ნიკოლ ფაშინიანმა ირანის პრეზიდენტს სამძიმრის წერილი გაუგზავნა – „ჩვენ ყოველთვის გვემახსოვრება ალი ხამენეის პირადი როლი სომხეთ-ირანის ურთიერთობების განვითარებაში“

89:60 – ასეთი ანგარიშით დაამარცხა საქართველოს კალათბურთელთა ნაკრებმა დანია თბილისში და მსოფლიო ჩემპიონატის მეორე ჯგუფურ ეტაპზე გავიდა. მატჩი თბილისის სპორტის სასახლეში სავსე ტრიბუნების წინაშე გაიმართა და როგორც ერთი, ასევე მეორე გუნდისთვის ძალიან ბევრს წყვეტდა. წაგების შემთხვევაში დანიელები ჯგუფს მეოთხე ადგილზე (მიუხედავად იმისა, რომ ივლისში კიდევ ორი ტურია) დაასრულებდნენ. მსოფლიო ჩემპიონატის საგზურისთვის ბრძოლას კი ოთხგუნდიანი ჯგუფებიდან საუკეთესო სამ-სამი ნაკრები განაგრძობს.A ჯგუფიდან გავიდნენ ესპანეთი, უკრაინა და საქართველო. ბოლო ორ ტურში და მეორე საკვალიფიკაციო ეტაპზე ვინც მეტ ქულას დააგროვებს, ფინალურ ეტაპზეც ის ითამაშებს. აქვე გეტყვით: მეორე ჯგუფურ ეტაპზე საქართველოს ჯგუფის ტრიო B ჯგუფის (საბერძნეთი, მონტენეგრო, პორტუგალია, რუმინეთი) სამეულს შეუერთდება, ექვსგუნდიანი ჯგუფიდან კი მსოფლიოს ჩემპიონატზე სამი მოხვდება.მატჩის სურათი წინასწარვე გამოსაცნობი იყო: დანიის ნაკრებს ევროლიგის კალათბურთელები იფე ლუნდბერგი და შეივონ შილდსი აკლდა. უმეტესად დანიის ჩემპიონატის ახალგაზრდები თამაშობენ და შენგელიას, რიდის, სანაძის დარ გამოცდილ მოთამაშეებთან კლასში სხვაობა ნამდვილად იგრძნობოდა. მიუხედავად იმისა, რომ კარგად განსწავლული, ენერგიული გუნდია, დანია საქართველოს პირველივე ტაიმში ჩამორჩა და ჩვენი გუნდი დიდ შესვენებაზე 12-ქულიანი უპირატესობით გავიდა (43:31). მეორე ტაიმის დასაწყისში სხვაობა იმდენად გაიზარდა (58:34), რომ ბოლო 15-მა წუთმა ფორმალური სახე მიიღო. ცხადი იყო, რომ დანიელები თამაშს ვეღარ შემოატრიალებდნენ.პირველი თამაშის შემდეგ კიდევ უკეთ გაიხსნა ახალი ლეგიონერი მარკის რიდი, რომელმაც სამ მეოთხედში 25 ქულა ჩააგდო, ხოლო მატჩი 29 ქულით დაასრულა. ორმაგი დუბლი შეასრულა თორნიკე შენგელიამ – 27 ქულა, 11 მოხსნა. ფარქვეშ კარგად იბრძოდა გიორგი შერმადინის შემცვლელი გიორგი ტურძილაძე. დუდა სანაძე იმდენად სასარგებლო იყო, რომ ალექსანდრ ჯიკიჩი იშვიათად ცვლიდა. რაც შეეხება ალექსანდრე მერკვილაძეს, მან სანაკრებო სტატისტიკა არ გაიფუჭა: დანიაში ჩაგდებული ოთხიდან ოთხი სამქულიანის შემდეგ თბილისში სამიდან სამი სამიანი ჩააგდო.ჯგუფის მომდევნო ორი მატჩი ივლისში გაიმართება: საქართველოს ნაკრები უკრაინასთან სტუმრად (მატჩი ლატვიაში შედგება) 2 ივლისს ითამაშებს, ხოლო 5 ივლისს ესპანეთს უმასპინძლებს. იმ მატჩებში ჩვენს გუნდს სანდრო მამუკელაშვილი და გოგა ბითაძეც დაეხმარებიან. 

თურქეთის პრეზიდენტმა ისრაელისა და აშშ-ის მიერ ირანზე თავდასხმები საერთაშორისო სამართლის დარღვევად შეაფასა.რეჯეფ თაიფ ერდოღანის თქმით, მისი ქვეყანა იზიარებს ირანელი ხალხის ტკივილს და დიპლომატიურ ძალისხმევას გააძლიერებს მანამდე, ვიდრე ცეცხლის შეწყვეტა და სიმშვიდე არ დამყარდება რეგიონში.„რეგიონში მიმდინარე კონფლიქტებს შაბათს დაემატა ჩვენი მეზობელი ირანის წინააღმდეგ განხორციელებული თავდასხმები, რომლებიც საერთაშორისო სამართლის აშკარა დარღვევაა… მთავარია, რომ მიღწეულ იქნას ცეცხლის შეწყვეტა და დიალოგის კარი გაიღოს. პირდაპირ ვიტყვი: თუ საჭირო ჩარევა არ მოხდა, კონფლიქტს სერიოზული შედეგები ექნება რეგიონული და გლობალური უსაფრთხოებისთვის. არავის შეუძლია, გაუძლოს ეკონომიკურ და გეოპოლიტიკურ გაურკვევლობას, რომელსაც ასეთი პროცესი წარმოშობს“, – თქვა ერდოღანმა.

ადამიანები ქართული გვარებით, საქართველოს მოქალაქის წოდებით ეხმარებიან ძალებს, რომლებიც გეუბნებიან, რომ საჭიროა ცეცხლში ჩაგდება ამ შუა დერეფნის მნიშვნელოვანი გეოგრაფიული მდებარეობის მქონე ქვეყნის და ეს უნდა განხორციელდეს არა არჩევნებით, არამედ რევოლუციური გზით, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ განაცხადა.მისი თქმით, „ერთიანი ნაციონალური მოძრაობა“ არ დაშლილა.„ყოველთვის ერთად იყვნენ. უბრალოდ, ილუზიას ქმნიან, რომ რაღაც პროცესი მიმდინარეობს. იქ შეიკრიბნენ ყურადღება მიიქციეს, მედიასაშუალებებმა გაავრცელეს მათ შესახებ ინფორმაცია, ახალი განცხადებები გააკეთეს, თუმცა არასოდეს დაშლილან. არც „ლელო“ და გახარიას პოლიტიკური პარტია შორს არ ყოფილა იმ იდეისგან და იმ აქტივობებისგან, რაც მათ ამ წლების განმავლობაში ჰქონდათ. ეს ყველა ერთია, ვინაიდან საქმეები გვიჩვენებს ამას და არა უბრალოდ განცხადებები. საქმე არის ერთი, ძალიან სერიოზულად შემაშფოთებელი, ვინაიდან საქართველოში ჩამოყალიბდა და უკვე მყარად დგას, უკვე რაღაც გაერთიანების ფორმა აქვს ამას წლებია, მთავარი ნიშნით, მთავარი ამოცანით და მთავარი სამიზნით, როგორ დააზიანონ საკუთარი ქვეყანა, როგორ მოახდინონ ისეთი სიტუაცია, როგორ შექმნან, რომ როგორმე იქნებ ბომბები ჩვენც გვეცემოდეს და როგორ დადგნენ შემდეგ ცალ ფეხზე, რომ იქნებ რაღაც პროცესის მონაწილენი გახდნენ და ხელისუფლების სადავეები აიღონ ხელში“, – განაცხადა გია ვოლსკიმ.მისი თქმით, ​„დიფ სთეითის“ მიზანი ყოველთვის ერთი და იგივე იყო.​„სცენარი და მიზანი ყოველთვის ერთი და იგივე იყო „დიფ სთეითის“, გინდა ომის პარტია დაარქვით, გინდა ოლიგარქიული ოჯახები, რომ ჰყავდეთ ამ საგანგებოდ მნიშვნელოვან რეგიონში ისეთი მოკავშირე პოლიტიკური ძალა, რომელსაც თავისუფლად გადააადგილებენ ან გააკეთებინებენ იმას, რაც მათ ინტერესებს შეესაბამება და შესაძლოა, ვინმეს ილუზიაც აქვს, რომ იგი რამეს წარმოადგენს ამ საერთო სურათში, რომელიც სამწუხაროდ ისეთი სერიოზული დაპირისპირებითა და ტურბულენტობით ხასიათდება. ვიღაცას გაუჩნდა აზრი, რომ იგი რაღაცას წარმოადგენს ამ ომში თუ არა საზარბაზნე ხორცს, რასაც პირდაპირ არც გვიმალავენ, იმდენად აშკარაა ეს მცდელობა ჩვენს წინააღმდეგ, ამას გარკვეული მიზანი გააჩნია და გარკვეული სტრატეგია არსებობს. აი ამის რეალიზაციაში ადამიანები ეხმარებიან ქართული გვარებით, საქართველოს მოქალაქის წოდებით ეხმარებიან ძალებს, რომლებიც გეუბნებიან, რომ პირდაპირ საჭიროა ცეცხლში ჩაგდება ამ შუა დერეფნის მნიშვნელოვანი გეოგრაფიული მდებარეობის მქონე ქვეყნის და ეს უნდა განხორციელდეს არა არჩევნებით, არამედ რევოლუციური გზით და რამდენიმე ათეული მაგალითი შეგვიძლია, მოვიყვანოთ ბოლო წლების განმავლობაში ამ პოლიტიკისა და ხედვის გამოვლინების. დღეს ვიხილეთ კიდევ ერთი შეკრება იმისთვის, რაღაც იქნებ განახლდეს ასეთ ვითარებაში, რაც მსოფლიოს, სამწუხაროდ, ახასიათებს, იქნებ განახლდეს ინტერესი კვლავ მარიონეტებისა და ცალ ფეხზე მდგომი ხალხის მიმართ“, – აღნიშნა გია ვოლსკიმ.

მე მოვუწოდებ „ნაცებს“, ნუ აფერხებენ საკუთარ წარმატებას, გაერთიანებას რაღაც უაზრო კოალიციობანას თამაშით, შეთანხმების ტექსტში ჩაიწეროს მარტივი სიტყვები: „ჩვენ ვთანხმდებით ერთადერთ რაღაცაზე, მიშა ყოველთვის მართალია“, ყველა პრობლემა, ერთ წამში აღმოიფხვრება, – ამის შესახებ „გირჩის“ ლიდერმა, იაგო ხვიჩიამ განაცხადა.ხვიჩიას თქმით, მხოლოდ მიხეილ სააკაშვილის უზენაესობის აღიარებით, შეიძლება, მოხდეს გაერთიანება.„ახლა თვალს ვადევნებდი „ნაცმოძრაობის“ გაერთიანების მცდელობას, მაგრამ როგორც ჩანს, წარმატებულად არ მიდის ეს საქმე და ხალხი ლაპარაკობს, რომ ჩვენ ძირითად სამუშაო დოკუმენტებზე თუ პრინციპებზე შევთანხმდით, ერთობა აუცილებელია და ა.შ. ეს ჩვენ გვესმის წლებია უკვე და აქედან არაფერი გამოდის, რადგან ეს მონაწილეები, ყოფილი „ნაცები“ გაერთიანებას აპირებენ მთავარი ფაქტორის დაიგნორების გარეშე. მთავარი ფაქტორი არის მიშა. „ნაცმოძრაობას“ ყოველთვის მიშა აერთიანებდა და ნებისმიერი გაერთიანების მცდელობა, რომელიც ამ ფაქტორს უგულებელყოფს, არ იქნება წარმატებული. მანამდე, ვიდრე ეს ხალხი, ვინც იქ არის შეკრებილი, ხალხი, რომელიც იყო „ნაცმოძრაობის“ წევრი, მერე უღალატეს მიშას და დამოუკიდებელი პოლიტიკური ცხოვრება დაიწყეს, არ შეთანხმდებიან იმ პრინციპზე, რაზეც იდგა სულ „ნაცმოძრაობა“, რომ მიშა ყოველთვის მართალია, არაფერი გამოვა. ამიტომ, მე მოვუწოდებ „ნაცებს“, ნუ აფერხებენ საკუთარ წარმატებას, გაერთიანებას რაღაც უაზრო კოალიციობანას თამაშით. მარტივად, შეთანხმების ტექსტში ჩაიწეროს მარტივი სიტყვები: „ჩვენ ვთანხმდებით ერთადერთ რაღაცაზე, მიშა ყოველთვის მართალია“. შესაბამისად, ყველა პრობლემა, რომელიც ახლა უდგათ ამ ადამიანებს, „ნაცმოძრაობის“ ყველა ლიდერს, ერთ წამში აღმოიფხვრება. მიშას რაც შეეხება, ის საკმაოდ ადვილად პატიობს ღალატს ადამიანებს, ამიტომ მიშას გულმოწყალების იმედით და მიშას უზენაესობის აღიარებით, შეიძლება მხოლოდ, მოხდეს ეს გაერთიანება. დანარჩენი ნებისმიერი გზა არის წყლის ნაყვა და მე არ მიხარია, როცა ჩემი კოლეგები სრულიად უაზროდ ნაყავენ წყალს“, – განაცხადა ხვიჩიამ.

ჩვენ ვქმნით ერთობას ერთად გამარჯვებისთვის, – ამის შესახებ პარტია „ახლის“ ლიდერმა ნიკა გვარამიამ ოპოზიციური პარტიების შეხვედრის შემდეგ ჟურნალისტებს განუცხადა.გვარამიას თქმით, ოპოზიცია თანხმდება ერთიან მიმართულებაზე, ერთიან მოქმედებებზე და არ ამბობენ უარს საკუთარ პოლიტიკურ იდენტობებზე.„ჩემთვის დიდი პატივი და ძალიან სასიხარულოა, რომ მიწევს იმის განცხადება, რომ ოპოზიციის ალიანსი, სწორედ ამ სახელით, შედგა. ეს არ იყო ხანმოკლე კონსულტაციები, არ იყო მარტივი კონსულტაციები. დიდი ხანია, ეს მიმდინარეობს. ამასობაში ბევრნი ციხეში მოვხვდით, ვიღაცები გამოვედით, ვიღაცები ჯერ ისევ ციხეში არიან, ვიღაცები კი – არა, ძალიან მნიშვნელოვანი ადამიანები ქართული საზოგადოებისთვის, როგორც პოლიტიკოსები, ასევე ჟურნალისტები და სხვები. ჩვენ ვქმნით არა საკონსულტაციო ფორმატს, არამედ ვქმნით ერთობას ერთად გამარჯვებისთვის. კვლავ ხაზგასმულად ვიტყვი, ჩვენ ვქმნით ერთობას ერთად გამარჯვებისთვის. ჩვენ ვთანხმდებით ერთიან მიმართულებაზე, ერთიან მოქმედებებზე. ჩვენ არ ვამბობთ უარს ჩვენს პოლიტიკურ იდენტობებზე, არ ვქმნით რაღაცა ერთიან სიას, ამაზე ლაპარაკი ახლა არ მიმდინარეობს და არც ვიცით, მომავალში იქნება თუ არა ამაზე ლაპარაკი, მაგრამ ჩვენ ვქმნით ერთიანად სამოქმედო ერთობას. ჩვენ ვფიქრობთ, რომ მნიშვნელოვანია ახლა პოლიტიკური ერთობა და ეს მნიშვნელოვანია, როგორც წინაპირობა საზოგადოებრივი ერთობისთვის. ჩვენ გვინდა, ამაში მონაწილეობა მივიღოთ და ვისაუბროთ საზოგადოების ძალიან ფართო ჩართულობით“, – განაცხადა ნიკა გვარამიამ.ამასთან, შეხვედრის მონაწილე ოპოზიციურმა პარტიებმა გაავრცელეს ერთობლივი განცხადებაც.„დღეს საქართველოს დემოკრატიული ოპოზიციური პარტიების ალიანსი ვთანხმდებით საერთო სტრატეგიასა და მოქმედების ერთობლივ წესებზე და ვაცხადებთ, რომ ჩვენი ერთობლივი ძალისხმევით გავათავისუფლებთ საქართველოს ბიძინა ივანიშვილის ავტოკრატიული რეჟიმისგან, აღვადგენთ ქვეყნის ევროატლანტიკურ კურსს და უზრუნველვყოფთ დემოკრატიულ მმართველობას, ქვეყნის უსაფრთხოებასა და ქართველი ხალხის კეთილდღეობას.ჩვენი შეთანხმება ემყარება შემდეგ პრინციპებს:ერთობა ერთფეროვნების გარეშე: ალიანსის დამფუძნებელი პარტიები ინარჩუნებენ იდეოლოგიურ იდენტობას, თუმცა თანხმდებიან ერთიან საპროტესტო მოქმედებასა და საკომუნიკაციო სტრატეგიაზე. ჩვენი ამოცანაა, როგორც ქვეყნის შიგნით ქართველ ხალხს, ისე ქვეყნის გარეთ საქართველოს მოკავშირეებს დავანახოთ, რომ წარმოვადგენთ ივანიშვილის ოლიგარქიული და ავტოკრატიული რეჟიმის დემოკრატიულ ალტერნატივას.დემოკრატიული ალტერნატივა: პარტიები ვთანხმდებით, რომ ავტოკრატიულ რეჟიმს მხოლოდ მოქალაქეების ინტერესებზე ორიენტირებული დემოკრატიული ალტერნატივა დაამარცხებს. მნიშვნელოვნად მივიჩნევთ, რომ გადაწყვეტილების მიღების პროცესში ალიანსი დაეფუძნოს მონაწილეების თანასწორობის პრინციპსა და გარე გავლენებისგან თავისუფალი ნების გამოხატვას.პოლიტიკური და საზოგადოებრივი კონსენსუსი: მიზნად ვისახავთ საზოგადოების ფართო ჩართულობით დიდი პოლიტიკური და საზოგადოებრივი თანხმობის მიღწევას, რათა თავისუფალი და სამართლიანი არჩევნების გზით დავამარცხოთ ივანიშვილის რეჟიმი და ჩამოაყალიბოს დემოკრატიული კოალიციური ხელისუფლება, რომელიც გაატარებს აუცილებელ რეფორმებს.შეთანხმების მონაწილე პარტიები ვთანხმდებით ქცევის კოდექსზე, რომელიც აწესრიგებს ხელმომწერ სუბიექტებს შორის ურთიერთობის წესებს და ადგენს პასუხიმგებლობას მათი დარღვევისთვის.ოპოზიციის ალიანსი იბრძოლებს ბოლომდე – პოლიტიკური პატიმრების გათავისუფლებამდე და თავისუფალ, სამართლიან არჩევნებში გამარჯვებამდე“, – ნათქვამია განცხადებაში, რომელიც „ნაციონალური მოძრაობის“ გვერდზე გამოქვეყნდა და ხელს აწერენ შემდეგი პარტიები: „ახალი“, „გირჩი“, „დროა“, „ევროპული საქართველო“, „ნაციონალური მოძრაობა“, „ეროვნულ-დემოკრატიული პარტია“, „თავისუფლების მოედანი“, „სტრატეგია აღმაშენებელი“, „ფედერალისტები“.