მეორე ოთახში რომ გავედი და დავინახე ტელევიზორში, რა უბედურება ტრიალებდა, შემოვედი და გითხარით, გააჩერეთ რეზინის ტყვიების სროლა, რაზეც თქვენი ცინიკური პასუხი იყო, რაღაც ძველი დროის კადრებს ატრიალებენო, – ასე მიმართა პარლამენტის დროებითი საგამოძიებო კომისიის ერთ-ერთმა წევრმა, სოზარ სუბარმა გიორგი გახარიას 2019 წლის 20 ივნისის ღამეს აქციის დაშლის საკითხთან დაკავშირებით.
მანამდე სოზარ სუბარმა გახარიას ჰკითხა, ახსოვდა თუ არა, ბრძანებებს საიდანაც გასცემდა, იმ ოთახში ვინ იყვნენ მასთან ერთად და იყო თუ არა მასთან ლომჯარია, რაზეც გახარიამ აღნიშნა, რომ არ ახსოვს.
„სერიოზული ამნეზია დაგმართნიათ, მაგრამ იმედი მაქვს, ლომჯარიას და მის მოადგილეს, ბურჯანაძეს ასეთი ამნეზია არ აქვთ, და თუ არ აქვთ, მაშინ ისინი გაიხსენებენ, რომ აქციის დაშლა როდესაც გადაწყვიტეთ, მე პირადად გითხარით, გიორგი, ნანახი მაქვს ჩემი თვალით, რა უბედურება მოაქვს რეზინის ტყვიას, სრულიად საკმარისი ძალა არის, რათა გაზით, წყლის ჭავლით დავშალოთ, თუ ამის გამოყენება აუცილებელია, რეზინის ტყვიები არ გავარდეს-მეთქი. თქვენ დაშლის ბრძანება გაეცით. კი არ გითქვამთ, რომ რეზინის ტყვია გავარდეს, უბრალოდ, საერთოდ არ გიხსენებიათ რამე კონკრეტული. რადგანაც დაშლის ბრძანება იყო გაცემული, როგორც ჩანს, ავტომატურად იგულისხმებოდა ესეც, ასე იქნებოდით შეთანხმებული. იმ ოთახიდან, ზემოდან კარგად არ ჩანდა, მეორე ოთახში რომ გავედი და დავინახე ტელევიზორში, რა უბედურება ტრიალებდა, შემოვედი და გითხარით, გააჩერეთ რეზინის ტყვიების სროლა, რაზეც თქვენი ცინიკური პასუხი იყო, რაღაც ძველი დროის კადრებს ატრიალებენო“, – მიმართა სოზარ სუბარმა გიორგი გახარიას.