განათლების მინისტრის ბრძანებით, ეთიკის კომისია არ წარმოადგენს უფლებამოსილ პირს, რომელსაც შეუძლია მიიღოს გადაწყვეტილება სტუდენტების დისციპლინარული პასუხისმგებლობის თაობაზე, – ამის შესახებ თეატრისა და კინოს სახელმწიფო უნივერსიტეტის სტუდენტმა, ნინო გოგიამ საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ სტუმრობისას განაცხადა.
„პირველ რიგში, ყველაზე დიდი პრობლემა ალბათ ეს არის“, – განაცხადა გოგიამ.
მისი თქმით, როდესაც სტუდენტებს ელექტრონულ ფოსტაზე წერილი დაეგზავნათ, სადაც ნახსენები იყო, რომ იმართებოდა კომისიის სხდომა, რაზეც განიხილებოდა შეწამვლის საკითხი, დაკონკრეტებული არ იყო, ვის ეხებოდა და რა შეიძლებოდა ამ ყველაფერს მოჰყოლოდა, რომ მათ სტატუსი შეწყვეტოდათ და ა.შ.
„გარდა ამისა, დაახლოებით საღამოს რვა საათისთვის მოვიდა ეს მეილი და ჩვენ დრო გვქონდა დილის 10:00 საათამდე, რაც გონივრული ვადა ნამდვილად არ არის. გარდა ამისა, მათ მიერ გამოგზავნილ მეილში არ არის დაკონკრეტებული, რომელმა ჩვენგანმა რა კოდექსი დავარღვიეთ. აქედან გამომდინარე, ჩვენ მოვითხოვეთ არაერთხელ და, მათ შორის, დღეს შევიტანეთ განცხადება, რომ მივიღოთ დასაბუთება, რას გვედავებიან კონკრეტულად. იმიტომ, რომ ამ განცხადების მერე რომ სტატუსი აღარ გვიწყდება, ამ განცხადებაში წერია ასევე ისიც, რომ მივიღეთ გაფრთხილება, თუმცა რასთან დაკავშირებით მივიღეთ ეს გაფრთხილება, დღემდე უცნობია ჩვენთვის და დღემდე ველოდებით უნივერსიტეტისგან, რომ ეს ყველაფერი მივიღოთ“, – განაცხადა გოგიამ.
„დასაბუთებას ვიდრე არ მივიღებთ, მანამდე, რა თქმა უნდა, არ ვაპირებთ, თუნდაც ლექციებზე შევიდეთ, რადგან ეს ყველაფერი ეწინააღმდეგება, პირველ რიგში, კანონს და, მეორე რიგში, ჩვენს მორალს, რაც ყველაზე მაღლა დგას“, – განაცხადა გოგიამ.
ნინო გოგიამ ასევე განაცხადა, რომ სოლიდარობას უცხადებს სინდისის ყველა პატიმარს.
მისი თქმით, უნივერსიტეტში მომუშავე არაერთი ადამიანი მათ პროტესტს ყოველ ჯერზე უშლიდა ხელს.
„თუნდაც პირველივე დღეებში, როდესაც გიორგი შალუტაშვილს ველოდებოდით, რომ მოსულიყო და კომუნიკაცია ჰქონოდა ჩვენთან, მოვიდა დილის 06:00 საათზე და გარეთ რამდენიმე ადამიანი, ჩვენი სტუდენტი რომ იმყოფებოდა, ის ამბობდა, რომ ეს არის ულტიმატუმი და არ შემოვუშვებო. იმის მიუხედავად, რომ ჩვენ ვეუბნებოდით, გარეთ იყინებიან ეს ბავშვები-თქო. ამის შემდეგ იყო შემთხვევა, როცა გვინდოდა, გამათბობლები შემოგვეტანა, რადგან უნივერსიტეტი არ რთავდა გათბობას და გვითხრეს ისიც, რომ ამით ფულს ზოგავენ ეს ადამიანები და ჩვენი გამათბობლების შემოტანის უფლებასაც არ გვაძლევდნენ. გიორგი ფხაკაძე იყო ის ადამიანი, რომელმაც თქვა, თქვენ პროტესტიც გინდათ და გათბობაც, ეს ყველაფერი ერთად ვერ იქნებაო“, – განაცხადა გოგიამ.
სტუდენტმა ასევე განაცხადა, რომ მათთვის საჭმლის მიწოდებაც პრობლემა იყო.
„ბანერები როცა ჩამოვკიდეთ, იყო შემთხვევა, როცა ჩაკეტეს კარი. მე და თემო შიგნით ვიყავით მაგ პერიოდში, დაახლოებით 72 ან 70 საათი და საჭმლის შემოწოდებაზე გვითხრეს, რომ ამის უფლებას არ მოგვცემდნენ და არც ერთმანეთის ჩანაცვლების უფლებას არ მოგვცემდნენ. გვითხრეს, ზუსტად ვციტირებ, ღრიჭოდან შემოგაწვდით საჭმელსო, კარის ღრიჭოზე იყო საუბარი“, – განაცხადა გოგიამ.