ლევან იოსელიანი – ჩემი ყოველწლიური ანგარიში იხსნება საოკუპაციო ხაზის გასწვრივ მცხოვრები ადამიანების მდგომარეობით, ჩვენი ქვეყნის ტერიტორიების ოკუპაცია არის ნომერ პირველი პრობლემა ყველა მოქალაქისთვის

შვილიშვილის მიერ მძევლად აყვანილი ბებია „კურიერთან“ იმ 3 საათს იხსენებს, რა დროსაც მას თავისუფლება უკანონოდ აღუკვეთეს.ნელი კაღაშვილი ჰყვება, რომ შვილიშვილმა ის ღუმელთან დასვა, ყელზე დანა მიადო და უთხრა, რომ არ განძრეულიყო. შეშინებული ქალი შვილიშვილის მოთხოვნებს დაემორჩილა.3 საათის განმავლობაში, ბებიამ არ იცოდა, რატომ უკრძალავდა შვილიშვილი გადაადგილებას და რატომ ემუქრებოდა დანით. მძევლად აყვანის მიზეზი 76 წლის ქალმა სამართალდამცველების მისვლამდე რამდენიმე წუთით ადრე გაიგო. ირკვევა, რომ გიორგი კაღაშვილს ერთადერთი ულტიმატუმი ჰქონდა - ითხოვდა მისი ყოფილი მეუღლის უცხოეთიდან საქართველოში დაბრუნებას. წინააღმდეგ შემთხვევაში კი ბებიას მოკლავდა.„ხელი ისე ჰქონდა მოჭერილი, რომ გასაქანი არ მქონდა... გული ცუდად გამიხდა, ვუთხარი, შვილო, მაგიდაზე წამალია და მომაწოდე-თქო. მერე წამალი მომაწოდა, მარცხენა ხელი ამიშვა. 112-ში თავად დარეკა. პოლიცია მალევე მოვიდა. პოლიციას ეუბნებოდა, ჩემი მეუღლე  ჩამომიყვანეთ იტალიიდანო...“, - იხსენებს ბებია.76 წლის ქალის უკანონოდ აღკვეთილი თავისუფლება მაშინ დასრულდა, როდესაც ადგილზე სამართალდამცველები მივიდნენ. რამდენიმეწუთიანი მოლაპარაკებების შემდეგ, პოლიციამ 32 წლის მამაკაცი გაანეიტრალა და დააკავა.დანაშაული სიღნაღის რაიონის, სოფელ ქვემო ბოდბეში მოხდა. ირკვევა, რომ გიორგი კაღაშვილი პირობითი მსჯავრის ქვეშ იყო. ოჯახის ინფორმაციით, მან ყოფილ მეუღლეზე იძალადა.გიორგი კაღაშვილი, რომელიც სამართალდამცველებმა მძევლად ხელში ჩაგდების ბრალდებით დააკავეს, დანაშაულს არ აღიარებს.დაკავებულს ბრალი უკვე ოფიციალურად წარედგინა. დანაშაულის დამტკიცების შემთხვევაში, მას 14 წლამდე პატიმრობა ემუქრება.

4 ოქტომბერს ყველაზე მეტად მე გაბრაზებული ვიყავი ოპოზიციური პარტიების ლიდერების უპასუხისმგებლო დამოკიდებულებაზე, როდესაც მოუწოდებდნენ ადამიანებს, შესულიყვნენ პრეზიდენტის ადმინისტრაციის ეზოში და დაეკავებინათ ეს შენობა, – ამის შესახებ სახალხო დამცველმა, ლევან იოსელიანმა საქართველოს პირველი არხის გადაცემაში „დღის თემა“ განაცხადა.იოსელიანის თქმით, 4 ოქტომბერს რამდენიმე მნიშვნელოვანი დეტალი იყო.„ეს ყველაფერი როდესაც ვნახე, ჩემთვის უკვე ნათელი იყო, ამას რა ტიპის რეაგირება მოჰყვებოდა სამართალდამცავი უწყების მხრიდან. დავინახე ადამიანები, რომლებიც შევიდნენ პრეზიდენტის ადმინისტრაციის ეზოში. ყველაზე მეტად მე გაბრაზებული ვიყავი ოპოზიციური პარტიების ლიდერების უპასუხისმგებლო დამოკიდებულებაზე, როდესაც მოუწოდებდნენ ამ ქმედებისკენ ადამიანებს. დღეს თუ არ ვცდები, 60 ადამიანი იხდის სასჯელს, რადგან რამდენიმე ადამიანმა მოუწოდა მათ, შესულიყვნენ. ხშირ შემთხვევაში, იმ მოქალაქეებს არ ჰქონდათ გააზრებული, რა ტიპის დანაშაულს სჩადიოდნენ.იცით, რომ დაკავებულია პაატა მანჯგალაძე. ამ ყველაფერს როდესაც ვუყურებდი პირდაპირ ეთერში, დავურეკე პაატა მანჯგალაძეს, რომელიც დასახელებული იყო მაშინ როგორც ამ პროცესის ერთ-ერთი ორგანიზატორი. გამოვთქვი ჩემი აღშფოთება და ვუთხარი, რომ ასეთი რამის გაკეთება უბრალოდ არ შეიძლებოდა, ვინ აგებდა ამაზე პასუხს? რაზეც მან მითხრა, რომ ის არ იზიარებდა იქ მიმდინარე პროცესს. დამეთანხმა ჩემს შეფასებებში და თქვა, რომ ეს პროცესი ნამდვილად იყო შესაჩერებელი და ეს ადამიანები იქიდან გამოსაყვანი იყვნენ. არ ვიცი, რა მტკიცებულებები აქვს გამოძიებას პაატა მანჯგალაძის ბრალთან დაკავშირებით, მაგრამ, მე განვაცხადე და დღესაც ვამბობ, მასთან ჩემი ზარი და მისი პასუხი ჩემს აღშფოთებაზე, თუ სასამართლოზე საინტერესოა მოსამართლისთვის ამის მოსმენა და როგორც მოწმეს, გამომიძახებენ, მზად ვარ, ჩვენება მივცე. რა თქმა უნდა, თუ დაეხმარება ეს პაატა მანჯგალაძეს თავის საქმეში, რადგან მგონია, რომ ამ ადამიანის დამოკიდებულება ამ პროცესის მიმართ იყო განსხვავებული, სხვა პირებისგან განსხვავებით, რომლებიც პირდაპირ მოუწოდებდნენ, შესულიყვნენ და დაეკავებინათ ეს შენობა“, – განაცხადა ლევან იოსელიანმა.

ჩვენ მუდმივად ვცდილობთ, რომ ინფორმირებული გვყავდეს ჩვენი საზოგადოება.  არ ვმალავთ ჩვენს ქმედებებს, ჩვენს შეხედულებებს და საზოგადოების წინაშე  ყველაფერზე ღიად ვსაუბრობთ, - ამის შესახებ საქართველოს პრეზიდენტმა, მიხეილ ყაველაშვილმა გადაცემაში „იმედი Live” განაცხადა.პრეზიდენტმა აღნიშნა, რომ ვიზალიბერალიზაციის შეჩერებაზე საუბარი შანტაჟის საკითხია და ამ დამოკიდებულებამ საქართველოს მოსახლეობისთვის ფასი დაკარგა.„ფასი დაკარგა ამ დამოკიდებულებამ, მთავრობის წევრები და ვისაც დიპლომატიური პასპორტი აქვს უკვე დასანქცირებულია, ამ პასპორტებით ვერ სარგებლობენ. ყველა ის საკითხი, რომელიც ევრობიუროკრატიის მხრიდან განხორციელებული იყო საქართველოს და საქართველოს ხელისუფლების მისამართით, ყველა იყო შანტაჟის საკითხი. გაიხსენეთ კანდიდატის სტატუსი და დღემდე გაუცემელია პასუხი - რატომ არ მიენიჭა იმ ორ ქვეყანასთან ერთად საქართველოს კანდიდატის სტატუსი. არ არსებობს დღემდე ამაზე პასუხები. კეთილსინდისიერად ვასრულებდით გაწერილ საშინაო დავალებას და ლიდერი ვიყავით ამ ქვეყნებს შორის და წარმოიდგინეთ, როგორი უსამართლობაა, რის გამოც ჩვენ დაგვჩაგრეს“, - განაცხადა მიხეილ ყაველაშვილმა.

„პარი სენ-ჟერმენთან“ კარგი თამაშის შემდეგ გიორგი წიტაიშვილით ევროპის გამორჩეული კლუბები დაინტერესდნენ, – „მეცის“ ქართველ ფეხბურთელთან დაკავშირებით ფრანგული გამოცემა Foot Mercato წერს.„„მეცის“ ქართველი გარემარბი, რომელიც კიევის „დინამოდან“ ფრანგულ გუნდში იჯარის წესით თამაშობს, მომავალი წლის ივნისში თავისუფალი აგენტი გახდება. სწორედ ამ ფაქტორმა და პარიზელთა წინააღმდეგ ნაჩვენებმა მაღალი დონის თამაშმა კლუბების ყურადღება მიიქცია.13 დეკემბერს „პარი სენ-ჟერმენის“ წინააღმდეგ გამართულ შეხვედრაში წიტაიშვილი ძალიან დამაჯერებლად მოქმედებდა. ლიგა 1-თან ადაპტაციის შემდეგ ქართველი ფეხბურთელი „მეცის“ ერთ-ერთ გამორჩეულ ფიგურად იქცა და გულშემატკივართა სიმპათიაც დაიმსახურა.მიუხედავად იმისა, რომ წიტაიშვილს კონტრაქტი კვლავ აკავშირებს კიევის „დინამოსთან“, ზაფხულში მისი უფასოდ დამატების პერსპექტივა ბევრ კლუბს იზიდავს – საფრანგეთში მას „ლიონი“ და „ლილი“ აკვირდებიან, ინტერესს იჩენენ რომის „ლაციო“ და ესპანური „ვილიარეალი“, – წერს გამოცემა.ფრანგული „მეცის“ რიგებში მიმდინარე სეზონში საქართველოს ნაკრების 25 წლის ფეხბურთელმა 16 შეხვედრა ჩაატარა.

ევროპარლამენტის პრეზიდენტი რობერტა მეცოლა აშშ-ის მიერ ყოფილი ევროკომისრისთვის, ტიერი ბრეტონისთვის და კიდევ ოთხი ევროპელისთვის დაწესებულ სანქციებს გმობს. ამის შესახებ რობერტა მეცოლა სოციალურ ქსელ X-ზე წერს.მისი თქმით, ტიერი ბრეტონისა და სხვების მიმართ მოგზაურობის აკრძალვის დაწესება იმის გამო, რომ ის ევროკომისრის მოვალეობას ასრულებდა, მიუღებელია.ევროპარლამენტის პრეზიდენტი ამ შეზღუდვების გაუქმებას ითხოვს.„ევროპარლამენტის სახელით, მოვითხოვ მის სწრაფად გაუქმებას“, – წერს რობერტა მეცოლა.ცნობისთვის, სახელმწიფო დეპარტამენტმა აშშ-ში შესვლა აუკრძალა ხუთ პირს, რომლებიც ამერიკულ ონლაინ პლატფორმებზე მასალების ცენზურას ახდენდნენ.