სააკაშვილის ქვეყანაში შემოსვლის პირველი დღიდან სახელმწიფო მოქმედებს ადამიანის უფლებების დაცვის უმაღლესი სტანდარტით. ჩვენ შეგვიძლია, შევაფასოთ, რომ ყოფილი პრეზიდენტი ხელოვნურად იუარესებს ჯანმრთელობას, რათა გათავისუფლდეს, – ამის შესახებ „ქართული ოცნების“ წევრმა, გიორგი ჩაკვეტაძემ ბრიუსელში, ევროკავშირი-საქართველოს საპარლამენტო ასოცირების კომიტეტის სხდომაზე განაცხადა.
მისივე თქმით, ერთმა საქმემ არ უნდა გადაწყვიტოს ქვეყნის მომავალი ევროატლანტიკურ სისტემაში ინტეგრაციის გზაზე.
„საუბარი იყო ადამიანის უფლებებზე და ყოფილი პრეზიდენტის, სააკაშვილის საქმეზე. მსურს, ხაზი გავუსვა, რომ 2023 წლის მარტში პარლამენტმა განიხილა საქართველოს 2022-2030 წლების ადამიანის უფლებების ეროვნული სტრატეგია. ეს სტრატეგია ადამიანის უფლებების და თავისუფლებების დაცვის სისტემურ გარანტიას იძლევა. მიმდინარე წელს ევროპის ადამიანის უფლებების ევროპულმა სასამართლომ უარყო მიხეილ სააკაშვილის ვარშავაში გადაყვანის მოთხოვნა, ასევე, სასამართლოს არ დაუვალებია ქვეყნისთვის, მიხეილ სააკაშვილი სხვა სამედიცინო დაწესებულებაში გადაეყვანა. მისი ქვეყანაში შემოსვლის პირველი დღიდან სახელმწიფო მოქმედებს ადამიანის უფლებების დაცვის უმაღლესი სტანდარტით. ჩვენ შეგვიძლია, შევაფასოთ, რომ ყოფილი პრეზიდენტი სააკაშვილი ხელოვნურად იუარესებს ჯანმრთელობას, რათა გათავისუფლდეს. პირადად მე და ბევრი ჩვენი მოქალაქე ფიქრობს, რომ ერთმა საქმემ, თუნდაც ეს ეხებოდეს ყოფილ პრეზიდენტს, არ უნდა გადაწყვიტოს ჩვენი მომავალი ევროატლანტიკურ სისტემაში ინტეგრაციის გზაზე“, – განაცხადა გიორგი ჩაკვეტაძემ.