რადას დეპუტატმა, ალექსეი გონჩარენკომ განაცხადა, რომ არ მისცემს ხმას მობილიზაციისა და საომარი მდგომარეობის გაგრძელებას.
„ამჟამად ჩვენი სამხედროები, რომლებიც იცავენ თავიანთ ქვეყანას ოკუპანტებისგან, ყველაზე ნაკლებად არიან დაცული ამავე ქვეყნის მიერ. ფაქტობრივად, ისინი მონობაში იმყოფებიან“, – აღნიშნა გონჩარენკომ.
მეორე მიზეზი, რის გამოც გონჩარენკოს თქმით, არ აპირებს, რომ ხმა მისცეს საომარი მდგომარეობის გახანგრძლივებას, არის ის, რომ ადამიანებს კვლავ იჭერენ ქუჩაში და ახდენენ მათ მობილიზაციას.
გონჩარენკოს განცხადებას უმაღლესი რადას სპიკერი, რუსლან სტეფანჩუკი გამოეხმაურა და აღნიშნა, რომ რადაში კენჭისყრის დროს „პუტინის კასტინგი“ ჩატარდება.
„პუტინის კასტინგის საბოლოო შედეგები რადაში უკვე ხვალ იქნება ნაჩვენები, მათ შორის, ვინც საომარი მდგომარეობის გაგრძელების წინააღმდეგ მისცემს ხმას“, – განაცხადა სტეფანჩუკმა.
უკრაინის პრეზიდენტმა, ვოლოდიმირ ზელენსკიმ რადას საომარი მდგომარეობის ვადის გახანგრძლივების და საყოველთაო მობილიზაციის ვადის გაგრძელების შესახებ კანონპროექტი წარუდგინა. კანონპროექტები ითვალისწინებს უკრაინაში საომარი მდგომარეობის და საყოველთაო მობილიზაციის გახანგრძლივებას კიდევ 90 დღით. რუსეთის სრულმასშტაბიანი შეჭრის შემდეგ, ეს იქნება მე-15 კენჭისყრა საომარი მდგომარეობისა და მობილიზაციის გასაგრძელებლად.