თეთრ სახლში ადასტურებენ, რომ ტრამპის ადმინისტრაციამ შემთხვევით დაამატა ჟურნალისტი ჯგუფურ ჩატში, სადაც სამხედრო გეგმებს განიხილავდნენ

საქართველოს ტექნიკურ უნივერსიტეტში სამეცნიერო-პრაქტიკული კონფერენცია - „ქრისტიანული ფსიქოლოგიის ხედვის ძირითადი ასპექტების ჩამოყალიბება” გაიმართა. ამის შესახებ ინფორმაციას სტუ ავრცელებს.მისივე ცნობით, კონფერენციას, რომელსაც ესწრებოდნენ, ცაგერისა და ლენტეხის მიტროპოლიტი, ახალგაზრდობის სულიერი და ინტელექტუალური განვითარების ცენტრის თავმჯდომარე, მაღალყოვლადუსამღვდელოესი სტეფანე, ჭიათურისა და საჩხერის მიტროპოლიტი, საქართველოს საპატრიარქოს მისიისა და ევანგელიზაციის ცენტრის თავმჯდომარე, მაღალყოვლადუსამღვდელოესი დანიელი, რუსთველი მიტროპოლიტი წმინდა მეფე დავით აღმაშენებლის სახელობის განათლების ცენტრის თავმჯდომარე, მაღალყოვლადუსამღვდელოესი იოანე, მანგლისისა და თეთრიწყაროს მიტროპოლიტი, სტუ-ის თეოლოგიის სასწავლო-სამეცნიერო ცენტრის ხელმძღვანელი, პროფესორი, მაღალყოვლადუსამღვდელოესი ანანია, მისასალმებელი სიტყვით მიმართა საქართველოს ტექნიკური უნივერსიტეტის რექტორმა.როგორც აკადემიკოსმა დავით გურგენიძემ თავის გამოსვლაში აღნიშნა, კაცობრიობის ისტორიაში რწმენისა და ცოდნის ურთიერთკავშირი ყოველთვის უმნიშვნელოვანესი იყო. საქართველოს მართლმადიდებელი ეკლესია რჩება სიბრძნისა და განათლების სიმბოლოდ, რომელიც საზოგადოებას არა მხოლოდ სულიერ საკითხებში, არამედ ინტელექტუალური და ზნეობრივი განვითარების გზაზეც მიუძღვება. საქართველოში ეს მისია განსაკუთრებული იყო, რადგან ერის იდენტობა და საგანმანათლებლო ტრადიციები მჭიდროდ არის დაკავშირებული ქრისტიანულ რწმენასთან.„სამეცნიერო-პრაქტიკული კონფერენცია - „ქრისტიანული ფსიქოლოგიის ხედვის ძირითადი ასპექტების ჩამოყალიბება“, ნათლად უსვამს ხაზს მართლმადიდებელი ეკლესიის უაღრესად მნიშვნელოვან როლს განათლების, პიროვნული განვითარების, ჩვენი ახალგაზრდობის ზნეობრივი თუ სულიერი აღზრდის სფეროებში.ეკლესიას გადამწყვეტი როლი აქვს თაობების ზნეობრივი ორიენტაციის ფორმირებაში, თანაგრძნობის, სიწრფელისა და პასუხისმგებლობის ფასეულობების დანერგვაში – რაც აუცილებელია როგორც პიროვნული, ისე პროფესიული განვითარებისათვის.ჩვენთვის, საქართველოს ტექნიკური უნივერსიტეტისთვის, დიდი მნიშვნელობის მქონეა საქართველოს მართლმადიდებელ ეკლესიასთან მჭიდრო და ხანგრძლივი კავშირები, რომელიც არა მხოლოდ სიმბოლური, არამედ პრაქტიკული თვალსაზრისითაც მნიშვნელოვანია, რადგან ჩვენ ერთობლივი ძალისხმევით ვცდილობთ შევქმნათ ისეთი საგანმანათლებლო გარემო, სადაც რწმენა და მეცნიერება ჰარმონიაშია. მტკიცედ გვჯერა, რომ ტექნიკური ცოდნა, როდესაც მას ეთიკური და სულიერი სიბრძნე ერთვის, იძლევა იმგვარი პიროვნებების ჩამოყალიბების შესაძლებლობას, რომლებიც არა მხოლოდ თავიანთ სფეროში აღწევენ წარმატებას, არამედ ზნეობრივი სიცხადითა და პასუხისმგებლობით ემსახურებიან საზოგადოებას.დღევანდელი კონფერენციის თემა განსაკუთრებით აქტუალურია თანამედროვე სამყაროში, სადაც ტექნოლოგიური პროგრესი ახალ შესაძლებლობებთან ერთად ადამიანის ფსიქიკისთვის ახალ გამოწვევებსაც ქმნის. ქრისტიანული ფსიქოლოგია, თავისი ღრმა სულიერი ხედვებით, მნიშვნელოვან პერსპექტივას გვთავაზობს მენტალურ კეთილდღეობაზე, ადამიანურ ურთიერთობებსა და პიროვნულ ზრდაზე. ვიმსჯელოთ საკითხებზე, რომლებიც თეოლოგიურ სიბრძნეს თანამედროვე ფსიქოლოგიურ კვლევებს აკავშირებს, ნიშნავს გადავდგათ მნიშვნელოვანი ნაბიჯი ისეთი საზოგადოების ჩამოყალიბებისკენ, რომელიც მეცნიერებასა და ზნეობრივ ღირებულებებს თანაბარ პატივს სცემს. მწამს, რომ კონფერენციაზე განსახილველად გამოტანილი თემები გააღრმავებს ჩვენს ცოდნას და კიდევ უფრო გააძლიერებს რწმენის როლს ახალგაზრდობის განათლებისა და კეთილდღეობის უზრუნველსაყოფად.გულითადი მადლობა კონფერენციის ორგანიზატორებს, მეცნიერებსა და სტუმრებს, რომლებიც საქართველოს ტექნიკურ უნივერსიტეტში შეიკრიბნენ თავიანთი ცოდნისა და გამოცდილების გასაზიარებლად“, - განაცხადა დავით გურგენიძემ.სტუ-ის ინფორმაციით, სამეცნიერო-პრაქტიკული კონფერენცია - „ქრისტიანული ფსიქოლოგიის ხედვის ძირითადი ასპექტების ჩამოყალიბება”, ორ სექციად წარიმართა. პირველ სექციაში დამსწრე საზოგადოების წინაშე მოხსენებებით წარსდგნენ მეუფე სტეფანე, მეუფე დანიელი, მეუფე იოანე, მეუფე ანანია. ასევე, საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი, პროფესორი მამუკა გიორგაძე და ქრისტიანული ანთროპოლოგიისა და ფსიქოლოგიის სამეცნიერო-კვლევითი ცენტრის ხელმძღვანელი, თეოლოგიის დოქტორი პროფესორი გიორგი ანდრიაძე. მეორე სექციაში კი განიხილეს მომხსენებლების - საქართველოს ტექნიკური უნივერსიტეტის პროფესორის, ლია მეტრეველის - „წმინდა მღვდელმთავარი გაბრიელ ქიქოძე - ქრისტიანული ფსიქოლოგიის ძირითადი ასპექტები“, სტუ-ის ასისტენტ-პროფესორის, ირმა ხურცია-ანდრიაძის - „ნებისყოფის ცნება, როგორც დიმიტრი უზნაძის განწყობის ზოგადფსიქოლოგიური თეორიის მთავარი ქვაკუთხედი“ და ფსიქოლოგიის განვითარების კვლევების ცენტრის ხელმძღვანელის, ბესიკ ბოგველის - „წმ. გრიგოლ პალამას სწავლება, წმ. გაბრიელ ეპისკოპოსის ქრისტიანული ფსიქოლოგია, დიმიტრი უზნაძის განწყობის ფსიქოლოგია“. კონფერენციის დასასრულს, ჭყონდიდელი მიტროპოლიტის, მეუფე სტეფანეს ორტომეულის - „ქრისტიანული ფსიქოლოგია“ წარდგენა გაიმართა.

იმ დანაშაულების უკან, რომელსაც „ნაციონალური მოძრაობის“ დროს ჩადიოდნენ, სწორედ ეს პარტია იდგა. „ნაციონალური მოძრაობის“ დანაშაულები სტრასბურგის სასამართლოშიც არის აღნიშნული, რომ სისტემური ხასიათის იყო და სახელისუფლებო შტოების მხრიდან იმართებოდა. ამ ვერტიკალის თავში იდგა სააკაშვილი მაგრამ ის არ არის ერთადერთი ვისაც ეს პასუხისმგებლობა აკისრია. ამ პასუხისმგებლობაში არის მონაწილე ყველა ის მაღალი პოლიტიკური თანამდებობის პირი, ვინც მისი თანამზრახველი იყო ამ დანაშაულებიდან გამომდინარე. დარწმუნებული ვარ, რომ ამას მოჰყვება ლოგიკური გაგრძელება, - განაცხადა „დღის ქრონიკასთან“ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა, დროებითი საგამოძიებო კომისიის მუშაობასთან დაკავშირებით.მისი თქმით, კომისიის მუშაობას ექნება ლოგიკური დასასრული თუნდაც იმ მიმართულებით, რომ „ნაციონალური მოძრაობის“ გასამართლების საკითხი საკონსტიტუციო სასამართლომ განიხილოს.„ჩვენ წინასაარჩევნოდ საზოგადოებას დავპირდით, რომ „ნაციონალური მოძრაობა“ უნდა გასამართლდეს. დროებითი საგამოძიებო კომისია დარწმუნებული ვარ შექმნის შესაბამის საფუძვლებს იმისა, რომ თუნდაც საკონსტიტუციო სასამართლომ განიხილოს ეს პროცესები. ვინაიდან, ეს პარტია, რომელიც თავისი მოღვაწეობის განმავლობაში მხოლოდ და მხოლოდ ანტი ქართული მოქმედებებით გამოდიოდა და გამოირჩეოდა მაშინაც, როცა ხელისუფლებაში იყო. მაშინაც, როდესაც ოპოზიციაში არის. „ნაციონალური მოძრაობა“ ყველა ეტაპზე ებრძოდა ქართველ ხალხს. ებრძოდა საქართველოს პროგრესს, წინსვლას და განვითარებას. ებრძოდა ქართულ ოჯახებს, ებრძოდა წარმატებულ ადამიანებს და ეს ზნე მას არ შეუცვლია. უბრალოდ, მაშინ ის აკონტროლებდა ხელისუფლების ყველა შტოს და რა თქმა უნდა გაცილებით მეტი შეეძლო ამ მხრივ დაეშავებინა და ფაქტი არის, რომ 300 ათასი ადამიანი გაასამართლა „ნაციონალურმა მოძრაობამ“ ჩვენს ქვეყანაში. რაც ოპოზიციაში არის, იქიდანაც მუდმივად თავს ესხმის საქართველოს. არა კონკრეტულად „ქართულ ოცნებას“, არამედ იმ პროცესებს, რაც ჩვენთვის მნიშვნელოვანია. ეროვნული უსაფრთხოების იქნება, ეკონომიკური-სოციალური უსაფრთხოების იქნება თუ საგარეო პოლიტიკის მიმართულებით. ყოველთვის საქართველოს საწინააღმდეგო პოზიციას ირჩევენ. ეს შემთხვევითი არ არის. ეს არის ამ პარტიის და მისი ანასხლეტების ან მისი „პარწიუკების“, რომლებიც ფილიალები არიან სინამდვილეში „ნაციონალური მოძრაობის“ მათი ზნე და ბუნება. შესაბამისად, ამას აუცილებელი არის, რომ მოჰყვეს სამართლიანი რეაგირება“, - განაცხადა რატი იონათამიშვილმა.

ვინც კითხვებზე საპასუხოდ მზად არის, რასაკვირველია მივა ამ კომისიაზე, მაგრამ ჩვენ ვხედავთ, რომ ეს ადამიანები იმალებიან, ემალებიან საჯაროობას, ემალებიან იმ კითხვებს, რაც გააჩნია ჩვენს საზოგადოებას, - განაცხადა „დღის ქრონიკასთან“ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა იმ პირებზე საუბრისას, რომლებიც დაბარების მიუხედავად, პარლამენტის საგამოძიებო კომისიის სხდომებს არ ესწრებიან.დეპუტატის თქმით, ამ საქციელით ეს ადამიანები ადასტურებენ, რომ დანაშაულებში მონაწილეები არიან.„წინასაარჩევნო პერიოდში ეს ადამიანები საკუთარ ამომრჩევლებს ემალებოდნენ, ახლა როდესაც მიმდინარეობს დროებითი საგამოძიებო კომისიის სხდომები, ემალებიან ამ კომისიას. მაგრამ ვინც და როგორც არ უნდა დაიმალოს, პასუხისმგებლობას ვერავინ ვერ გაექცევა. ყველას შევახსენებ, რომ ამ კომისიისგან თავის არიდება, კითხვებზე თავის არ იდება და გამოუცხადებლობა ისჯება სისხლის სამართლის პასუხისმგებლობით და ეს მიდგომა არის ევროპული სტანდარტი. ასე რომ, ეს ადამიანები ვინც არ ცხადდებიან ამ კომისიაზე, სინამდვილეში აღიარებენ, რომ ისინი არიან თანამზრახველები დანაშაულების და სწორედ ამიტომ იქცევიან ასე. სხვა მხრივ, პირიქით, მათი ინტერესი უნდა იყოს რომ წარდგნენ ამ კომისიაზე და საკუთარი პოზიციები გააჟღერონ და ლოგიკურიც ასე იქნებოდა, მაგრამ სწორედ ის რომ, ამ ადამიანებს ეშინიათ, იმალებიან და არ ცხადდებიან კომისიაზე, გვაჩვენებს იმას, რომ ამით ფაქტობრივად ისინი აღიარებით ჩვენებებს იძლევიან. თუ ჰგონია ვინმეს, რომ პასუხისმგებლობას გაექცევა - არა; ადრე თუ გვიან მათ მოუწევთ, რომ ყველა იმ ლეგიტიმურ კითხვას გასცენ პასუხი, რომელიც ჩვენს საზოგადოებას ასევე ლეგიტიმურად აქვს“, - აღნიშნა იონათამიშვილმა.საგამოძიებო კომისიის სხდომებს „ლელოს“ ლიდერმა, მამუკა ხაზარაძემ საცირკო სანახაობა უწოდა და აღნიშნა, რომ მათ ამ სხდომებზე არ მისვლას აქვს არგუმენტი - ეს არის მათი პოლიტიკური ხედვა, რომ პარლამენტს არ აღიარებენ.დაბარების მიუხედავად, საგამოძიებო კომისიის სხდომაზე გუშინ არ გამოცხადდა ირაკლი ოქრუაშვილი. მამუკა ხაზარაძის მიმართ დაწყებულია გამოძიება, ბადრი ჯაფარიძეზე კი კომისიამ შემდგომი რეაგირებისთვის პროკურატურას მიმართა.მამუკა ხაზარაძის წინააღმდეგ საქმე სისხლის სამართლის 349-ე მუხლით უკვე აღიძრა, რაც „დროებითი საგამოძიებო კომისიის მოთხოვნის შეუსრულებლობის" გამო ჯარიმას ან ერთ წლამდე პატიმრობას ითვალისწინებს. იგივე მუხლით ელის პასუხისგება ხაზარაძის პარტნიორ ბადრი ჯაფარიძესაც. „ლელოს“ ლიდერები სხდომაზე მას შემდეგ დაიბარეს, როცა ნავთობკომპანია „მაგნატის“ საქმე განიხილეს. ბიზნესმენმა ჯემალ ლეონიძემ გაიხსენა, თუ რა როლი ჰქონდათ მისთვის ბიზნესის წართმევასა და კეზერაშვილისთვის გადაცემაში, სწორედ ხაზარაძე-ჯაფარიძეს.

დიდი ბრიტანეთის პრემიერ-მინისტრი კირ სტარმერი რუსეთის წინააღმდეგ სანქციების გამკაცრების მოწოდებით გამოდის.ამის შესახებ კირ სტარმერმა პარიზში ე.წ. მსურველთა კოალიციის წევრების შეხვედრაზე განაცხადა, რომლის ფარგლებშიც ის უკრაინის პრეზიდენტს, ვოლოდიმირ ზელენსკის შეხვდა.„ახლა არ არის სანქციების მოხსნის დრო. პირიქით, ჩვენ განვიხილეთ, როგორ შეგვიძლია, გავაძლიეროთ სანქციები, რათა მხარი დავუჭიროთ აშშ-ს ინიციატივას რუსეთის მოლაპარაკების მაგიდასთან მოსაყვანად ამ ქვეყნების ჯგუფის მხრიდან შემდგომი ზეწოლის გზით“, – განაცხადა კირ სტარმერმა.

აშშ-ის ხელისუფლება განაახლებს „რადიო თავისუფლების“ დაფინანსებას.აშშ-ის გლობალური მედიის სააგენტომ (USAGM) უკან გაიწვია 15 მარტის გადაწყვეტილება „რადიო თავისუფალი ევროპა/რადიო თავისუფლებისთვის“ გრანტის გაუქმების შესახებ.ამის შესახებ ნათქვამია წერილში, რომელსაც ხელს აწერს სააგენტოს ხელმძღვანელის უფროსი მრჩეველი, კერი ლეიკი. ამრიგად, საგრანტო შეთანხმება კვლავ ძალაში შედის.ამასთან, დოკუმენტში აღნიშნულია, რომ აშშ-ის გლობალური მედიის სააგენტო იტოვებს უფლებას, გააუქმოს გრანტი მომავალში.ცნობისთვის, აღნიშნული გრანტის გაუქმების შემდეგ, მედიაჰოლდინგმა სააგენტოს წინააღმდეგ სასამართლოში შეიტანა სარჩელი და მიაღწია დაფინანსების დროებით აღდგენას.2025 წლის ოქტომბრამდე „რადიო თავისუფლებამ“ ფედერალური მთავრობისგან უნდა მიიღოს კიდევ 77 მილიონი დოლარი.