ევროკომისიამ ზეწოლა მოახდინა პლატფორმებზე, რათა მათ კონტენტი დაეცენზურებინათ სლოვაკეთში, ნიდერლანდებში, საფრანგეთში, მოლდოვაში, რუმინეთსა და ირლანდიაში დაგეგმილი არჩევნების წინ, – ამის შესახებ საუბარია აშშ-ის წარმომადგენელთა პალატის იურიდიულმა კომიტეტის ანგარიშში სათაურით „უცხოური ცენზურის საფრთხე, ნაწილი II, ევროპის ათწლეულის განმავლობაში მიმდინარე კამპანია გლობალური ინტერნეტის ცენზურის მიმართულებით და როგორ აზიანებს ის ამერიკელების გამოხატვის თავისუფლებას შეერთებულ შტატებში“.
ანგარიშის თანახმად, არასაჯარო დოკუმენტები აჩვენებს, თუ როგორ ახდენდა ევროკომისია რეგულარულად ზეწოლას პლატფორმებზე ევროკავშირის წევრი ქვეყნების არჩევნების წინ, კონსერვატიული ან პოპულისტური პოლიტიკური პარტიებისთვის არახელსაყრელი გარემოს შესაქმნელად.
როგორც ანგარიშშია ნათქვამი, ამის ერთ-ერთი მთავარი მაგალითია 2023 წლის სლოვაკეთის არჩევნები, სადაც „ტიკ-ტოკმა“ ევროპის მხრიდან ზეწოლის გამო დააცენზურა შემდეგი „სიძულვილის ენა“: „არსებობს მხოლოდ ორი სქესი“; „ბავშვები არ შეიძლება, იყვნენ ტრანსგენდერები“; „მე ვფიქრობ, რომ ლგბტ იდეოლოგია, გენდერული იდეოლოგია, ტრანსგენდერული იდეოლოგია დიდ საფრთხეს წარმოადგენს სლოვაკეთისთვის, ისევე როგორც კორუფცია“ და ა.შ.
როგორც ანგარიშშია აღნიშნული, ეს განცხადებები არ არის „სიძულვილის ენა“, ისინი წარმოადგენენ პოლიტიკურ მოსაზრებებს მიმდინარე საკამათო სამეცნიერო და სამედიცინო საკითხთან დაკავშირებით. დოკუმენტის თანახმად, „ტიკ-ტოკმა“ თავად აღნიშნა, რომ ამ პოლიტიკური მოსაზრებებიდან ზოგიერთი „ხშირი იყო სლოვაკეთის პოლიტიკურ დისკუსიებში“, თუმცა, „ევროკომისიის ზეწოლის ქვეშ, „ტიკ-ტოკმა“ ეს განცხადებები სლოვაკეთის ეროვნული საპარლამენტო არჩევნების წინ დააცენზურა“.
ამასთან, დოკუმენტში ნათქვამია, რომ ევროკომისიამ ყველაზე აგრესიული ცენზურის ზომები 2024 წლის რუმინეთის საპრეზიდენტო არჩევნების დროს მიიღო. 2024 წლის დეკემბერში რუმინეთის საკონსტიტუციო სასამართლომ გააუქმა საპრეზიდენტო არჩევნების პირველი ტურის შედეგები, რომელშიც კალინ ჯორჯესკუმ გაიმარჯვა, მას შემდეგ, რაც რუმინეთის სადაზვერვო სამსახურებმა განაცხადეს, რომ რუსეთი ფარულად უჭერდა მხარს ჯორჯესკუს კოორდინირებული „ტიკ-ტოკ“ კამპანიის მეშვეობით.
„კომიტეტისთვის წარდგენილი შიდა დოკუმენტები, როგორც ჩანს, ამ ნარატივს ძირს უთხრის. „ტიკ-ტოკმა“ ევროკომისიას განუცხადა, რომ ვერ აღმოაჩინეს რუსეთის მხრიდან კოორდინირებული კამპანიის მტკიცებულება და ამის შესახებ ინფორმირებული იყვნენ შესაბამისი უწყებები. თუმცა არჩევნების შედეგები არასოდეს აღდგენილა და 2025 წლის მაისში, განმეორებით არჩევნებში, მმართველი პარტიის მიერ მხარდაჭერილმა კანდიდატმა გაიმარჯვა”, – აღნიშნულია დოკუმენტში.