ჩვენ უნდა ვიაროთ წინ განვითარებისთვის და იმისათვის, რომ ევროკავშირში გაწევრიანება იყოს რეალური შესაძლებლობა და ეს მოვახერხოთ ,- ამის შესახებ ევროინტეგრაციის კომიტეტის თავმჯდომარემ, მაკა ბოჭორიშვილმა „დღის ქრონიკაში“ განაცხადა.
მისივე თქმით, საქართველოს ხელისუფლებისათვის მნიშვნელოვანია ქვეყანაში იყოს სტაბილურობა, მშვიდობა და ეკონომიკური განვითარების შესაძლებლობა.
„საქართველოს არსად გადაუხვევია, რომ გზაზე იყოს დასაბრუნებელი. საქართველოს ჰყავს ხელისუფლება, რომელიც არჩეულია ქართველი ამომრჩევლის უმრავლესობის მიერ და რომლისთვისაც მთავარი არის საჭიროებები, რაც აქვს საქართველოს, ქართველ ხალხს იმისათვის, რომ ამ ქვეყანაში პოლიტიკური პროცესი იყოს სტაბილური, დემოკრატიულ განვითარებას საფრთხე არ შეექმნას და გააკეთოს ყველაფერი იმისათვის, რომ ქვეყანაში იყოს სტაბილურობა, მშვიდობა და ეკონომიკური განვითარების შესაძლებლობები. ეს არის ამ ხელისუფლების მთავარი მიზნები და ამას ემსახურება ნებისმიერ ნაბიჯი, რომელსაც ეს ხელისუფლება დგამს. შესაბამისად, არაფერი აქვს ამ ხელისუფლებას არსად დასაბრუნებელი. ჩვენ უნდა ვიაროთ წინ განვითარებისთვის და იმისათვის, რომ ევროკავშირში გაწევრიანება იყოს რეალური შესაძლებლობა და ეს მოვახერხოთ.
მისივე თქმით, ევროპელი კოლეგები ევროკავშირში დემოკრატიის დაცვას სწორედ გამჭვირვალობის კანონით ცდილობენ.
„ორნაირად ხდება გამჭვირვალობის ინტერპრეტაცია. საქართველოს შემთხვევაში, რატომღაც ეს საკითხი აღმოჩნდა დემოკრატიის ძირის გამომთხრელი, მაშინ, როდესაც ეს არის ზუსტად ის ინსტრუმენტი, რომლითაც ჩვენი ევროპელი კოლეგები ევროკავშირში ცდილობენ დემოკრატიის დაცვას“,- აღნიშნა ბოჭორიშვილმა.