არ შეიძლება ადამიანთა გაერთიანებას პოლიტიკური პარტია ეწოდოს და ჰქონდეს საშუალება იმუშაოს საქართველოში, იყოს რეგისტრირებული, როგორც პოლიტიკური პარტია, როდესაც ისინი ერთი სცენარით მოქმედებენ, – განაცხადა პარლამენტის თავმჯდომარის პირველმა მოადგილემ გიორგი ვოლსკიმ.
„არ შეიძლება ადამიანთა გაერთიანებას პოლიტიკური პარტია ეწოდოს და ჰქონდეს საშუალება იმუშაოს საქართველოში, იყოს რეგისტრირებული, როგორც პოლიტიკური პარტია, როდესაც ისინი ერთი სცენარით მოქმედებენ. ამ სცენარის მთავარი სახელი, საერთო სახელი არის კოლექტიური „ნაცმოძრაობის“ მიერ დესტაბილიზაციის პროცესების განვითარება საქართველოში იმ მიზნით, რომ ხელისუფლება შეიცვალოს და მოვიდეს ის ხელისუფლება, რომელიც ამ დანთებულ ცეცხლს მსოფლიოში და უბედურებას შემოიტანს საქართველოში. ამას უნდა ჰქონდეს მძლავრი ანალიტიკური და სამართლებრივი შეფასებები და აქედან გამომდინარე უნდა ჰქონდეს რესურსი იმისათვის, რათა მივმართოთ საკონსტიტუციო სასამართლოს“, – განაცხადა ვოლსკიმ.
სახელისუფლებო გუნდმა „ნაციონალური მოძრაობის“ არა კონსტიტუციურად ცნობის პროცესი დაიწყო. მზადება მიმდინარეობს საკონსტიტუციო სასამართლოსთვის. ვიდრე ისტორიული დავა დაიწყება, მანამდე მომზადდება პარლამენტის საგამოძიებო კომისიის დასკვნა. პარლამენტში უკვე დარეგისტრირდა კანონი, რომელიც „ნაციონალური მოძრაობის“ წესდების მიზნებისა და შემადგენლობის იდენტური პარტიებისთვის საქმიანობას კრძალავს.