თავისუფალ ჭიდაობაში ორგზის ოლიმპიური, ოთხგზის მსოფლიოსა და სამგზის ევროპის ჩემპიონი, ლეგენდარული ქართველი ფალავანი ლევან თედიაშვილი 75 წლის ასაკში გარდაიცვალა.
ლევან თედიაშვილი ერთადერთი მოჭიდავეა, რომელმაც ჩემპიონის ტიტული სამ სხვადასხვა წონით კატეგორიაში მოიპოვა – 82 და 90 კგ წონებში ოლიმპიადა და მსოფლიო პირველობები მოიგო, 100 კგ წონით კატეგორიაში კი – ევროპის ჩემპიონის ტიტული. იყო მსოფლიო თასის მფლობელი და მსოფლიოს ჩემპიონი სამბოში.
სპორტულ ჟურნალისტთა ასოციაციის მიერ ორგანიზებულ გამოკითხვაში ის XX საუკუნის საუკეთესო ქართველ სპორტსმენთა შორის სამეულში დასახელდა.
ლევან თედიაშვილს მიღებული აქვს ვახტანგ გორგასლის სახელობის ორდენი. 2003 წელს მიენიჭა თბილისის საპატიო მოქალაქის წოდება. 2005 წლიდან, ჭიდაობის საერთაშორისო ფედერაციის (FILA) გადაწყვეტილებით, ლევან თედიაშვილი ყველა დროის საუკეთესო მოჭიდავეთა დიდების დარბაზის წევრია.
14 წლის იყო, როდესაც საგარეჯოელი მწვრთნელის, ვალერიან მეკოკიშვილის ყურადღება მიიქცია და ლევანი კაკაბეთის ჭიდაობის სექციის წევრი გახდა. კაკაბეთში ერთ-ერთი შეჯიბრის დროს არსენ მეკოკიშვილმა ვახტანგ ბალავაძეს უთხრა – ერთი, იმ ბალღის ორთაბრძოლებს დააკვირდიო. „ჭიდაობის პროფესორმა“ მაშინვე იგრძნო, რომ ძალიან ნიჭიერ მოჭიდავესთან ჰქონდა საქმე, თბილისში წამოიყვანა და რამდენიმე წელი ლევანი ვახტანგ ბალავაძის სახლში ცხოვრობდა.