ჩვენ უკვე გვაქვს შექმნილი სამართლებრივი და კონვენციური საფუძველი, რომ ბატონ გახარიას კითხვები დავუსვათ, – განაცხადა პარლამენტის საგამოძიებო კომისიის თავმჯდომარემ, თეა წულუკიანმა საქართველოს პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას.
„გიორგი გახარია გახლდათ შს მინისტრი, ამ დროს არის მომხდარი 20 ივნისის აქციის დაშლა და ამ საქმეზე, რომელსაც ჰქვია „ცაავა და სხვები საქართველოს წინააღმდეგ“, სტრასბურგის სასამართლომ შარშან გამოიტანა გადაწყვეტილება, სადაც ბატონი გახარიას მიერ ნაწარმოები დაშლის ოპერაცია სტრასბურგის სასამართლომ, ერთი მხრივ, უარყოფითად შეაფასა და თქვა, რომ ამ დაშლის ოპერაციის სათანადო გამოძიება არ მომხდარა. დაადგინა იმ მუხლის დარღვევა, რომელიც არის მესამე მუხლი და გულისხმობს წამების, არაადამიანური და დამამცირებელი მოპყრობის აკრძალვას. შესაბამისად, საქართველოს სახელმწიფო სტრასბურგის სასამართლოში გახარიას მიერ ჩატარებული ამ ოპერაციის შედეგად დადანაშაულდა. ამას აქვს თავისი სამართლებრივი შედეგები. კერძოდ, ამ გადაწყვეტილების საფუძველზე, განხილვა უკვე მეორე ინსტანციით მიმდინარეობს და დიდი პალატა იხილავს, მაგრამ იქ ათი წელი ვმუშაობდი და ალბათ მაქვს უფლება, ვარაუდი გამოვთქვა, რომელიც ალბათ რაღაც ცოდნაზე იქნება დაფუძნებული, რომ მე გამორიცხული მგონია, პალატის გადაწყვეტილება დიდმა პალატამ შეამსუბუქოს. ერთადერთი, თუ დაამძიმებს, თორემ იქ შემსუბუქების შანსს მე ვერ ვხედავ. ეს ჩემი ვარაუდია, თუმცა მე 2010 წელს გადავდექი იქიდან და იმ ცოდნის საფუძველზე ვსაუბრობ, რაც მაქვს. შესაბამისად, ჩვენ უკვე გვაქვს შექმნილი სამართლებრივი და კონვენციური საფუძველი, რომ ბატონ გახარიას კითხვები დავუსვათ. კერძოდ, ამ გადაწყვეტილების სამართლებრივი შედეგი სტრასბურგში არის ის, რომ ჩვენს საგამოძიებო ორგანოებს მოუწევთ, გახსნან 20 ივნისის საქმის გამოძიება თავიდან და გამოიძიონ ნულიდან. ეს ვალდებულება უკვე ამ გადაწყვეტილებამ ჩვენს სამართალდამცველ ორგანოებს გაუჩინა და ჩვენ გვაქვს კითხვები მასთან ამ თემაზე“, – განაცხადა წულუკიანმა.
ამ განცხადებით თეა წულუკიანმა გადაცემის წამყვანის შეკითხვას უპასუხა, რა შეკითხვები არსებობს გიორგი გახარიასთან მიმართებაში, რადგან ის კომისაში 20 ივნისის საქმეზეა დაბარებული.
როგორც წულუკიანმა აღნიშნა, გიორგი გახარიას მიმართ ალბათ სხვა შეკითხვები და თემებიც იქნება, რადგან ის მაღალ თანამდებობებს იკავებდა, იყო შს მინისტრი, პრემიერ-მინისტრი და არის დაგროვილი გარკვეული პოლიტიკური თუ სამართლებრივი შეკითხვები.
მაკა ცინცაძის შეკითხვაზე, კიდევ რა საკითხებს შეისწავლის კომისია გაფართოებული მანდატის ფარგლებში და ხომ არ ეხება ეს ოპოზიციის მიერ ორგანიზებულ აქციებს, რაზეც გამოძიება უკვე მიმდინარეობს სახელმწიფო გადატრიალების მცდელობასა და საბოტაჟზე, თეა წულუკიანმა განაცხადა, რომ როდესაც სახელმწიფოს ზიანს აყენებენ ის პოლიტიკოსები, ვინც დღეს დესტრუქციულ ოპოზიციაშია გაწევრიანებული, რა თქმა უნდა, ამასთან დაკავშირებით კომისიას ექნება შეკითხვები, რამდენად აზიანებენ ისინი ქვეყნის ევროპულ მომავალს.
„რატომ ხდება, რომ ჩვენი სახელმწიფო უწყებები და საჯარო მოხელეები მუშაობენ იმ კონსტიტუციური ჩანაწერის იმპლემენტაციისთვის, რასაც ჰქვია ევროპული ინტეგრაცია, ეს ჩანაწერი კონსტიტუციაში „ქართულმა ოცნებამ“ შეიტანა და არა „ნაციონალურმა მოძრაობამ“, რომ ჩვენი მთავარი გეზი არის ევროპისკენ და სახელმწიფოს, ჩვენს საჯარო მოხელეებს და სახელმწიფო უწყებებს ეს ოპოზიციური პარტიები, დესტრუქციული ძალები, საერთაშორისო ასპარეზზე ბორბლებში ჯოხებს ურჭობენ, ხელს უშლიან, აზიანებენ და უმძიმეს ზიანს აყენებენ? ეს მხოლოდ ერთი მაგალითია ზიანის, რომელსაც თქვენ საბოტაჟი უწოდეთ. რა თქმა უნდა, კითხვები ამ თემებზეც იქნება არაერთ მათგანთან. მაგალითად, ასეთი კითხვები მოაზრებული იყო, რომ დაგვესვა ბატონი გირჩისთვის, რომელიც დაემალა კომისიას. ისიც ქალების კალთას გამოეკერა, როდესაც მიაკითხა ფოსტის წარმომადგენელმა, ეს ლიბერალი კაცი. მე ასე მესმის, რომ მათ მიერ ქადაგებული ლიბერალიზმი თავისუფლებას, გაბედულებას, ყველაფრის მკადრებლობას გულისხმობს და როდესაც მარტივი წერილი უნდა ჩაიბარო ფოსტის წარმომადგენლისგან, იქ უკვე ქალის კალთას ეფარებიან. ჩვენ კითხვის დასმა ვერ შევძელით, მან უარი თქვა მობრძანებაზე და, სავარაუდოდ, ჩაიდინა სისხლის სამართლის დანაშაული, მაგრამ ამას პროკურატურა შეაფასებს, ვინაიდან ჩვენ ორი დღის წინ მისი საქმე პროკურატურაში უკვე გადავაგზავნეთ“, – განაცხადა წულუკიანმა.