პრემიერ-მინისტრმა ერთი თვის განმავლობაში მესამე მასტერკლასი ჩაატარა,- ასე შეაფასა საპარლამენტო უმრავლესობის წევრმა ირაკლი კობახიძემ პარლამენტში საქართველოს პრემიერ-მინისტრ გიორგი გახარიას გამოსვლა.
„რა შეეხება დღევანდელ გამოსვლას, ეს იყო ერთი თვის განმავლობაში მესამე მასტერკლასი. ეს არის ძალიან მოკლე შეფასება. როგორც მოგეხსენებათ, გარდა 8 მარტის შეთანხმებისა, ასევე ხელი მოვაწერეთ ერთობლივ განცხადებას, სადაც საუბარია მარტივ რამეზე, ვციტირებ – „აუცილებელია რეაგირება ქმედებებზე, რომლებიც შესაძლოა, აღქმული იყოს როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იყოს აცილებული“. ტექსტი არის ძალიან მკაფიო, ძალიან მარტივი და ამის ინტერპრეტაციაც ბუნებრივია ძალიან მარტივია. თუმცა, ერთობლივი განცხადების ხელმოწერისთანავე, ოპოზიციის მხრიდან ამ ყველაფერს მოჰყვა სპეკულაციების მთელი კასკადი და საერთო ჯამში, ისევ ჩვენს საერთაშორისო პარტნიორებს მოუწიათ ნათელის მოფენა ამ თემაზე.
ჯერ კიდევ, შეგახსენებთ, პირველი მოსმენის წინ, 19 ივნისს, ჩვენმა საერთაშორისო პარტნიორებმა, ფასილიტატორმა ელჩებმა გაავრცელეს ერთობლივი განცხადება, სადაც ძალიან ნათლად მოუწოდეს ყველა მხარეს 8 მარტის შეთანხმების შესრულებისკენ. ეს მოხდა ზუსტად კენჭისყრის წინა დღეს და ვინ იყო ადრესატი, ეს არის ძალიან ნათელი. მაშინ დაიდგა კიდევ ერთი პოლიტიკური სპექტაკლი რადიკალური ოპოზიციის ერთი ნაწილის მხრიდან. ისინი ისევ შეეცადნენ, რომ შეცდომაში შეეყვანათ ქართული საზოგადოება და ჩვენი საერთაშორისო პარტნიორები. ამის შემდეგ, უკვე მეორე მოსმენით საკონსტიტუციო ცვლილებების კენჭისყრის ბოიკოტის შემდეგ, 23 ივნისს, ევროკავშირის ელჩმა, კარლ ჰარცელმა გააკეთა ძალიან მკაფიო განცხადება. ის იმედოვნებდა, რომ საბოლოო მოსმენისას კანონპროექტს მხარს 140 დეპუტატი დაუჭერდა. არითმეტიკა არის ძალიან მარტივი და ძალიან მარტივია იმის დადგენა, თუ ვის გულისხმობდა ამ შემთხვევაში კარლ ჰარცელი. რა თქმა უნდა, ეს იყო რადიკალური ოპოზიცია. კიდევ ერთი მოწოდება რადიკალური ოპოზიციის მიმართ იმასთან დაკავშირებით, რომ მხარი დაეჭირათ საკონსტიტუციო ცვლილებებისთვის, თუმცა თქვენ იცით, რომ მეორე მოსმენის დროს, რადიკალური ოპოზიციის ორივე წარმომადგენელმა პარტიამ, „ნაცმოძრაობის“ ორივე განშტოებამ უარი თქვა ელჩის ამ მოწოდების შესრულებაზე.
შემდეგ, კიდევ ერთი განცხადება ამერიკის ელჩისგან, ქალბატონი კელი დეგნანისგან, რომელმაც ძალიან მკაფიოდ მოგიწოდათ თქვენ კიდევ ერთხელ, მხარი დაგეჭირათ საკონსტიტუციო ცვლილებებისთვის, კერძოდ, კელი დეგნანმა ბრძანა – ჩვენთვის მნიშვნელოვანია, რომ საკონსტიტუციო ცვლილებები პარლამენტის სრული მხარდაჭრით იყოს მიღებული. ეს განცხადება გაკეთდა მესამე მოსმენის წინ, მგონი აქაც ყველაფერი ძალიან ნათელია. მაგრამ, ვერც ერთ შემთხვევაში, ჩვენმა საერთაშორისო პარტნიორებმა, ელჩებმა თქვენგან ვერ მიიღეს ადეკვატური პასუხი.