პარტიების აკრძალვის შესახებ სარჩელი, ქვეყნის კონსტიტუცია, ევროკავშირთან ურთიერთობა, შიდა და გარე გამოწვევები – რა საკითხებზე ისაუბრა საქართველოს პრეზიდენტმა “დოიჩე ველესთვის” მიცემულ ინტერვიუში

გასათვალისწინებელია, რომ ჩვენ გვყავს ხელისუფლება, სამართალდამცავი სისტემა, რომელთა გამოქვეყნებულ მტკიცებულებას სარწმუნოება, სანდოობა ვერ ექნება, – ამის შესახებ „ნაციონალური მოძრაობის“ წევრმა, ლევან ბეჟაშვილმა „ლელო – ძლიერი საქართველოს“ ერთ-ერთი ლიდერის, ალეკო ელისაშვილის საქმესთან დაკავშირებით განაცხადა.ბეჟაშვილის თქმით, უნდა დაელოდონ, როგორ წარიმართება პროცესები.„ალეკო ელისაშვილის ქმედებების შეფასება მათივე პარტიის თუ კოლეგების მიერ, მათი საქმეა. ბუნებრივია, ჩვენ ვერ ჩავერევით ამ შეფასებებში. რთულია, გაიგო მოტივაცია, მიზნები, რომელიც ალეკო ელისაშვილს ჰქონდა ამ ქმედებების განხორციელებისას, მაგრამ ასევე გასათვალისწინებელია, რომ დღეს ჩვენ გვყავს ხელისუფლება და სამართალდამცავი სისტემა, რომელთა ნათქვამ სიტყვას, რომელთა მიერ გამოქვეყნებულ მტკიცებულებას ვერანაირი სარწმუნოება, სანდოობა ვერ ექნება. ამიტომ, ჩვენ უნდა დაველოდოთ, როგორც წარიმართება პროცესები. ვფიქრობ, ალეკო ელისაშვილი დამატებით გააკეთებს თავის განმარტებებს ამ ქმედებებთან მიმართებაში“, – განაცხადა ბეჟაშვილმა.კითხვაზე, „არ გჯერათ, რომ ეს ჩაიდინა? არ ემიჯნებით?“, ბეჟაშვილმა უპასუხა:„არც ვგმობთ და არც ვემიჯნებით. ელისაშვილთან დაკავშირებით რაიმე შეფასების გაკეთება ძალიან რთულია. ერთი მხრივ, რთულია, ახსნა მოტივაცია, მიზნები და ამოცანები, რომელიც მან დაისახა ამ ქმედებების განხორციელებისას. ბუნებრივია, ამ შეფასების ნაწილში ჩვენ ვერ შევალთ. ამავდროულად, სამართალდამცავი ორგანოების მიერ გამოქვეყნებული მტკიცებულებები თავისთავად არ წარმოადგენს რაიმე სარწმუნო ცნობას, ვინაიდან ამ ხელისუფლების სამართალდამცავ სისტემას არანაირი ნდობა არ აქვს საზოგადოების მხრიდან. ამიტომ, ბუნებრივია, ეს ფაქტი უნდა მივიღოთ, როგორც ფაქტად. კონკრეტული შეფასებებისგან პირადად მე, თავს შევიკავებდი, რადგან სჯობს, ეს შეფასებები გააკეთოს იმ ადამიანებმა, ვისაც უშუალოდ ეხება ქმედებებთან დაკავშირებით პოლიტიკური და სამართლებრივი პასუხისმგებლობა“.

ბოლო თვეებში ჩვენ შევძელით ეკონომიკური ზრდის მაღალი ტემპის შენარჩუნება იმ პირობებში, როცა, კორუფციასა და კარტელურ გარიგებებთან ბრძოლის ფონზე, მთელი რიგი ინფრასტრუქტურული პროექტების დროებით შეჩერება მოგვიწია, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის დღევანდელ სხდომაზე განაცხადა.მისივე თქმით, რაც წელს კორუფციის აღმოფხვრისა და კონკურენციის გაჯანსაღების ხარჯზე დააკლდა ქვეყნის ეკონომიკას, მომავალ წელს ერთიორად დაემატება.„ბოლო თვეებში ჩვენ შევძელით ეკონომიკური ზრდის მაღალი ტემპის შენარჩუნება იმ პირობებში, როცა, კორუფციასთან და კარტელურ გარიგებებთან ბრძოლის ფონზე, მთელი რიგი ინფრასტრუქტურული პროექტების დროებით შეჩერება მოგვიწია. ეს ფაქტი, გარკვეულწილად, აისახა თვეების მიხედვით ეკონომიკური ზრდის მაჩვენებელზე, თუმცა რაც წელს დააკლდა კორუფციის აღმოფხვრისა და კონკურენციის გაჯანსაღების ხარჯზე, მომავალ წელს ეკონომიკას ერთიორად დაემატება. ენერგეტიკის, რკინიგზის, ინფრასტრუქტურის სხვა სფეროებში არაჯანსაღი პრაქტიკების აღმოფხვრა ხელს შეუწყობს ეკონომიკის სწრაფ განვითარებას და მომავალ წელს ეს ზრდის ტემპს პირდაპირ დაეტყობა. ყველა პროექტი, მათ შორის ინფრასტრუქტურული პროექტები, განხორციელდება მაქსიმალურად ხარჯეფექტიანად და უზრუნველყოფილი იქნება პროექტების მაღალი ხარისხი. ამაზე საქართველოს მთავრობა სრულ პასუხისმგებლობას იღებს“, – განაცხადა კობახიძემ.

რუსეთ-უკრაინის სამშვიდობო შეთანხმების მიღწევის კარგი შანსი არსებობს, თუმცა უკრაინაში კორუფცია საქმეს არ აადვილებს, – ამის შესახებ აშშ-ის პრეზიდენტმა, დონალდ ტრამპმა განაცხადა.Air Force One-ის ბორტზე ტრამპმა ჟურნალისტებს განუცხადა, რომ უკრაინაში რუსეთის ომის დასრულების შეთანხმების „კარგი შანსი“ არსებობს.„მოლაპარაკებები მიმდინარეობს და ისინი კარგად მიმდინარეობს. ჩვენ გვინდა, რომ ადამიანების მკვლელობა შევაჩეროთ“, – განაცხადა ტრამპმა.აშშ-ის პრეზიდენტის თქმით, უკრაინელ ოფიციალურ პირებთან გამართული მოლაპარაკებების შემდეგ ესაუბრა აშშ-ის სახელმწიფო მდივანს, მარკო რუბიოს და სპეციალურ წარმომადგენელ სტივ უიტკოფს.„მე ვესაუბრე მათ და ისინი კარგად მუშაობენ. უკრაინას რთული პრობლემები აქვს, მაგრამ ვფიქრობ, რუსეთს სურს, რომ ეს დასრულდეს“, – აღნიშნა ტრამპმა.ჟურნალისტის კითხვაზე, რას გულისხმობდა რთულ პრობლემებში, ტრამპმა უპასუხა, რომ კორუფციასთან დაკავშირებულ სიტუაციას გულისხმობდა, რაც მისი თქმით, „საქმეს არ აადვილებს“.„ვფიქრობ, არსებობს კარგი შანსი, რომ შეთანხმებას მივაღწიოთ“, – აღნიშნა ტრამპმა.

კოალიცია „ძლიერი საქართველო – ლელოს“ ერთ-ერთ ლიდერს ალეკო ელისაშვილს ბრალი ოფიციალურად წარედგინა. როგორც ადვოკატმა ჟურნალისტებს განუცხადა, ელისაშვილის მიმართ თავდაპირველად გამოძიება დაწყებული იყო 187-ე მუხლის მეორე ნაწილით, თუმცა ამჟამად მას ბრალი წარდგენილი აქვს უფრო მძიმე მუხლით, სისხლის სამართლის კოდექსის 323-ე მუხლის პირველი ნაწილით, რაც ტერორისტულ აქტს გულისხმობს და 10-დან 15 წლამდე თავისუფლების აღკვეთას ითვალისწინებს. „მუხლის სახელია ტერორიზმი. ეს არის გადაკვალიფიცირებული მუხლი. მანამდე გამოძიება დაწყებული იყო 187-ე მუხლის მეორე ნაწილით, სხვისი ქონების დაზიანების მუხლით. ითვალისწინებდა 3-დან 6 წლამდე პატიმრობას, თუმცა გადააკვალიფიცირეს. როგორც ჩანს, არ ეყოთ 3-დან 6 წლამდე სანქცია და აღნიშნული მუხლი უკვე ითვალისწინებს 10-დან 15 წლამდე პატიმრობას. ალექსანდრე ელისაშვილს აცხადებენ ტერორისტად“, – განაცხადა ალეკო ელისაშვილის ადვოკატმა, გიორგი რეხვიაშვილმა წინასწარი დაკავების იზოლატორის დატოვების შემდეგ. მისივე თქმით, საქმის მასალები დღეს გადაეცა და მას მოგვიანებით გაეცნობა.   ამასთან, ადვოკატის განმარტებით, ალეკო ელისაშვილი ბრალს არ აღიარებს და მიაჩნია, რომ მის მიერ ჩადენილი ქმედება იყო მხოლოდ პროტესტის გამოხატვის ფორმა. „თავად ალეკო ელისაშვილი არ აღიარებს ბრალს. ის მიიჩნევს, რომ ჩაიდინა რაღაც ქმედებები, რომლებიც არ წარმოადგენს დანაშაულს, ეს არის მისი მხოლოდ და მხოლოდ პროტესტის გამოხატვის ფორმა. ის უსამართლო სასამართლოს მიმართ იყო მიძღვნილი და, ზოგადად, ეს იყო სოლიდარობა პოლიტპატიმრების მიმართ. აქედან გამომდინარე, წარდგენილი მუხლი არის აბსურდული. რამდენი ადამიანი გახსენდებათ, მით უმეტეს პოლიტიკოსი, რომელსაც ტერორიზმის მუხლს წაუყენებენ, მით უმეტეს, ქმედება არ არის განხორციელებული და სისრულეში მოყვანილი. ალექსანდრე ელისაშვილი ქმედებას აღიარებს, თუმცა ის არ თვლის, რომ მისი ქმედება იყო დანაშაულის შემცველი. ამაზეა საუბარი. ის იყო პროტესტის გამოხატვის ფორმა. ამ შემთხვევაში, მისი პოზიცია არის, რომ უსამართლო სასამართლოსთვის ცეცხლის წაკიდების მცდელობა არ არის დანაშაული. ხვალისთვის ველოდებით, რომ ჩაინიშნება სასამართლო პროცესი და სასამართლო იმსჯელებს აღკვეთის ღონისძიების შეფარდებასთან დაკავშირებით. თავადაც დაესწრება და დააფიქსირებს თავის პოზიციას. ჩვენ სტანდარტულად, რა თქმა უნდა, სასამართლოს გირაოს შევთავაზებთ, თუმცა თანხის ოდენობას ხვალ მოგახსენებთ“, – აღნიშნა ადვოკატმა გიორგი რეხვიაშვილმა. ალეკო ელისაშვილი გუშინ, 29 ნოემბერს დააკავეს. შსს-ს ინფორმაციით, ალეკო ელისაშვილმა თბილისის საქალაქო სასამართლოს კანცელარიის შენობის დაწვა სცადა.

საზოგადოებას კიდევ ერთხელ ეძლევა შესაძლებლობა, გაიაზროს, რა მოხდებოდა, უკრაინის ომის დაწყებისას სახელისუფლებო კაბინეტებში არა ეროვნული ხელისუფლება, არამედ უცხოეთის მაამებლები რომ მსხდარიყვნენ, როგორც გადაწყვეტილების მიმღებნი, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.პაპუაშვილის თქმით, ასე რომ მომხდარიყო, დღევანდელი საფიქრალი ინვესტიციების სწორი დაბანდება და განათლების რეფორმა კი არა, დაღუპულების დატირება და ჩვენი ქვეყნის ნანგრევებიდან ამოყვანა იქნებოდა.„კარგია, რომ უკრაინაში დასასრულისკენ მიმავალი ომის ფონზე, კიდევ ერთხელ წამოიწია საკითხმა, რას მოითხოვდნენ ჩვენგან ომის დაწყების პირველივე დღეებიდან. საზოგადოებას კიდევ ერთხელ ეძლევა შესაძლებლობა, გაიაზროს, რა მოხდებოდა, უკრაინის ომის დაწყებისას სახელისუფლებო კაბინეტებში არა ეროვნული ხელისუფლება, არამედ უცხოეთის მაამებლები რომ მსხდარიყვნენ, როგორც გადაწყვეტილების მიმღებნი. ასე რომ მომხდარიყო, ჩვენი დღევანდელი საფიქრალი ინვესტიციების სწორი დაბანდება და განათლების რეფორმა კი არა, დაღუპულების დატირება და ჩვენი ქვეყნის ნანგრევებიდან ამოყვანა იქნებოდა.ის, რომ აშშ-ის წინა ადმინისტრაციის (და ზოგადად დასავლეთის) სწორი ლიდერობის პირობებში უკრაინის ომი არ იქნებოდა, ამას თავად აშშ-ის ხელისუფლება აცხადებს. ისევე, როგორც აშშ-ის ხელისუფლება ამბობს, რომ უკრაინის ომი პროქსი, ანუ მარიონეტული ომია.უკრაინაში ომის დაწყებიდან ოთხი წლის თავზე, როგორც ჩანს, ეს ომი დასასრულს მიუახლოვდა. რამდენად მძიმე პირობების მიღება-არმიღებაზე უწევს უკრაინას ფიქრი, ამას ყველა ვხედავთ.ამის ფონზე, კიდევ უფრო ცხადია, რამდენად მრუდეა ის ქართველი, რომელიც დღესაც მათ თვალებს, განცხადებებს და რეზოლუციებს შესციცინებს, ვინც გუშინ სხვის ომში მიმავალი მეწინავე რაზმის დროშას აჩეჩებდა ხელში.ის, რასაც 2022 წლის 28 თებერვალს, უკრაინაში ომის დაწყებიდან მეოთხე დღეს აშშ-ის მაშინდელი ელჩი ჩემთან შეხვედრისას კატეგორიული ტონით მოითხოვდა, ბევრჯერ მაქვს აღწერილი და ამიტომ, ქვემოთ, კიდევ ერთხელ ვურთავ ჩემს ვრცელ პოსტს. ის, რომ აშშ-ის ელჩის მოთხოვნებზე დაყოლა საქართველოს ომისთვის გაწირვას ნიშნავდა, არათუ საჯაროდ, არამედ აშშ-ის სახელმწიფო მდივნის ყოფილი თანაშემწის, ჯეიმს ო’ბრაიენისთვის მაქვს პირადად ნათქვამი, როდესაც ის შარშან საქართველოში ვიზიტად იმყოფებოდა. რაიმე დამაჯერებელი ახსნა, რა პირით უნდა მოითხოვო საქართველოსგან, უსაფრთხოების გარანტიების მიცემის გარეშე, რუსეთთან სამხედრო დაპირისპირების რისკზე წასვლა, ვერც იმ შეხვედრაზე და ვერც სხვა დროს ვერ მოვისმინე. იგივე ეხება ნატო-ს ქოლგის ქვეშ დიდ გულზე მყოფ ბევრ ევროპელ პოლიტიკოსსაც.ფაქტი ერთია, ზუსტად მათ, ვინც ჩვენი ომის შემდეგ, რუსეთთან სტრატეგიული მოთმინების პოლიტიკას გვკარნახობდნენ, უკრაინაში ომის დაწყებისთანავე რუსეთთან მაქსიმალური ესკალაცია მოგვთხოვეს. ამგვარი ესკალაციის ბოლო წერტილი რომ ომია, ეს ჩვენივე ახლო წარსულმა ბევრჯერ დაგვანახა. ის უცხოელები კი, ვინც რუსეთთან ესკალაციას მოითხოვდნენ და ესკალაციის ბოლოს ომს არ იმჩნევდნენ, ან თავად იყვნენ გულუბრყვილოები, ან ჩვენ ვეგონეთ მიამიტები. მიამიტები, რომლებიც მათ გულუბრყვილობას დავიჯერებდით“, – წერს შალვა პაპუაშვილი.