პაატა სალია – მსოფლიო მთავრობათა სამიტი შესაძლებლობას გვაძლევს, საერთაშორისო თანამეგობრობას გავუზიაროთ ჩვენი მიღწევები და ვისაუბროთ გამოწვევებზე

პარტიის „გახარია საქართველოსთვის“ წევრის, შალვა კერესელიძის განცხადებით, განათლების რეფორმის ეფექტიანობასთან დაკავშირებით ხელისუფლებისგან არცერთი არგუმენტი არ მოუსმენიათ.კერესელიძის თქმით, ივანე ჯავახიშვილის სახელობის სახელმწიფო უნივერსიტეტისა და საქართველოს ტექნიკური უნივერსიტეტის გაერთიანება დასაბუთებული უნდა იყოს.„ხელისუფლებისგან მოვისმინეთ არგუმენტები განათლების რეფორმის ეფექტიანობაზე? რა თქმა უნდა, არ მოგვისმენია. არცერთი არგუმენტი არ იყო. არგუმენტად თუ მიგაჩნიათ, რომ ივანე ჯავახიშვილის სახელმწიფო უნივერსიტეტი და ტექნიკური უნივერსიტეტი უნდა გაერთიანდნენ, ეს არგუმენტი არ არის. არგუმენტები ჯერ ხელისუფლებამ უნდა მოიტანოს და საზოგადოება დაარწმუნოს, რომ მისი გადაწყვეტილებები სწორია. არგუმენტირებულად დასაბუთებული უნდა იყოს, რატომ აერთიანებენ უნივერსიტეტებს. ეს რეფორმა განათლების სფეროში დასაქმებული ადამიანების წინაშე გამოიტანეს, იმსჯელეს, გააცნეს? რა თქმა უნდა – არა. ერთი-ორი ადამიანი დაჯდა, რაღაც დაწერა, მონახაზი გააკეთა და თქვეს, რეფორმა იდეალური არისო. ეს მაშინ ხდება, როცა ცვლილებებს არავინ ეთანხმება“, – აღნიშნა შალვა კერესელიძემ.

განათლების მთავარი მიზანია, კვალიფიციური კადრების მომზადება და უფასო სწავლის გამართლება იმ ხარისხით, რასაც განათლებული საზოგადოებისგან, ანუ კურსდამთავრებულებისგან მივიღებთ, რადგან სახელმწიფო ამის მომზადებაში უშველებელ რესურსს ჩადებს, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ განაცხადა.ვოლსკის თქმით, გაცილებით უფრო ეფექტური იქნება ფაკულტეტების რაციონალიზაცია დარგებისა და სპეციალობის მიხედვით.„პროფესურას ხელფასიც მოემატება და მათი ინტელექტუალური რესურსიც გამოყენებული იქნება ერთი კონკრეტული უნივერსიტეტის გარშემო. თემაზე იქნება დებატები. პრემიერ-მინისტრმა მზაობა გამოთქვა, რომ განხილვა ნებისმიერ დონეზე იყოს“, – აღნიშნა ვოლსკიმ.

სამწუხაროა, რომ პოლიტიკური ინსტრუმენტალიზაცია ხდება განათლების რეფორმაზეც, რაზეც ყველა თანხმდებოდა, რომ რეფორმა საჭირო იყო, – ამის შესახებ პარლამენტის განათლების კომიტეტის თავმჯდომარემ, მარიამ ლაშხმა განაცხადა.მისივე თქმით, მოქალაქეებს სახელმწიფო უნივერსიტეტებში განათლების უფასოდ მიღების საშუალება ექნებათ.„ამისთვის აუცილებელი არ იქნება დედაქალაქში ჩამოსვლა. განათლების ხარისხი უზრუნველყოფილი იქნება მათ სამყოფელ ადგილზე“, – განაცხადა მარიამ ლაშხმა.ამასთან, მარიამ ლაშხმა ისაუბრა, რა მიზნით ერთიანდება თბილისის სახელმწიფო და ტექნიკური უნივერსიტეტები.„უნივერსიტეტების გაერთიანებასთან დაკავშირებით სპეკულაციებს რაც შეეხება, არც საკანონმდებლო კუთხით, არც დადგენილებაში ქონებაზე საუბარი არ არის. ესეც ერთ-ერთი მანიშნებელია, რომ სპეკულაციებს ვისმენთ. რაც უნდა ვისაუბროთ „ჰარვარდზე“, „ოქსფორდზე“, „კემბრიჯზე“, რა თქმა უნდა, თბილისის სახელმწიფო უნივერსიტეტსა და საქართველოს ტექნიკურ უნივერსიტეტს უდიდესი ისტორია, ფასდაუდებელი წვლილი აქვს ჩვენი ერის ჩამოყალიბებასა და განვითარებაში.სამწუხაროდ, დღეს არცერთი ქართული უნივერსიტეტი არ არის მსოფლიო რეიტინგების ხუთასეულშიც კი. ამ რეფორმის ერთ-ერთი მთავარი მიზანი, მათ შორის გაერთიანება, ემსახურება უმაღლეს საგანმანათლებლო სისტემაში განათლების ხარისხის იმგვარად უზრუნველყოფას, რომ ჩვენი უნივერსიტეტი, სულ მცირე, ხუთასეულში მოხვდეს და შემდეგ უკვე, დიდ პერსპექტივაში, ორასეულშიც.დეზინფორმაციაა, რომ რომელიმე უნივერსიტეტი უქმდება. ის, რომ სახელწოდება იქნება თბილისის სახელმწიფო უნივერსიტეტი, არ გულისხმობს საქართველოს ტექნიკური უნივერსიტეტის ჩაყლაპვას. ეს არის ერთი ქოლგის, ერთი ქუდის ქვეშ ორი მნიშვნელოვანი უნივერსიტეტის გაერთიანება და გაძლიერება. რეფორმის ფარგლებში დაანონსდა – „ერთი ფაკულტეტი – ერთი ქალაქი“. რეფორმა გულისხმობს, რომ ტექნიკურ უნივერსიტეტში, სადაც არაერთი ჰუმანიტარული მიმართულებაა, ასევე სახელმწიფო უნივერსიტეტში, სადაც ასევე ტექნიკური მიმართულებებია, ან მილევად რეჟიმში უნდა ყოფილიყო, ან ერთმანეთში გადასულიყო.მაგალითისთვის, ფიზიკის ფაკულტეტი სად უნდა იყოს, თბილისის სახელმწიფო უნივერსიტეტში თუ საქართველოს ტექნიკურ უნივერსიტეტში? ძალიან რთულია, ამაზე პასუხი გასცე, რადგან თსუ-ს დიდი წვლილი აქვს ფიზიკის დარგის განვითარებაში, თუმცა ეს აზრობრივად ტექნიკურია და ტექნიკური უნივერსიტეტი ფიზიკის გარეშე წარმოუდგენელია. ისევ დუბლირებებთან გვექნებოდა საქმე და რთული იქნებოდა, გაგვენაწილებინა, სად უნდა ყოფილიყო. ეს რომ არ მომხდარიყო, მნიშვნელოვანია, რესურსების გაერთიანება მოხდეს. გაერთიანება გულისხმობს რესურსების გაერთიანებასა და სწორ დაგეგმვას“, – განაცხადა მარიამ ლაშხმა.

აშშ-ის სპეციალური წარმომადგენელი სტივ უიტკოფი და ირანის საგარეო საქმეთა მინისტრი აბას არაღჩი უახლოეს მომავალში, შესაძლოა, ერთმანეთს თურქეთში შეხვდნენ. ამის შესახებ სააგენტო „როიტერი“ ირანელ და ამერიკელ წყაროებზე დაყრდნობით წერს.ირანის საგარეო უწყების პრესსპიკერის, ისმაელ ბაღაის განმარტებით, თეირანი განიხილავს სხვადასხვა ასპექტს მოლაპარაკებებისთვის და აღნიშნავს, რომ ირანისთვის დროს გადამწყვეტი მნიშვნელობა აქვს, რამდენადაც ქვეყანას სურს, მალე გაუქმდეს მისს მიმართ დაწესებული სანქციები.ირანში აცხადებენ, რომ „ახლა ბურთი ტრამპის მოედანზეა“, რამდენადაც ისინი მზაობას გამოთქვამენ, წავიდნენ გარკვეულ დათმობებზე, როგორიცაა ურანის გამდიდრება, მათ შორის, დათმონ 400კგ-მდე გამდიდრებული ურანი და უარი თქვან მის შემდგომ გამდიდრებაზე. თუმცა სანაცვლოდ თეირანს სურს, რომ ამერიკამ თავისი სამხედრო აქტივები ირანისგან მოშორებით გაიყვანოს.აღსანიშნავია, რომ გასულ კვირას პრეზიდენტმა ტრამპმა ირანს მოლაპარაკების დასაწყებად სამი წინაპირობა წაუყენა: ურანის გამდიდრებაზე უარის თქმა, ბალისტიკური პროგრამის შეზღუდვა და მარიონეტული რეგიონული ძალების დაფინანსების დასრულება.ირანის საგარეო საქმეთა მინისტრი აბას არაღჩი დარწმუნებულია, რომ აშშ-თან შეთანხმებას მიაღწევენ. მისი თქმით, ირანმა დაკარგა ნდობა შეერთებული შტატების მიმართ, თუმცა ირანის საგარეო საქმეთა მინისტრი ამბობს, რომ პარტნიორი ქვეყნების მეშვეობით შეტყობინებების გაცვლა ხელს უწყობს „ნაყოფიერ“ მოლაპარაკებებს აშშ-თან. როგორც არაღჩი აღნიშნავს, მოლაპარაკებები უნდა შეეხოს მხოლოდ ირანის ბირთვულ პროგრამას, რის სანაცვლოდაც ირანი მოითხოვს ამერიკული სანქციების მოხსნას და უფლებას, გააგრძელოს ურანის გამდიდრება მშვიდობიანი მიზნებისთვის. ირანის საგარეო საქმეთა მინისტრის განმარტებით, თუ მოლაპარაკებები ჩაიშლება, ირანი მზად არის ომისთვის, რაც „კატასტროფა იქნება ყველასთვის“ და რეგიონში მდებარე ამერიკული ბაზები ირანის სამხედრო სამიზნე გახდება.ამასთან დაკავშირებით თავისი მოსაზრება აქვს დონალდ ტრამპს, რომლის თქმითაც, თუ ირანთან შეთანხმება არ შედგება, ამერიკას უკვე განთავსებული ჰყავს მსოფლიოში ყველაზე დიდი და ძლიერი ხომალდები ირანის სიახლოვეს და გაირკვევა, გამოიწვევს თუ არა ამერიკის შეტევა რეგიონულ ომს, როგორც ამის შესახებ ირანის სულიერი ლიდერი აიათოლა ალი ხამენეი ამბობს.

რას ვხედავთ დღეს? წესებზე დაფუძნებული საერთაშორისო წესრიგი მოშლილია, მიდის პირდაპირი ბრძოლა ამა თუ იმ სახელმწიფოს სულისთვის, ანუ მისი მმართველობისთვის და ფული, გავლენები – არის შესაძლებლობა ქვეყნების მმართველობაზე ზემოქმედების მოპოვებისა, – ამის შესახებ პარლამენტის თავმჯდომარემ, შალვა პაპუაშვილმა „რუსთავი 2-ის“ ეთერში, გადაცემაში „დებატები“ განაცხადა.პაპუაშვილის თქმით, „გამჭვირვალობის თემა არის არა იმდენად ბუღალტრული თუ „ენჯეოს“ საკითხები, არამედ ეს არის გეოპოლიტიკური საკითხი“.„ციტატას მოვიყვან: „უცხოური გავლენის არაგამჭვირვალობა აზიანებს დემოკრატიულ პროცესებს, უცხოური ჩარევა იწვევს პოლარიზაციას, არჩევნების დამახინჯებას და დემოკრატიის ეჭვქვეშ დაყენებას“. ეს არის ჩემი სიტყვები, ეს არის ამონარიდი ევროკავშირის დემოკრატიის აქტის, დირექტივის შეფასების დოკუმენტიდან და ასევე, ევროპარლამენტის რეზოლუციიდან. დავეთანხმები ერთ მოსაზრებას და ბატონმა იაგომაც იკითხა, თუ რა არის მიზანი? ჩვენ ამას უნდა შევხედოთ არა ვიწრო ხედვით, არამედ ფართო სურათი უნდა დავინახოთ. სინამდვილეში ეს კანონი და კანონთა წყება, ზოგადად გამჭვირვალობის თემა ეს არის არა იმდენად საკითხი ბუღალტრული, თუ „ენჯეოს“ საკითხები, არამედ ეს არის გეოპოლიტიკური საკითხი. ეს კანონი თავისი არსით წინ უსწრებდა იმ გეოპოლიტიკურ პროცესებს, რომლებსაც ჩვენ დღეს ვაკვირდებით.რას ვხედავთ ჩვენ დღეს? წესებზე დაფუძნებული საერთაშორისო წესრიგი მოშლილი არის, მიდის პირდაპირი ბრძოლა ამა თუ იმ სახელმწიფოს სულისთვის, ანუ მისი მმართველობისთვის და ფული, გავლენები – არის შესაძლებლობა ქვეყნების მმართველობაზე ზემოქმედების მოპოვებისა. სწორედ ეს არის სახელმწიფოს ფუნქცია, რომ დაიცვას საკუთარი სახელმწიფო, ხალხი, სხვა ქვეყნების გავლენისგან და იმ გეოპოლიტიკურ სიტუაციაში, რომელშიც ჩვენ ვართ.ჩვენ ვხედავდით, ეს ყველა წყება ამ კანონებისა არის რეაქცია იმაზე, თუ რა ხდებოდა წლების განმავლობაში საქართველოში, იქნებოდა ეს უცხოური სხვადასხვა დიპლომატიური წარმომადგენლები, ორგანიზაციები ჩართული იყვნენ სხვადასხვა დონეზე ფაქტობრივად მმართველობის პროცესებში. ჩვენ ვნახეთ, დაახლოებით, ალბათ, 2020 წლიდან მოყოლებული… პარალელური დათვლის შედეგების გაყალბება, ეს იყო პირველი სიგნალი იმისა, რომ აღმოჩნდა, უცხოური დაფინანსებით შეიქმნა გარკვეული ქსელი ჯგუფებისა, რომლებიც იყვნენ ლოიალური არა საკუთარი სახელმწიფოს მიმართ, არამედ ლოიალური დამფინანსებლის მიმართ“, – აცხადებს შალვა პაპუაშვილი.