0
0
საქართველოს ტექნიკური უნივერსიტეტის ქიმიური ტექნოლოგიისა და მეტალურგიის ფაკულტეტზე ქიმიკოსის დღე აღინიშნა. ამის შესახებ ინფორმაციას საქართველოს ტექნიკური უნივერსიტეტი ავრცელებს.
მათივე ცნობით, პროფესიულ დღესთან დაკავშირებულ ღონისძიებას ესწრებოდა უნივერსიტეტის ქიმიკოსთა საზოგადოება – ღვაწლმოსილი მეცნიერები, პედაგოგები და ახალგაზრდა მკვლევრები, რომლებიც ისეთი მიმართულებებით მუშაობენ, როგორიცაა: ბიოტექნოლოგია, ორგანულ და არაორგანულ ნივთიერებათა, სილიკატებისა და საყოფაცხოვრებო ქიმიის პროდუქტების, ზოგადი ქიმიური, ბიონანოსამედიცინო, კერამიკული და პოლიმერული კომპოზიტების ტექნოლოგიები, ბიოსამედიცინო პოლიმერები და ბიოინჟინერია, ელექტროქიმიური ინჟინერინგი, ზოგადი, არაორგანული და ანალიზური ქიმია, ორგანული ქიმია, ფიზიკური და კოლოიდური ქიმია, ფარმაკოქიმია და ფარმაკოლოგია, ასევე, გარემოს დაცვის ინჟინერია და საინჟინრო ეკოლოგია.
კოლეგებს პროფესიული დღე ფაკულტეტის დეკანმა, პროფესორმა ნუგზარ წერეთელმა მიულოცა და ღვაწლმოსილ ქიმიკოსებს ხანგრძლივი, ნაყოფიერი და კეთილსინდისიერი სამეცნიერო-პედაგოგიური მოღვაწეობისთვის საქართველოს ტექნიკური უნივერსიტეტის რექტორის, აკადემიკოს დავით გურგენიძის ხელმოწერილი მადლობის სიგელები გადასცა.
მადლობის სიგელებით დაჯილდოვდნენ სტუ-ის ქიმიური ტექნოლოგიისა და მეტალურგიის ფაკულტეტის პროფესორები: თამაზ გაბადაძე, ნანა ბოკუჩავა, გურამ გაფრინდაშვილი, ლერი გვასალია, როსტომ გაფრინდაშვილი, ჯემალ შენგელია, ნათელა ნიჟარაძე და ასოცირებული პროფესორები: ზაირა ბარდაჩიძე, ლამარა ბერიშვილი და ნუნუ ბუჩუკური.
