დღეს სტარტი აიღო პარაძიუდოში თბილისის მსოფლიო თასის გათამაშებამ. ტურნირში 25 ქვეყნის 250-მდე წარმომადგენელი ასპარეზობს. საქართველოს პარაძიუდოს ნაკრები პირველ საშეჯიბრო დღეს ექვსი პარასპორტსმენით იყო წარმოდგენილი.
J2 კატეგორიის 70 კგ წონით კატეგორიაში ქართული ფინალი გაიმართა. გიორგი ქალდანმა ზურაბ ზურაბიანი დაამარცხა და საქართველოს ნაკრებს ტურნირზე პირველი ოქროს მედალი მოუტანა. საბა ბაღდავაძე (J1, 81 კგ) ტურნირის ფინალში იჭიდავებს, ბაჩუკი შელია (J2, 81 კგ) კი ბრინჯაოს მედლისთვის იბრძოლებს.
პარიზის პარალიმპიური თამაშების შემდეგ თბილისის მსოფლიო თასი პარალიმპიადის პირველი საკვალიფიკაციო ტურნირია, რომელიც საქართველოს პარალიმპიური კომიტეტის ორგანიზებით, საქართველოს სპორტის სამინისტროსა და თბილისის მერიის მხარდაჭერით ტარდება.