როგორც ვიხილეთ, 75-ზე მეტმა ქვეყანამ მოგვმართა, გვჯერა, რომ შეგვიძლია ძალიან მალე გამოვაცხადოთ რამდენიმე შეთანხმება, – ამის შესახებ თეთრი სახლის პრესსპიკერმა, კეროლაინ ლევიტმა განაცხადა.
ლევიტმა უპასუხა კითხვას, რომელი შეთანხმებები არის მზად ან ახლოს დასრულებასთან, რომელი ქვეყნები აღწევენ ტარიფებზე შეთანხმებას.
„არ მსურს, წინ გავუსწრო მოვლენებს, ყველა იმ შესანიშნავ ადამიანს, ვინც დაუღალავად მუშაობს ამ კარგი სავაჭრო გარიგებების მისაღწევად. პრეზიდენტიც ღრმად არის ჩართული ამ პროცესში. მან თავის სავაჭრო გუნდს ნათლად განუცხადა, რომ სურს პირადად დაამტკიცოს ყველა ეს შეთანხმება. როგორც უკვე მოისმინეთ ადმინისტრაციის არაერთი წარმომადგენლისგან, ბევრ ქვეყანასთან მიმდინარეობს მოლაპარაკებები. ჩვენ გვაქვს 15-ზე მეტი გარიგება, დოკუმენტი, წინადადება, რომლებიც აქტიურად განიხილება. როგორც ვიხილეთ, 75-ზე მეტმა ქვეყანამ მოგვმართა. ასე რომ, ბევრი სამუშაოა გასაკეთებელი. ჩვენ ეს კარგად გვესმის. გვჯერა, რომ შეგვიძლია ძალიან მალე გამოვაცხადოთ რამდენიმე შეთანხმება“, – აღნიშნა ლევიტმა.
ამასთან, ლევიტმა ჩინეთთან სავაჭრო შეთანხმების შესახებაც ისაუბრა და აღნიშნა, რომ ბურთი ჩინეთის მხარესაა და მან უნდა დადოს აშშ-თან შეთანხმება.
„პრეზიდენტმა ნათლად გამოხატა თავისი პოზიცია ჩინეთთან დაკავშირებით, თუმცა მაქვს დამატებითი განცხადება, რომელიც მან ახლახან გამიზიარა. ბურთი ჩინეთის მხარესაა. ჩინეთმა უნდა დადოს ჩვენთან შეთანხმება. ჩვენ არ გვჭირდება მათთან შეთანხმების დადება. არანაირი განსხვავება არ არის ჩინეთსა და სხვა ქვეყნებს შორის, გარდა იმისა, რომ ისინი გაცილებით დიდები არიან. ჩინეთს სურს ის, რაც ჩვენ გვაქვს, რაც ყველა ქვეყანას სურს – ამერიკელი მომხმარებელი. სხვაგვარად რომ ვთქვათ, მათ ჩვენი ფული სჭირდებათ. პრეზიდენტმა კიდევ ერთხელ ნათლად განაცხადა, რომ იგი ღიაა ჩინეთთან შეთანხმებისთვის, მაგრამ ჩინეთმა უნდა დადოს შეთანხმება ამერიკის შეერთებულ შტატებთან“, - აღნიშნა ლევიტმა.