საქართველოს ტექნიკური უნივერსიტეტის სახალხო თეატრ-სტუდია „მოდინახემ“, საგასტროლო ტურნეს ფარგლებში, სამტრედიის ეროსი მანჯგალაძის სახელობის დრამატულ თეატრსა და სენაკის აკაკი ხორავას სახელობის სახელმწიფო დრამატულ თეატრში სპექტაკლი გამართა.
ამის შესახებ ინფორმაციას საქართველოს ტექნიკური უნივერსიტეტი ავრცელებს.
უნივერსიტეტის ცნობით, „მოდინახეს“ დასი მაყურებლის წინაშე მიხო მოსულიშვილის დრამის მიხედვით დადგმული სპექტაკლით – „უკანასკნელი თოლია”, წარსდგა, რომელშიც მოქმედება 1993 წლის 27 სექტემბერს, სოხუმის დაცემის დღეს ვითარდება და აფხაზეთის ავტონომიური რესპუბლიკის მინისტრთა საბჭოსა და თავდაცვის საბჭოს თავმჯდომარის, ჟიული შარტავას და მისი თანამებრძოლების გმირულ თავგანწირვაზე მოგვითხრობს.
სპექტაკლის რეჟისორის, „მოდინახეს“ დირექტორის, გიორგი ჭანტურიას თქმით, სპექტაკლმა „უკანასკნელი თოლია“, რომელშიც საქართველოს ტექნიკური უნივერსიტეტის სხვადასხვა ფაკულტეტის სტუდენტები მონაწილეობენ, სრული ანშლაგით ჩაიარა.
„უკანასკნელი თოლია“ არის ჩემი სადებიუტო სპექტაკლი და, შესაბამისად, როგორც დამოუკიდებელი რეჟისორი გასტროლზე პირველად წარვდექი მაყურებლის წინაშე. „მოდინახეს“ დასი სამტრედიამ და სენაკმა, უკვე მერამდენედ, დიდი სიყვარულითა და ოვაციით მიგვიღო, რაც ნამდვილად დიდი მოტივაციაა ჩვენი უნივერსიტეტის სტუდენტებისთვის. მინდა ვისარგებლო შემთხვევით და მადლობა გადავუხადო საქართველოს ტექნიკური უნივერსიტეტის რექტორს, აკადემიკოს დავით გურგენიძეს მხარდაჭერისთვის, ხოლო სამტრედიისა და სენაკის მუნიციპალიტეტის მერებს, მოსწავლე-ახალგაზრდობისა და კულტურის ცენტრებს – გულთბილი მიღებისთვის. უღრმესი მადლობა მაყურებელს, რომელთა მხრიდან გამოხატული სიყვარულის სითბო დიდხანს ემახსოვრება ჩვენი დასის მოყვარულ მსახიობებს. აღსანიშნავია, რომ „მოდინახე“ საგასტროლო ტურნეს განაგრძობს“, – აცხადებს გიორგი ჭანტურია.
უნივერსიტეტის განმარტებით, „მოდინახეს” დასთან ერთად, ქალაქ სენაკში იმყოფებოდა საქართველოს ტექნიკური უნივერსიტეტის რექტორის, აკადემიკოს დავით გურგენიძის მრჩეველი დავით ოქიტაშვილი. სპექტაკლის დასრულების შემდეგ მათ ყვავილებით შეამკეს ჟიული შარტავასა და გურამ გაბესკირიას მემორიალები.
უნივერსიტეტის ინფორმაციით, საქართველოს ტექნიკური უნივერსიტეტის სახალხო თეატრ-სტუდია „მოდინახეს“ მიერ დრამატურგ მიხო მოსულიშვილის პიესის მიხედვით დადგმულ სპექტაკლში – „უკანასკნელი თოლია“ – მთავარ როლებს ასრულებენ სტუ-ის სტუდენტები და კურსდამთავრებულები: ლაშა შარაშენიძე (ჟიული შარტავა), მინდია ქიტიაშვილი (ჩინდიკოვი), ნატა მეშველიანი (ირმელა შუტცე), ზუკა ბერუაშვილი (გურამ გაბესკირია), შოთა კაჭარავა (რაულ ეშბა), გიორგი ონიანი (ჯუმბერ ბეთაშვილი), ნიკოლოზ მღებრიშვილი (გურამ ჯანიაშვილი), ლუკა აკობია (ვალმერ ბუტბა), გიორგი ანთიძე (ჯოკერი), ნიკოლოზ კალმახელიძე (მულტიკი), ანანო გოგია (კორესპონდენტი); მეორეხარისხოვან როლებში მონაწილეობენ: გიორგი კუტალია, რომან ნებიერიძე, გუგა ჩარგეიშვილი, მერაბ ზუზაძე, საბა გაგელიძე, საბა ჯოლოხავა, დათი ტატულიშვილი; სპექტაკლის რეჟისურა სცენოგრაფია და მუსიკალური გაფორმება ეკუთვნის გიორგი ჭანტურიას, რეჟისორის თანაშემწეა ზურა ბერუაშვილი, გახმოვანება – ჯეკო დათუაშვილი, განათება: გვანცა ნოზაძე, გიორგი თათულაშვილი, ამირან ჩარგეიშვილი; ტექნიკური ჯგუფი: დავით ჭეიშვილი და კობა სულაძე.
უნივერსიტეტის ინფორმაციით, ერთ-ერთ უძველეს საუნივერსიტეტო ტრადიციების მქონე სახალხო თეატრ-სტუდია „მოდინახეს“ 2022 წელს დაარსებიდან 75 წელი შეუსრულდა.