საქართველოს ოლიმპიური კომიტეტის ვერსიით, 2025 წლის საუკეთესო ქართველ სპორტსმენებად სანდრო ბაზაძე და ეთერ ლიპარტელიანი დასახელდნენ

ტრადიციისთვის არ გვიღალატია, სოციალური საკითხები და ადამიანი, როგორც ყურადღების მთავარი ცენტრი, კვლავაც აქტუალური რჩება ხელისუფლებისთვის, – ამის შესახებ საქართველოს ჯანდაცვის მინისტრმა, მიხეილ სარჯველაძემ საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ განაცხადა.სარჯველაძემ უპასუხა კითხვას: „2026 წლის ბიუჯეტი არის დამტკიცებული, რომლის პრიორიტეტადაც ჯანდაცვა, სოციალური და ინფრასტრუქტურული პროექტები რჩება. რა მიმართულება იქნება თქვენი სამინისტროსთვის პრიორიტეტული და მნიშვნელოვანი, რომლის მოგვარებასაც ისურვებდით 2026 წელს?“„ვალდებული ვარ, ამას ხაზი გავუსვა, რომ როგორც კი შესაძლებლობა ჩნდება, ფინანსური შესაძლებლობები ხმარდება იმ საჭიროებებს, რომელიც ჩვენი ქვეყნის მოსახლეობას აქვს. საბედნიეროდ, ეკონომიკური წინსვლის გათვალისწინებით, ბოლო დროს საქართველოს ნამდვილად აქვს ასეთი შესაძლებლობები. ქვეყნის პრიორიტეტია ადამიანების სოციალური დაცვა. ბევრი რამ გვაქვს გეგმაში, იგივე ჩანაცვლებითი თერაპიის მიმართულებით და აქედან დაწყებული, მაგალითად, რუხის კლინიკის განვითარებით დამთავრებული. ეს კრიტიკულად მნიშვნელოვანია და ქვეყნის ერთ-ერთი ყველაზე პრიორიტეტული მიმართულებაა. იქნება ახალი სერვისები, ბევრი საინტერესო სიურპრიზი ელოდება იმ რეგიონის და არა მხოლოდ იმ რეგიონის მოსახლეობას, ვინც არიან ბენეფიციარები.არის ცალკეული მიმართულებები, რომლის გამოც ამ დრომდე საჭირო იყო დედაქალაქში ან რომელიმე სხვა შედარებით დიდ ქალაქში მოსახლეობის ჩასვლას, თუმცა ხელმისაწვდომობა გახდება იქვე, რეგიონში. მათ შორის ოკუპირებულ ტერიტორიებზე მაცხოვრებელი ადამიანებისთვის მნიშვნელოვნად გაამარტივებს სასურველ სამედიცინო სერვისებზე ხელმისაწვდომობას. ხელმისაწვდომობა გაჩნდა კარდიოლოგიის, არითმოლოგიის მიმართულებით, რომელიც საზოგადოების დიდ ნაწილს აწუხებს. ბუნებრივია, ყველა სიახლე იქნება დანერგილი. წინასწარ არ შემიძლია, ზუსტად ჩამოვთვალო, წლის განმავლობაში რისი დანერგვა მოხერხდება, მაგრამ შემიძლია დაგიდასტუროთ, რომ მუდმივად მზარდი შესაძლებლობები ექნება იქნება ამ დაწესებულებას. მთელი წლის განმავლობაში, პრაქტიკულად, კვარტალი არ გასულა, რომ ახალი, მნიშვნელოვანი სერვისი არ დამატებოდა რუხის კლინიკის მიერ შეთავაზებული სერვისების სპექტრს. ეს გაგრძელდება და მაქსიმალურად დაიხუნძლება ქვეყნის მოსახლეობისთვის ყველაზე საჭირო სერვისებით. ეს არის ალბათ მთავარი ღირსება, რომელიც აქვს ამ კლინიკას იმასთან ერთად, რომ სერვისებიც არის უმაღლესი ხარისხის. რა თმა უნდა, გავაგრძელებთ მუშაობას, რომელიც უკავშირდება ცალკეული კლინიკური კერების შექმნას. ეს ეხება იგივე რესპუბლიკური საავადმყოფოს მიმართულებით ნაბიჯების გადადგმას, არსებული სამედიცინო სერვისების განვითარებას, სადაც სახელმწიფო არის მიმწოდებელი. ამავდროულად, ეს უკავშირდება გარკვეული ხარჯების საკუთარ თავზე აღებას. ბუნებრივია, ცოცხალი პროცესია სამედიცინო სერვისები, რასაც სჭირდება სახელმწიფოს მხრიდან ფინანსურად მხარდაჭერა. ამ მიმართულებით ბევრი რამ გვაქვს გეგმაში. არის ცალკეული სერვისები, რომლებიც აუცილებლად მოითხოვს დანერგვას. საზოგადოდ, მედიცინა ვითარდება გარკვეული სიახლეებია როგორც მედიკამენტებით უზრუნველყოფის, ისე მეთოდოლოგიური თვალსაზრისით. იგივე კიბოს დიაგნოსტიკის მიმართულებით არის ცალკეული სერვისები, რომლებიც დასანერგია ქვეყანაში. ბუნებრივია, ამ მიმართულებით ნაბიჯები გადაიდგმება“, – განაცხადა სარჯველაძემ.

ე.წ. ღორის გრიპს პირველი ორი დღე 38 გრადუსი ტემპერატურა ახასიათებს. ხანდახან, 40 გრადუსიც. ასევე, სახსრების ძლიერი, გაუსაძლისი ტკივილი. კუნთების ტკივილთან ერთად, მთელი ორგანიზმის სახსროვანი პრობლემების წამოწევა,- ამის შესახებ პროფესორი, კლინიკური ექსპერტი, მაკა ბულეიშვილი საუბრობს:მისი თქმით, ე.წ. ღორის გრიპს ძლიერი საერთო სისუსტე ახასიათებს. პაციენტს წყლის დალევის სურვილი არ აქვს. სითხე, წყალი ძალიან მნიშვნელოვანია. ეს ვირუსი დეჰიდრატაციას იწვევს. 2-3 დღის განმავლობაში შეიძლება, ხველაც ჩამოყალიბდეს. ხველა იმდენად წამყვანი შეიძლება, არ იყოს პირველი-სამი დღე. თავის ტკივილიც ახასიათებს. გარდა ამისა, დასაწყისში გაბრუება ახასიათებს. პაციენტი ადინამიურია. თითქოს, არაფერი არ შეუძლია... ინკუბაციური პერიოდი 5-7 დღეა. ამ პერიოდში, წესით, მდგომარეობა უნდა გამოსწორდეს.განსაკუთრებული ყურადღება უნდა გავამახვილო ქრონიკული პათოლოგიების მქონე ადამიანებზე. ქრონიკული დაავადებები ასაკოვან ადამიანებსაც აქვთ და ახალგაზრდებსაც. იმ ადამიანებს, რომლებსაც აქვთ ასთმა, ქრონიკული ბრონქიტი, ოკუპაციური დაავადებები, ფილტვის ქრონიკული ობსტრუქციული დაავადება და სხვა პათოლოგიები, გართულების რისკის ჯგუფში არიან. შეიძლება, პნევმონიით გართულდეს. როდესაც 3-4-5 დღე მაღალი ტემპერატურაა, სიმპტომები მილევადი კი არ არის, არამედ კიდევ და კიდევ იმატებს, ასეთ შემთხვევაში, ექიმს აუცილებლად უნდა მივმართოთ. ასევე, შესაძლოა, დეჰიდრატაცია განვითარდეს. ადამიანი სითხეს ვერ იღებს და გაბრუებულია. ძლიერი საერთო სისუსტე ახასიათებს.

ძალიან კარგად იციან, რომ სესხის თემა ძირითადად „ბლეფია“, რთული განსახორციელებელი იქნება, – ამის შესახებ საქართველოს პრეზიდენტმა მიხეილ ყაველაშვილმა კითხვაზე საპასუხოდ განაცხადა.კერძოდ, ყაველაშვილს კითხვა დაუსვეს ევროკავშირის ლიდერების გადაწყვეტილებაზე, რომლის მიხედვითაც, ევროპული საბჭოს სამიტის მონაწილეები რუსეთის გაყინული აქტივების გამოყენების ნაცვლად, უკრაინისთვის ერთობლივი სესხის გამოყოფაზე შეთანხმდნენ.„ვერ მოხდა შეთანხმება გაყინული აქტივების გამოყენებასთან დაკავშირებით და ეს იყო ერთგვარი გამოსვლა ვითარებიდან. ძალიან კარგად იციან, რომ სესხის თემა ძირითადად „ბლეფია“, რთული განსახორციელებელი იქნება. პირდაპირ გაყიდულია ეს ქვეყანა. სამწუხაროდ, ასე ვითარდება პროცესები“, – განაცხადა მიხეილ ყაველაშვილმა.ამასთან, როგორც მიხეილ ყაველაშვილმა აღნიშნა, საზოგადოებამ უნდა გაიაზროს, რომ, პირველ რიგში, „უნდა დავაყენოთ ჩვენი ქვეყნის ეროვნული ინტერესები“.„რაც მეტად რთულდება პროცესები და კრიზისი თვალში საცემი ხდება, მით უფრო მეტ გამოწვევებს უნდა ველოდოთ. ამისთვის ჩვენ მზად ვართ, მაგრამ კიდევ მეტად მომზადებული უნდა იყოს ჩვენი საზოგადოება. ჩვენ უნდა გავუმკლავდეთ კრიზისებს, რომლებიც გამოწვეულია ევროკავშირში, ჩვენ ზურგს არ და ვერ ვაქცევთ, ჩვენი ინტერესები გვაქვს. ძალიან დიდი შესაძლებლობებია, უამრავი მნიშვნელოვანი პროექტი ხორციელდება და ამაში მონაწილე უნდა ვიყოთ. ევროპა ჩვენზე უარს ვერ იტყვის და ვერც ჩვენ ვიტყვით ევროპაზე უარს. ამას აქვს ძალიან დიდი მნიშვნელობა. მივყვეთ პროცესებს. ჩვენ მზად ვართ, ვუპასუხოთ ჩვენს საზოგადოებას, ყველას სამართლიანი მიდგომით, ფაქტებზე დაყრდნობით გავცეთ პასუხი და ძალებს, რომლებიც საქართველოს ნებსით თუ უნებლიეთ ემტერებიან, არ მივცეთ საშუალება, ჩვენთვის, ჩვენი საზოგადოების განვითარებისთვის მნიშვნელოვანი პროექტები შეაფერხონ“, – განაცხადა ყაველაშვილმა.

საფრანგეთის ეროვნული მაუწყებელი აცხადებს, რომ 2026 წლის საბავშვო ევროვიზიას არ უმასპინძლებს.როგორც საბავშვო ევროვიზია 2025-ის გამარჯვებულ ქვეყანას, საფრანგეთს 2026 წლის კონკურსის მასპინძლობაზე უარის თქმის უფლება ჰქონდა.France Télévisions-ში განაცხადეს, რომ კონკურსის ჩატარებაზე უარს ფინანსური მიზეზების გამო ამბობენ. მაუწყებლის განცხადებით, 2026 წლის ბიუჯეტის დასაბალანსებლად ორგანიზაციას 140 მილიონი ევროს დაზოგვა სჭირდება.განცხადებაში France Télévisions-მა დაასახელა ის ნაბიჯები, რომელთა მეშვეობითაც საჭირო თანხის დაზოგვას გეგმავს, მათ შორისაა ეროვნული პროგრამების ბადის ხარჯების შემდგომი შემცირება, განმეორებით ეთერში გასული შემოქმედებითი პროგრამების რაოდენობის გაზრდა, გარკვეული გადაცემების შეწყვეტა და შესაძლოა ერთი ან რამდენიმე სპორტული ღონისძიების მაუწყებლობის უფლებების გადაყიდვაც.ეს არ არის პირველი შემთხვევა, როდესაც საფრანგეთმა გამარჯვების შემდეგ საბავშვო ევროვიზიის მასპინძლობაზე უარი თქვა. 2024 წელს საფრანგეთმა კონკურსის ჩატარებაზე უარი განაცხადა მას შემდეგ, რაც წინა სამი კონკურსიდან ორს უმასპინძლა და გადაწყვიტა, ყურადღება გადაეტანა 2024 წლის პარიზის ზაფხულის ოლიმპიური თამაშების მაუწყებლობაზე. შედეგად, მასპინძელი ქვეყანა ესპანეთი გახდა და 2024 წლის კონკურსი მადრიდში ჩატარდა.ჯერჯერობით უცნობია, რა გავლენას მოახდენს საფრანგეთის ეროვნული მაუწყებლის ბიუჯეტის შემცირებები საფრანგეთის 2026 წლის საბავშვო ევროვიზიის კონკურსში მონაწილეობაზე.ცნობისთვის, 13 დეკემბერს თბილისში გამართულ საბავშვო ევროვიზია 2025-ის კონკურსში ფრანგმა მონაწილემ გაიმარჯვა.

საქართველოს პრემიერ-მინისტრმა ირაკლი კობახიძემ, თბილისის მერ კახა კალაძესთან და ეკონომიკისა და მდგრადი განვითარების მინისტრ მარიამ ქვრივიშვილთან ერთად, „ფერარი თბილისის“ პირველი ოფიციალური შოურუმის გახსნის ცერემონიაში მიიღო მონაწილეობა.საქართველოს მთავრობის ინფორმაციით, პრემიერმა ხაზი გაუსვა საავტომობილო სამყაროს ფლაგმანის საქართველოში შემოსვლის მნიშვნელობას და აღნიშნა, რომ ეს საქართველოში არსებული სტაბილური, მიმზიდველი ბიზნესგარემოს კიდევ ერთი დასტურია.„ალბათ 15-20 წლის წინ ვინმეს რომ ეთქვა, საქართველოში „ფერარის“ ცენტრი გაიხსნებოდა, არავინ დაიჯერებდა, თუმცა დღეს ეს შემდგარი ფაქტია. ყველას მინდა, მოგილოცოთ ეს დღე. ეს არის იმის ნიშანი, რომ ქვეყანა ვითარდება, ქვეყნის ეკონომიკა ვითარდება. ჩვენ ვამაყობთ იმით, რომ გვაქვს ინვესტიციებისთვის, ეკონომიკური აქტივობისთვის შესაფერისი გარემო და ამის გამოხატულებაა დღევანდელი დღეც – ის, რომ „ფერარი“ შემოვიდა საქართველოში. „ფერარი“ არის საავტომობილო ინდუსტრიის ფლაგმანი, ნამდვილი ლიდერი, ეს არის იტალიური ხარისხის ეტალონი. ვამაყობთ, რომ „ფერარი“ დღეს არის ჩვენს ქვეყანაში“, – განაცხადა ირაკლი კობახიძემ.პრემიერ-მინისტრმა განსაკუთრებული მადლობა გადაუხადა „ფერარის“ ევროპისა და აფრიკის პრეზიდენტს რენო დე პოლის და „ნაზარ ჰოლდინგის“ დამფუძნებელ ალი ნაზარს და მათ წარმატებები უსურვა.ღონისძიების სტუმრებს სიტყვით მიმართეს თბილისის მერმა კახა კალაძემ, „ნაზარ ჰოლდინგის“ დამფუძნებელმა ალი ნაზარმა, „ფერარის“ ევროპისა და აფრიკის პრეზიდენტმა რენო დე პოლიმ და „ფერარი თბილისის“ გენერალურმა მენეჯერმა თამარ სახეიშვილმა.ღონისძიებას საქართველოს მთავრობისა და პარლამენტის წევრები და ბიზნესის წარმომადგენლები დაესწრნენ.