თეა წულუკიანი – სხდომაზე დღეს ჩვენ ვიხილეთ ორი საამაყო ახალგაზრდა, აფრასიძეები, რომლებიც სააკაშვილისთვის არიან განაჩენიც და სასჯელიც, სააკაშვილმა ისინი 7 და 12 წლის ასაკში სასიკვდილოდ გაიმეტა

დროებითი საგამოძიებო კომისიის სხდომაზე, დღეს ჩვენ ვიხილეთ ორი საამაყო ახალგაზრდა, რომლებიც რეალურად სააკაშვილისთვის არიან განაჩენიც და სასჯელიც. სააკაშვილმა ეს ბავშვები 7 და 12 წლის ასაკში სასიკვდილოდ, ჩასახოცად გაიმეტა, – ამის შესახებ პარლამენტის საგამოძიებო კომიტეტის თავმჯდომარე, ვიცე-სპიკერმა, თეა წულუკიანმა გადაცემაში „აქტუალური თემა მაკა ცინცაძესთან ერთად“ სტუმრობისას 21 წლის წინ, სოფელ ეცერში ჩატარებული ოპერაციის დროს დაკავებული შმაგი აფრასიძის შვილებთან, გიორგი და ლედი აფრასიძეებთან დაკავშირებით განაცხადა, რომლებიც დღეს აფრასიძეების საქმესთან დაკავშირებით საგამოძიებო კომისიის სხდომაზე იმყოფებოდნენ.

წულუკიანის თქმით, ეს ახალგაზრდები ცოცხლები არიან და უფრო წარმატებული იქნებიან, ვიდრე სააკაშვილს როდესმე დაესიზმრებოდა და „სწორედ ასეთი, იმ რეჟიმს გადარჩენილი მსხვერპლი არიან სააკაშვილისთვის უპირველესი სასჯელი.“

„მე იმ კუთხის შვილი ვარ, სადაც აფრასიძეების ტრაგედია დატრიალდა და უფრო მეტიც, მეზობელი სოფლიდან ვარ წარმოშობით. ამიტომ, ჩემთვის ძალიან კარგად არის ცნობილი და არა მხოლოდ ჩემთვის, ნებისმიერი სვანი რომ გააჩეროთ ქუჩაში, იმ კუთხის შვილი, სადაც არ უნდა იყოს თბილისში, ქუთაისში, თუ საზღვარგარეთ, თუ სვანეთში საკუთრივ, ყველა გეტყვით, რომ რეალურად არსებობდა კითხვის ნიშნები ამ ოჯახის ერთ კონკრეტულ წევრთან და ეს იყო ადგილზე მოკლული ომეხი აფრასიძე. კითხვები და კითხვის ნიშნები იყო საკმაოდ სერიოზული. ეს მე შემიძლია, ხმამაღლა ვთქვა, კონკრეტული გვარებით და სახელებით, მაგრამ ამაზე არ ვსაუბრობთ. დღეს ჩვენ ვსაუბრობთ იმაზე, რომ ოთხი მცირეწლოვანი ბავშვის პირობებში, იქ, სადაც იყო ბებია, რომელსაც ვერავინ ვერაფერს ვერ დააბრალებს და დააბრალებდა, იქ იყო ამ ბავშვების დედა, რომელსაც ვერავინ ვერაფერს ვერ დააბრალებდა და დააბრალებს, მით უმეტეს ამ ბავშვებს, ასევე, ომეხი აფრასიძის ორი ძმა, რომელთა მიმართებაშიც არც მაშინ ყოფილა რაიმე ხელშესახები მტკიცებულება, არც მერე და თავად ევგენი აფრასიძე, რომელიც იმ მომენტისთვის ძებნილიც კი არ იყო. აი, ეს, ამდენი ადამიანი რეალურად სახელმწიფომ, შს მინისტრის, გიორგი ბარამიძის მეთაურობით, მის მიერ დაგეგმილი სპეცოპერაციის შედეგად, რომელიც იყო პირდაპირ დაკვეთილი მიხეილ სააკაშვილის მიერ და ეს მან თავად თქვა, როდესაც იყო პრეზიდენტი, რომ მის დაკვეთას ასრულებდა გიორგი ბარამიძე და სპეცდანიშნულების რაზმი, ეს ამდენი ადამიანი 2004 წლის 24 მარტს, დილაუთენია ჩასახოცად გაიმეტეს. ეს დღეს თვითონ თქვეს ახალგაზრდებმა – ბატონმა გიორგიმაც და ქალბატონმა ლედიმაც, რომლებიც ჩვენი მომავალი თაობაა, რომ თუკი მათი ბიძის, ომეხი აფრასიძის მიმართ არსებობდა რაიმე კითხვებიო და მე ვიტყოდი, რომ კითხვები არსებობდა, მაშინ ამისთვის არსებობს კანონი, ამისთვის არსებობს პროცედურა. მე შემიძლია, დავადასტურო და ჩემნაირ ბევრ ადამიანს, ვინც იმ კუთხესთან ცოტა შეხებაში არის, შეუძლია, დაადასტუროს, რომ ეს ადამიანი თავისუფლად დადიოდა მესტიის მუნიციპალიტეტის ნებისმიერ ქუჩაში, ნებისმიერ ორღობეში და ჩამოდიოდა სვანეთიდან ბარშიც. ამიტომ, მისი დაკავება, აყვანას რომ ვეძახით, არავითარ სირთულეს არ წარმოადგენდა გიორგი ბარამიძისა და მისი ხელქვეითებისათვის, მაგრამ აირჩიეს ის ფორმა, რომ ეს ოჯახი ადგილზე, სამაგალითოდ, ბავშვებიანად უნდა ჩაეხოცათ. საყოველთაოდ ცნობილი და დადგენილი ფაქტია და დღეს ახალგაზრდებმა, რომლებიც იმ დროს 7 და 12 წლის იყვნენ, დაადასტურეს, რომ როდესაც ბავშვები და ქალები კიოდნენ, რადგან ცეცხლის წვიმა მოდიოდა მათ თავზე, საწოლის ქვეშ იმყოფებოდნენ, რაც მეტად კიოდნენ, მით მეტი იყო ცეცხლი და ერთ-ერთ მომენტში, ეს ფაქტებით და მტკიცებულებებით არის გამყარებული, რომ ბებიამ რძალს უთხრა და ბავშვებს უთხრა, როგორც გამოცდილმა, ცხოვრებაში ბევრი რამ ჰქონდა ნანახი, რომ ნუ კივითო და დღეს თქვეს, რომ მამამაც იგივე თქვაო – ნუ კივით, რადგან რომ კივით, მით უფრო მეტ ცეცხლს გვიშენენო. ძლივს გააჩუმეს ბავშვები და ქალები, რომ არ ეკივლათ. მაშინვე ცეცხლი შეწყდა. ეს რას ნიშნავს, ეს იმას ნიშნავს, რომ იქ მოწმე არ უნდა დარჩენილიყო იმისა, რაც მათ ჩაიდინეს. მაგრამ, მოხდა ისე, რომ ეს ბავშვები გადარჩნენ, ეს ბავშვები გაიზარდნენ, ამ ბავშვებმა უამრავი სიდუხჭირის და სირთულის მიუხედავად, როცა ოჯახის ყველა მამაკაცი იყო ციხეში და წამების ქვეშ ჰყავდათ, განათლებაც მიიღეს და დღეს ჩვენ ვიხილეთ ორი საამაყო ახალგაზრდა სხდომაზე წარმოდგენილი, რომლებიც რეალურად სააკაშვილისთვის არიან განაჩენიც და სასჯელიც. სააკაშვილმა ეს ბავშვები 7 და 12 წლის ასაკში სასიკვდილოდ, ჩასახოცად გაიმეტა. ეს ახალგაზრდები ცოცხლები არიან და უფრო დიდხანს იქნებიან რა საკვირველია და უფრო წარმატებული იქნებიან, ვიდრე სააკაშვილს როდესმე დაესიზმრებოდა. ეს არის ჩემი რეპლიკა და რასაც ვფიქრობ კიდეც, რომ სწორედ ასეთი, იმ რეჟიმის გადარჩენილი მსხვერპლი არიან სააკაშვილისთვის უპირველესი სასჯელი“, – განაცხადა წულუკიანმა.

„ეს, რა თქმა უნდა, საკმარისი არ არის და ჩვენი მიზანია, სააკაშვილი და მისი ეს ბანდა და ასევე, ისეთი რეკეტირები, როგორებიც იყვნენ მაგალითად ხაზარაძე, ბადრი ჯაფარიძე, რომლებიც მარჯვენა ხელი იყვნენ რეალურად, რბილ ძალას რომ ვუწოდებთ დღეს და ბევრი ადამიანის უბედურებაში აქვთ მათაც მონაწილეობა მიღებული, ასეთი ადამიანების ადგილი აღარ იყოს პოლიტიკაში. მიზანია, რომ როდესაც „ქართული ოცნება“ წავა არჩევნების გზით ხელისუფლებიდან, „ქართული ოცნების“ ადგილი დაიკავოს უკეთესმა ძალამ, უფრო ახალგაზრდა ძალამ, სუფთა ძალამ, უფრო ძლიერმა და უფრო მომზადებულმა თანამედროვე ცხოვრებისთვის, რადგან დრო გადის და დრო თავისას მოითხოვს“, – განაცხადა წულუკიანმა.