდეთ მისგან. კიდევ ერთხელ გილოცავთ, ღმერთმა დაგლოცოთ და გაგაძლიეროთ, ღმერთმა ღირსი მამა დავით გარეჯელის მეოხებით დალოცოს, გაამთლიანოს, გააძლიეროს და გადაარჩინოს სრულიად საქართველო“, – განაცხადა პატრიარქმა.