პარასკევი, მარტი 14, 2025

სოზარ სუბარი: სამხედრო სწავლება “ღირსეული პარტნიორის” გადადება ემსახურება ერთადერთ მიზანს – მოახდინონ ზეწოლა ქართველ ამომრჩეველზე

„სამხედრო სწავლება „ღირსეული პარტნიორის“ გადადების მთავარი მიზანი ოქტომბერში დაგეგმილ არჩევნებზე ზეწოლის მოხდენაა,“ – განაცხადა მედიასთან საუბარში პარტია „ხალხის ძალის“ თავმჯდომარემ სოზარ სუბარმა და დასძინა, რომ დასავლეთიდან საქართველოში გამოგზავნილი მთავარი მესიჯია – საქართველოს უნდა მართავდნენ მათი მარიონეტები.

მისივე თქმით, სამხედრო სწავლება „ღირსეული პარტნიორის“ გადადებით საქართველოს არაღირსეულად მოექცნენ.

„სამხედრო სწავლება „ღირსეული პარტნიორის“ გადადების მთავარი მიზანი ოქტომბერში დაგეგმილ არჩევნებზე ზეწოლის მოხდენაა. გამოგზავნილია პირდაპირი მესიჯი – საქართველოს უნდა მართავდნენ მათი ყურმოჭრილი მარიონეტები, რომლებიც დაემორჩილებიან მათ ყველა ბრძანებას. სხვა ახსნა სწავლების გადადებას არ აქვს. დარწმუნებული ვარ, რომ ოქტომბრის შემდეგ, როცა არჩევნებში დამაჯერებლად გავიმარჯვებთ, სამხედრო სფეროში ქართულ-ამერიკული თანამშრომლობა ჩვეულებრივ რეჟიმში გაგრძელდება.

ნატოს წევრ და არაწევრ ქვეყნებს შორის ავღანეთის სამშვიდობო მისიაში ყველაზე დიდი კონტინგენტის გაგზავნის კუთხით საქართველო მეოთხე ადგილზეა. ბალტიისპირეთის სამივე ქვეყანას, რომლებიც ნატოს წევრები არიან და ნატოს ქოლგა იცავს, ჯამში გაგზავნილი ჰყავდა ერთი ოცეული და ეს მაშინ, როცა მთელი მისიის განმავლობაში ჩვენ მუდმივად გვყავდა 800-ზე მეტი ჯარისკაცი. რომ არა მისიაში ჩვენი ასეთი მონაწილეობა, ამერიკის შეერთებულ შტატებს ფინანსური კუთხით დამატებით მინიმუმ ორი მილიარდი დოლარით მეტი დაეხარჯებოდა. თუმცა, ფინანსური დანახარჯი, რა თქმა უნდა, მეორეხარისხოვანია იმ მსხვერპლთან შედარებით, რაც საქართველომ და ქართულმა ჯარმა გაიღო, როგორც დაღუპული მეომრების სახით, ისე იმ ადამიანებით, რომლებმაც მძიმე დაზიანებები მიიღეს და მთელი ცხოვრება შეზღუდული შესაძლებლობის პირებად დარჩნენ.

ჩვენ ეს მსხვერპლი ჩვენი პარტნიორობისთვის გავიღეთ და ძალიან სამწუხაროა, რომ ახლა გადადებულ სამხედრო წვრთნებით, რომლის სახელწოდებაა „ღირსეული პარტნიორი“ საქართველოს ასე არაღირსეულად მოექცნენ. გავიმეორებ და ვიტყვი, რომ ეს ყველაფერი ემსახურება ერთადერთ მიზანს – ზეწოლა მოახდინონ ქართველ ამომრჩეველზე, რომ არჩევნებზე ხმა მისცენ იმ პარტიებს, რომლებიც თვალდახუჭულები ჩაებმებიან ნებისმიერ ომში, რომელსაც მათი პატრონები მოსთხოვენ. სხვა შემთხვევაში, აბსოლუტურად გაუგებარია ერთობლივი სწავლების გადადების მიზეზი, როცა წვრთნები ტარდება ჩვენს მეზობელ და მეგობარ სომხეთში, რომელიც დღემდე კოლექტიური უსაფრთხოების ხელშეკრულების ორგანიზაციის წევრია. სამწუხაროდ, არათანასწორი დამოკიდებულების სხვა არაერთი მაგალითი გვაქვს. მაგალითად, გვეუბნებიან, თითქოს მოლდოვა საქართველოსთან შედარებით დაწინაურებულია ევროკავშირში გაწევრიანების გზაზე. შეგახსენებთ, მოლდოვა დღესაც დსთ-ს წევრი ქვეყანაა, აქვს თავისუფალი სავაჭრო შეთანხმება ამ სივრცესთან და რაც მთავარია, პირდაპირ უწერია კონსტიტუციაში, რომ არ გახდება არცერთი სამხედრო ბლოკის წევრი, რაც ავტომატურად გამორიცხავს ნატოს წევრობას.

რაც შეეხება ევროკავშირის მთავარ ღირებულებებთან თავსებადობას – კორუფციის დონით, ადამიანის უფლებების დაცვით, ბიუჯეტის გამჭვირვალობით და ბევრი სხვა ასპექტით, ანუ ყველა იმ პუნქტში, რაც ევროკავშირის ღირებულებებს ასახავს, ნებისმიერი საერთაშორისო რეიტინგის თანახმად მოლდოვა ორჯერ და სამჯერ ჩამორჩება საქართველოს ,“ – განაცხადა სოზარ სუბარმა.

ქეთევან ნინუაhttp://tiflisnews.ge
საინფორმაციო სააგენტო tiflisnews.ge კონტაქტი- ☎️ 557 13 16 73

ანდრეი სიბიგა – ცეცხლის შეწყვეტის აშშ-ს წინადადებაზე უკრაინამ თქვა „დიახ“, იმიტომ რომ უკრაინას სურს მშვიდობა, პუტინი, ნაცვლად იმისა, რომ თქვას „დიახ“, სხვადასხვა პირობებს აყენებს

ცეცხლის შეწყვეტის აშშ-ს წინადადებაზე უკრაინამ თქვა „დიახ“, იმიტომ რომ უკრაინას სურს მშვიდობა, პუტინი, ნაცვლად იმისა, რომ თქვას „დიახ“, სხვადასხვა პირობებს აყენებს, – ასე გამოეხმაურა უკრაინის საგარეო საქმეთა მინისტრი ანდრეი სიბიგა ვლადიმერ პუტინის განცხადებას, სადაც რუსეთის პრეზიდენტმა თქვა, რომ ეთანხმება ზავის იდეას, თუმცა არსებობს ნიუანსები.როგორც ანდრეი სიბიგა წერს, „ეს არის განსხვავება“.„ცეცხლის შეწყვეტის აშშ-ის წინადადებაზე უკრაინამ თქვა „დიახ“, იმიტომ რომ სურს მშვიდობა. პუტინი, ნაცვლად იმისა, რომ თქვას „დიახ“, სხვადასხვა პირობებს აყენებს. უკრაინა ომის დასრულებას ცდილობს. პუტინი ომის გაგრძელებას ცდილობს. მისი დანარჩენი სიტყვები მხოლოდ შენიღბვაა“, – წერს ანდრეი სიბიგა.

სახელმწიფო საზღვრის უკანონო კვეთის ფაქტზე მიხეილ სააკაშვილის საქმეზე განაჩენი, სავარაუდოდ, დღეს გამოცხადდება

სახელმწიფო საზღვრის უკანონო კვეთის ფაქტზე, საქართველოს ყოფილი პრეზიდენტის, მიხეილ სააკაშვილის ბრალდების სისხლის სამართლის საქმეზე განაჩენი სავარაუდოდ, დღეს, 14 მარტს გამოცხადდება.სხდომა თბილისის საქალაქო სასამართლოში 13:00 საათზეა დანიშნული.პროცედურულად, დღევანდელ პროცესზე ბრალდებულმა სააკაშვილმა საბოლოო სიტყვით უნდა ისარგებლოს, თუმცა, უცნობია, ის ამ უფლებას გამოიყენებს თუ არა და ჩაერთვება თუ არა დისტანციურად კლინიკა „ვივამედიდან“.გასულ სხდომაზე დაცვის მხარემ დასკვნითი სიტყვა წარმოთქვა.შეგახსენებთ, რომ მიხეილ სააკაშვილს ბრალი სისხლის სამართლის კოდექსის 344-ე მუხლით აქვს წარდგენილი, რაც სახელმწიფო საზღვრის უკანონო კვეთას გულისხმობს. აღნიშნულ ფაქტთან დაკავშირებით გამოძიება 2021 წლის პირველ ოქტომბერს დაიწყო.აღნიშნული საქმის ფარგლებში ბრალდება კიდევ 4 პირს - ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული. აღნიშნული საქმე ცალკე წარმოებად მიმდინარეობს, ისინი გირაოს სანაცვლოდ არიან გათავისუფლებულები.

ვოლოდიმირ ზელენსკი – უკრაინა თურქეთს უსაფრთხოების გარანტიების თვალსაზრისით პარტნიორად ხედავს, კიევი მზადაა, ქვეყნებს შორის თავისუფალი ვაჭრობის შეთანხმებას მოაწეროს ხელი

უკრაინა თურქეთს ხედავს, როგორც პარტნიორს უსაფრთხოების გარანტიების თვალსაზრისით, კიევი მზადაა, მოაწეროს ხელი სახელმწიფოებს შორის თავისუფალი ვაჭრობის შეთანხმებას, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.ვოლოდიმირ ზელენსკი კიევში თურქეთის ვაჭრობის მინისტრს, ომერ ბოლატს და სოფლის მეურნეობის მინისტრს, იბრაჰიმ იუმაკლის შეხვდა.შეხვედრაზე ორმხრივი ურთიერთობები, დრონების წარმოებაში თანამშრომლობა და უკრაინის რეკონსტრუქციაში თურქული კომპანიების ჩართულობა განიხილეს.„მნიშვნელოვანია, რომ თურქული ბიზნესი უკვე წარმოდგენილია უკრაინაში. ჩვენი ქვეყანა აფასებს ამას, ისევე როგორც თურქეთის მხარდაჭერასა და დახმარებას, განსაკუთრებით კი „ბაირაქტარის“ ტიპის დრონების მიწოდებას. უკრაინა თურქეთს მიიჩნევს ერთ-ერთ სტრატეგიულ პარტნიორად, ასევე პარტნიორად უსაფრთხოების გარანტიების თვალსაზრისით და მზადაა, ხელი მოაწეროს თავისუფალი ვაჭრობის შეთანხმებას თურქეთთან პრეზიდენტ რეჯეფ თაიფ ერდოღანის მომავალი ვიზიტის დროს“, – აღნიშნა ვოლოდიმირ ზელენსკიმ, თუმცა არ დაუკონკრეტებია, როდის შედგება ეს ვიზიტი.ამასთან, ომერ ბოლატი და იბრაჰიმ იუმაკლი დაესწრნენ თურქეთსა და უკრაინას შორის სამუშაო ჯგუფის პირველ შეხვედრას, რომელიც ომის შემდეგ ქვეყნის რეკონსტრუქციას ეხებოდა.

ჯეი დი ვენსი – შოკირებული ვიქნები, თუ დონალდ ტრამპი აღმოსავლეთ ევროპაში ბირთვული იარაღის განთავსებას მოისურვებს

აშშ-ის ვიცე-პრეზიდენტი ჯეი დი ვენსი აცხადებს, რომ შოკირებული იქნება, თუ ქვეყნის პრეზიდენტი დონალდ ტრამპი ბირთვული იარაღი აღმოსავლეთ ევროპაში განთავსებას მოისურვებს.„ფოქს ნიუსთან“ ინტერვიუში, ვენსმა ჟურნალისტის შეკითხვას უპასუხა პოლონეთის პრეზიდენტის განცხადებასთან დაკავშირებით, რომელშიც ანჯეი დუდამ მოუწოდა აშშ-ს თავისი ბირთვული იარაღი პოლონეთის ტერიტორიაზე განათავსოს. ანჯეი დუდა მიიჩნევს, რომ ეს ერთ-ერთი შემაკავებელი საშუალება იქნება რუსეთის მომავალი აგრესიისგან.„პრეზიდენტთან ამ კონკრეტულ საკითხზე არ მილაპარაკია, მაგრამ შოკირებული ვიქნები, თუ ის მხარს დაუჭერს ბირთვული იარაღის განთავსებას აღმოსავლეთ ევროპაში“, – განაცხადა ჯე დი ვენსმა.

„ბლუმბერგი“ – უნგრეთი ევროკავშირს რუსეთის წინააღმდეგ სანქციების გაგრძელებაზე დათანხმდა

უნგრეთი ევროკავშირს რუსეთის წინააღმდეგ სანქციების გაგრძელებაზე დათანხმდა, – ამის შესახებ „ბლუმბერგი“ წერს.როგორც გამოცემა აღნიშნავს, ევროკავშირი უნგრეთთან რუსეთის წინააღმდეგ სანქციების გასაგრძლებლად დათმობაზე წავიდა. გამოცემა წერს, რომ ბუდაპეშტი დათანხმდა სანქციების გახანგრძლივებას მას შემდეგ, რაც მათი მოთხოვნით სანქციების სიიდან სამი პირი ამოიღეს. ჯერჯერობით უცნობია, ვისზეა საუბარი.„ბლუმბერგის“ ინფორმაციით, 14 მარტამდე გაგრძელდება ე.წ. წერილობითი პროცედურა, რომელიც საშუალებას იძლევა, ექვსი თვით გაგრძელდეს რუსეთის წინააღმდეგ დაწესებული სანქციები. „ბლუმბერგი“ წერს, რომ სანქციების გაგრძელების შესახებ ოფიციალური განცხადების გაკეთების ბოლო ვადა 14 მარტია.

ბოლო სიახლეები