ზელენსკის მიერ კონტროლირებადი გამოკითხვა საკუთარი რეიტინგის შესახებ არ არის სანდო, – ამის შესახებ აშშ-ის მთავრობის ეფექტურობის დეპარტამენტის ხელმძღვანელი, მილიარდერი ილონ მასკი სოციალურ ქსელში წერს და აზიარებს სტატიას უკრაინის პრეზიდენტის რეიტინგის შესახებ.
„ზელენსკი უკრაინელ ხალხს ნამდვილად რომ უყვარდეს, ის ჩაატარებდა არჩევნებს. მან იცის, რომ სრული კრახით დამარცხდებოდა, მიუხედავად იმისა, რომ აკონტროლებს უკრაინის ყველა მედიასაშუალებას, ამიტომ გააუქმა არჩევნები“, – წერს მასკი.
მასკის თქმით, მისი აზრით, „რეალურად, ზელენსკი სძულს უკრაინელ ხალხს, რის გამოც ზელენსკი უარს ამბობს არჩევნების ჩატარებაზე“.
„ვიწვევ ზელენსკის, ჩაატაროს არჩევნები და უარყოს ეს. ის ამას არ გააკეთებს“, – წერს მასკი.
ილონ მასკის მიერ გაზიარებულ სტატიაში აღნიშნულია, რომ გამოკითხვა, რომლის მიხედვითაც, ზელენსკის მხარდაჭერა 57 პროცენტს შეადგენს, ჩატარებულია კიევის საერთაშორისო სოციოლოგიის ინსტიტუტის მიერ, რომელიც ფინანსდება USAID-ის მიერ. სტატიის ავტორის მტკიცებით, ამ ინსტიტუტს ხელმძღვანელობს „ძალიან პატრიოტი უკრაინელი“ ანტონ ჰრუშეცკი, რაც ეჭვქვეშ აყენებს გამოკითხვის სანდოობას. სტატიის მიხედვით, აშშ-ის დაზვერვის სამსახურები ვარაუდობენ, რომ ზელენსკის რეალური მხარდაჭერა დაახლოებით ოთხი პროცენტია.
მასკმა აღნიშნა, რომ „პრეზიდენტი ტრამპი სწორად იქცევა, როდესაც იგნორირებას უკეთებს ზელენსკის და ცდილობს მშვიდობის მიღწევას იმ საზიზღარი, უზარმაზარი კორუფციული მანქანისგან დამოუკიდებლად, რომელიც იკვებება უკრაინელი ჯარისკაცების გვამებით“.