გიორგი ჩაკვეტაძემ, შესაძლოა, ზაფხულში „უოტფორდი“ დატოვოს, რადგან მას ინგლისის პრემიერლიგის სამი გუნდი – „ვულვერჰემპტონი“, „ლესტერ სიტი“ და ასევე „ევერტონი“ იწვევს, – ინფორმაციას გამოცემა FootballLeagueWorld-ი ავრცელებს.
„ლი ჰენდრი“ (ინგლისის ნაკრების ყოფილი ფეხბურთელი და Sky Sports-ის ექსპერტი) ვარაუდობს, რომ გიორგი ჩაკვეტაძე ზაფხულში „უოტფორდს“ დატოვებს „ვულვერჰემპტონისა“ და „ლესტერ სიტის“ ინტერესის გამო. დეკემბერში ექსკლუზიურად შევიტყვეთ, რომ პრემიერლიგის ორივე გუნდი ქართველ ფეხბურთელს აკვირდებოდა. იმავე სიაში „ევერტონიც“ იყო მოხსენიებული.
მიუხედავად იმისა, რომ ჩაკვეტაძე იანვრის სატრანსფერო ფანჯრის დროს „უოტფორდში“ დარჩა, ზაფხულში ამ კლუბებს შესაძლოა ფეხბურთელის მიმართ კვლავ გაუჩნდეთ ინტერესი. გუნდის მთავარი მწვრთნელი, ტომ კლევერლი კმაყოფილია 25 წლის ქართველი ნახევარმცველით, რომელმაც მიმდინარე სეზონში ჩემპიონშიფის 37 მატჩში ორი გოლი გაიტანა და ექვსი საგოლე გადაცემა შეასრულა.
ჰენდრი მიიჩნევს, რომ ჩაკვეტაძეს პროგრესის გასაგრძელებლად კლუბის შეცვლა სჭირდება და ფიქრობს, რომ „ლესტერი“ შესაძლოა საუკეთესო ნაბიჯი იყოს მისი კარიერისთვის.
„გიორგი ჩაკვეტაძეს „ლესტერი“ რამდენჯერმე დაუკავშირდა. ის „უოტფორდისთვის“ მნიშვნელოვანი მოთამაშეა და გამორჩეულად თამაშობს მრავალი მიზეზის გამო. მიმაჩნია, რომ ახალ გუნდში გადასვლა აუცილებელია, რათა უფრო მაღალ დონეზე ავიდეს.
მე ის ბევრჯერ ვნახე. ბოლო პერიოდში „უოტფორდში“ რამდენჯერმე შეიცვალა მთავარი მწვრთნელი და ვფიქრობ, ჩაკვეტაძეს სტაბილურობა სჭირდება — მასზე ბევრს ლაპარაკობენ.
მჯერა, შეუძლია თავისი სტატისტიკის (გოლებისა და საგოლე პასების) გაუმჯობესება, რადგან შესაბამისი უნარი ნამდვილად აქვს. ამიტომ, არ გამიკვირდება, თუ „ლესტერში“ გადავა. ეს იქნება წინ გადადგმული ნაბიჯი და მისი თავდაჯერებულობაც გაიზრდება, რადგან უფრო ძლიერ გუნდში, უკეთეს შემადგენლობაში ითამაშებს.
მას დიდი პოტენციალი აქვს. ასე რომ, არავის უნდა გაუკვირდეს, თუ ზაფხულში უკეთესი შეთავაზების გამო „უოტფორდს“ დატოვებს“, – განაცხადა ჰენდრიმ FootballLeagueWorld-თან ინტერვიუში.
„უოტფორდი“ ამჟამად ჩემპიონშიფში მე-10 ადგილზეა და სეზონის დასრულებამდე რვა ტურით ადრე პლეი ოფის ზონას მხოლოდ ხუთი ქულა აშორებს.
„უოტფორდმა“ სეზონი იმაზე უკეთ დაიწყო, ვიდრე ბევრს ეგონა და ამაში გარკვეული წვლილი ჩაკვეტაძესაც მიუძღვის. თუმცა, სწორედ ეს ნიშნავს, რომ ზაფხულში მისი დაკარგვა გუნდისთვის სერიოზული დარტყმა იქნება — განსაკუთრებით, თუ მხოლოდ ჩემპიონშიფის კლუბ „ლესტერში“ მოხვდება, რომელიც პრემიერლიგიდან დაქვეითების რეალური კანდიდატია.
ამავდროულად, „უოტფორდს“ მნიშვნელოვანი თანხა დასჭირდება იმისათვის, რომ ჩაკვეტაძის ტრანსფერზე დათანხმდეს. კლუბმა ბოლო წლებში ზაფხულის სატრანსფერო „ფანჯრის“ განმავლობაში არაერთი გახმაურებული გარიგება განახორციელა და მოთამაშეთა გაყიდვით მიღებულ შემოსავალს დიდ მნიშვნელობას ანიჭებს. ამიტომ, დიდი ალბათობით, ამ ზაფხულსაც დაგეგმილი იქნება ერთი მნიშვნელოვანი ტრანსფერი — ასეთად კი ჩაკვეტაძე განიხილება, რომელშიც შესაძლოა სოლიდური თანხა გადაიხადონ. ეს იქნება სამწუხარო, მაგრამ აუცილებელი გარიგება.
ამ დროისთვის „ვულვერჰემპტონი“ პრემიერლიგაში მე-17 ადგილზეა (20 გუნდიდან), ხოლო „ლესტერი“ — მე-19-ზე. შესაბამისად, არც ისე დარწმუნებით შეიძლება ითქვას, რომ ჩაკვეტაძე ამ ვარიანტს დათანხმდება, რადგან ორივე გუნდი დაქვეითების რეალური კანდიდატია.
საუკეთესო ვარიანტად ამ ეტაპზე „ევერტონი“ ჩანს — კლუბი მე-15 ადგილზეა და გავარდნის ზონას 15 ქულით უსწრებს“, – წერს გამოცემა.