პარლამენტის ვიცე-სპიკერი კახა კუჭავა გიორგი რურუასთან დაკავშირებით წერილზე განმარტებას აკეთებს და ამბობს, რომ საუბარია არა ევროპარლამენტარებისთვის პარლამენტის მხრიდან გაგზავნილ ოფიციალურ წერილზე, არამედ ჩვეულებრივ სიახლეების ბიულეტენზე.
მისივე განმარტებით, მსგავს საინფორმაციო ბიულეტენებს პერიოდულად ყველა პარტია აგზავნის.
ამასთან, კუჭავა ამბობს, რომ ბიულეტენში გიორგი რურუასთან დაკავშირებით ზუსტი ფაქტები იყო მოყვანილი.
„დღეს, ბრწყინვალე მაგალითი ვიხილეთ, თუ რამდენად მწარე შეიძლება იყოს რეაქცია, როცა ოპონენტების ტყუილს უპირისპირებ სიმართლეს. ეს არ არის ოფიციალური გაგზავნილი წერილი პარლამენტის მხრიდან, ეს არის ჩვეულებრივი სიახლეების ბიულეტენი, რომელსაც პერიოდულად ყველა პარტია აგზავნის.
ჩვენც ერთ-ორ კვირაში ერთხელ ვაგზავნით ხოლმე. ასეთი ბიულეტენი გაიგზავნა კვირასაც, გუშინაც, როცა საკონსტიტუციო ცვლილებები მივიღეთ. გაიგზავნება, როცა მესამე მოსმენით მივიღებთ. გიორგი რურუას თაობაზე იყო მოყვანილი ის ზუსტი ფაქტები, რომელიც ყველასთვის ცნობილია და ფაქტებს ეყრდნობა.
მაგალითად, დღეს ბრიფინგის დროს, ადვოკატმა თავად აღიარა, რომ ნასყიდობის ღირებულება არის 2500 ლარი, მაგრამ განახორციელებს 250 ათასი ლარის ინვესტიციასო. მომავალში რას განახორციელებს, მისი საქმეა, მაგრამ 900 დოლარი მივუთითეთ ზუსტად საინფორმაციო ბიულეტენში“,- განაცხადა კუჭავამ და აქვე განმარტა, რომ ბიულეტენი გაგზავნეს არა მხოლოდ ევროპარლამენტარებთან, არამედ ყველა იმ პირთან, ვისაც გამოწერილი აქვს სიახლეები და უფლება აქვს, მიიღოს მათი მხრიდან დანახული ინფორმაცია.
„ნურავის გაუკვირდება, რომ თუ თავად აგზავნიან წერილებს, ასეთივე წერილები იგზავნება ჩვენგანაც. ამისთვის მუშაობს პარტიაში შესაბამისი სამსახური. ეს არის პარტიის მხრიდან გაგზავნილი, ეს არ იყო ოფიციალური წერილი, არ არის ხელმოწერილი მიმართვა კონკრეტულად ვინმეს მიმართ, ეს არის სიახლეები, რომლებიც გამოწერილი აქვთ არა მხოლოდ ევროპარლამენტარებს, არამედ სენატორებს და ა.შ. ვინაიდან, საუბარი იყო საკონსტიტუციო ცვლილებების პირველი მოსმენისას, რომ თუ გიორგი რურუა არ გათავისუფლდება, ხმას არ მისცემდნენ პროექტს „ნაციონალური მოძრაობა“ და „ევროპული საქართველო“, კითხვები რომ დაისვა, ინფორმაცია მივაწოდეთ, საუბარი ვისზე იყო. როცა მედია მფლობელად მოიხსენიებენ, სიმართლე ხომ უნდა იცოდნენ, რომ 2500 ლარად აქვს ნაყიდი და ეს თავად ხელშეკრულებაში წერია, რაც ფაქტია. შემდეგ რა ინვესტიციას განახორციელებს, შემდეგ ჩაწერონ. მწარე მოსასმენია, რომ მედია მფლობელად მოიხსენიებენ, რომელსაც აქციები 900 დოლარად აქვს ნაყიდი“,- განაცხადა კუჭავამ.