საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა, თეა ონიანმა, თავის მოადგილესთან, პაატა გაფრინდაშვილსა და აბა ალავერდელ მიტროპოლიტ დავითთან ერთად, ალავერდისა და იყალთოს სამონასტრო კომპლექსებში მიმდინარე სარეაბილიტაციო სამუშაოები დაათვალიერა.
აღნიშნულის შესახებ ინფორმაციას საქართველოს კულტურული მემკვიდრეობის დაცვის ეროვნული სააგენტო ავრცელებს.
მათივე ცნობით, ალავერდის სამონასტრო კომპლექსში 2024 წელს მომხდარი სტიქიური მოვლენის მიერ ტაძრის ექსტერიერისთვის მიყენებული ზიანი სრულად აღმოფხვრილია.
„ამ ეტაპზე კულტურული მემკვიდრეობის დაცვის ეროვნული სააგენტო ახორციელებს ამავე ტერიტორიაზე მდებარე ფეიქარ-ხანის სასახლისა და სატრაპეზოს რეაბილიტაციას. იყალთოს სამონასტრო კომპლექსში დაგეგმილია ფერისცვალების ტაძრის სრული რეაბილიტაცია, მონასტრის ტერიტორიის კეთილმოწყობა და სანიაღვრე არხების მოწყობა ტერიტორიიდან წყლის გადაყვანის მიზნით. ამ ეტაპზე მიმდინარეობს ფერისცვალების ტაძრის საძირკვლის გამაგრების სამუშაოები, ფასადებზე იგება ხარაჩოები. აგრეთვე, ტაძრის ჩრდილოეთით იჭრება მიწა წყალგადამყვანი არხების მოსაწყობად. ტაძრის საძირკვლის გამაგრების შემდგომ შესაძლებელი იქნება, ჩატარდეს სხვა სახის სარეაბილიტაციო სამუშაოები: ბზარების ინექტირება, ანტისეისმური სარტყლების მოწყობა, საბურველის გადაწყობა. დაგეგმილია იყალთოს აკადემიის შენობის საძირკვლის გამაგრება, კედლების კონსერვაცია. აკადემიის შენობის კედლების გამაგრების მოსამზადებელი სამუშაოებისას აღმოჩენილ იქნა ახალი არქეოლოგიური უბანი. სააგენტო სპეციალისტების მონაწილეობით გეგმავს ამ ტერიტორიის შესწავლას და შესაბამისი ღონისძიებების გატარებას. სააგენტოს ხელმძღვანელობამ ეპარქიის მმართველთან ერთად განიხილა ორივე ძეგლთან დაკავშირებული საჭიროებები და დასახა მათი მოგვარების გზები. საქართველოს კულტურული მემკვიდრეობის ეროვნული სააგენტო განაგრძობს კულტურული მემკვიდრეობის ძეგლების მოვლა-პატრონობას“, – ნათქვამია საქართველოს კულტურული მემკვიდრეობის დაცვის ეროვნული სააგენტოს ინფორმაციაში.